رحلتي المصورة الى جمال الطبيعة (( النمسا )) ...

[الفارس]

صور رائعه بكل ماتحمل الكلمه من معنى

تقرير سوف يجد الكثير من المتابعين

واصل فالكل يتابع أخوي فارس

وبنتظار التقارير القادمة ان شاء الله

هلا فيك اخوي سالم ..

مرة ثانية تشرفنا في التقرير .. الاروع متابعتك المتميزة .. والبركةفيكم وفي بقية الاعضاء ..

ومرة ثانية شاكرلك المرور ..

[الفارس]

ماشاء الله ماشاء الله ماشاء الله ماشاء الله
على هذا السرد الرائع والظريف على فكرة سالفة السرير المزدوج هذه فعلا مشكلة لانها صارت معي وغيرنا الفندق بكبره لانه ماعندهم غرفة بسريرين

المهم لاتتاخر علينا لاننا على نار

اي والله انك صادق يا abunaser يفكرونا مثلهم هالخواجات ..

بس ماعليك ترى البدائل موجودة بس بعض الناس يسكت ومايطلب التغيير اذا ماعجبه شي بدافع الخجل ..

مشكور اخوي ..

[الفارس]

(( اليوم الثاني - فينا )) الخميس 3 / 8 / 2006 م


صحينا من النوم كعادة العرب الساعة التاسعة صباحا وبعد التمطط والتسحب نزلنا على الافطار الساعة التاسعة والنصف ..

ويعتبر بحق افطار جيد المكان حلو ومافي زحمة والتنوع مقبول في قائمة الافطار ..
بعد الافطار جهزنا نفسنا للخروج وطلعنا من باب الفندق.. واذا بالسماء ملبدة بالغيوم ولا تكاد ترى نور الشمس منها قلت يا ابو عبدالرحمن المظلة المظلة ..

قالي ويحك اناخذ المظلة وما فعلها من سبقنا في الايام الخوالي ( الله يعينكم اشتغلت اللغة العربية )
طبعا انا اصريت ناخذ المظلة قال من الفندق ببلاش باخذها يمكن ينزل مطر وهذا يدل على خبرتي بالارصاد الجوية .. احم احم ..

المهم رجعنا للفندق واخذنا مظلة واحدة بس
ثم قلتله ..... العبرة باللي يضحك في الاخر ...

ركبنا الباص وتوجهنا الى الاندرقراوند الخط الاحمر .. برج الدانوب والحديقه التابعه له وللوصول اليه التوقف عند هذه المحطة U1 Dona Alte
والدخول ب5 يورو ، الصعود يتم عن طريق مصعد سريع يوصلك الى القمة التي يوجد بها مطعم ومقهى دوار ومطل زجاجي ومطل آخر مفتوح .

قبل البرج طبعا في حديقة البرج وبصراحة رغم وصف الاخوة اللي راحو لها الا انها كانت اجمل من الوصف بكثييييير بالنسبة لي ..

عند البوابة شفنا هذه الالعاب ويابخت من كان معاه اطفال ..



وهذه الصورة لمكان معد للاحتفالات حلو ومرتب



تفاح يالله من فضلك





بحيرات الحديقة



بط الحديقة





شبعو من السباحة وطلعو يتشمسون



طبعا ربعنا العرب من كثر مايبون الاجر في البط يأكلونهم فحطولهم الجماعة هالوحة



هذا برج الدانوب الشهير



هذي قهوة النمساويين ( رايقة والله ) ..




لما انتهينا من الفرجه من الاعلى قررنا ننزل الى المكان اللي تحت المطعم وهو عبارة عن مطل حديدي مشبك جميل جدا جلسنا فيه شوي وبعدها قررنا ننزل لنهر الدانوب ونشوف المراكب ونتمشى حواليه
لكن للاسف حصل مالم يكن بالحسبان ..

بدات السماء تمطر ... انا قمت اضحك ... صاحبي مامعه مظلة عنيد الله يهديه يقول شوي وبيوقف ..
ذكرته بمقولتي... العبرة مين اللي يضحك في الاخير ... اي هين
والله والمطر مستمر مظلة وحدة عطني اعلمك كيف تفتحها يابو الفوراس ... الحقني موعدنا في الانردقراوند هااهاهاهاهاهاهاهااه ابو الجحده ..
لا لا خلاص تعال المظلة راهية ماشاء الله تكفينا احنا الاثنين ..

واخذناها مشي الى الاندرقراوند وقررنا نأجل نهر الدانوب الى وقت ثاني لان المطر استمر بدون توقف وقلنا نروح نتغدى ..
اخذنا غدانا من البرجر كنج من المطعم اللي جنب الفندق وعلى الغرفة غداء وصلاة الظهر والعصر وراحة الى الى ان نقرر وين الطلعة الثانية بتكون في ظل هذه الاجواء الجميلة....

[الفارس]

بعد الراحة اللي اخذناها قررنا انو حنا نروح الى - شارع ماريا هلفر للتسوق

(Mariahilfer Strasseعنوانه كالتالي :-

يبدأ من محطة ويستبانهوف U3,U6 مرورا بمحطتي زيجلر جاسه ونوي باوجاسه U3

ومنه نوصل الى شارع المشاة وساحة ستيفن بلاتز
( Stephansplatz )
وهو شارع جميل جدا وأكثر ما يعجبني فيه العروض التي يقوم بها المهرجين والعازفين
وصلنا الشارع لكن المطر لم يتوقف واستمر وازدادت قوته في بعض الفترات قلنا لازم نمشي ونتفرج على الاقل على الناس وهم يهربون من المطر
مشينا ومشينا ومشينا الى ان حسينا انو فعلا خلاص ما نقدر نكمل من التعب طبعا تحت المطر بس المرة هذي عندنا مظلتين مش وحده
رجعنا تعشينا والى الفندق وبعدها اخذنا شوي كم ساعة في النت
ورتبنا جدول بكرة لانه حافل جدا وفعليا هو اخر يوم في فينا وباقي علينا اشياء كثيرة ما رحناها فلازم نروح ان شاء الله
على العموم بترككم اللحين مع الصور واتمنى تعجبكم لان المطر كان قوي شوي فراحت كثير من جودة الصور تحياتي لكم ،،

ابو الفوارس مع مظلته النمساوية تحت المطر ..



مبنى الاوبرا ..











كانت هذي احداث يوم الخميس تابعونا في احداث يوم الجمعة اليوم الاخير في فينا ..

[الفارس]

الجمعة 4/8/2006

استيقضنا من النوم مبكرا في هذا اليوم لان عندنا مشاوير كثيرة وهذا آخر يوم لنا في فينا , بعد ما خلصنا الفطور ركبنا الباص متوجهين الى بداية ال U1 في الاندرقراوند ومنه الى خط ال U4 الاخضر والمؤدي الى قصر الشونبرون العريق وقد كان ارث لعائلة هابسبورغ الحاكمة ,,,

قبل ماينطلق الباص كان مافيه الا انا وصاحبي , ركبو معنا ثلاثة شباب من شفتهم عرفت انهم خليجين ..
ويجلسون وراي , واسمعمهم يتكلمون وماخذين راحتهم الا واحد يقول خلنا نسأل هذا يمكن يدلينا (يقصدوني) ويجيني اولهم ( اسكيوزمي سير) قلت سير ولا حزام انتو سعوديين ولا كويتين !! ولا دور وجيهم , الاخوان يفكروني خواجه ... هذي مشكلة الحمران والمزايين اذا البسو بدل .. اكتشفنا انهم معنا في الهوليدي ان هم من الرياض .. والله وهات سواليف ,, كان هذا يومهم الاول واحنا الاخير وافترقنا عنهم وتلاقينا فيهم في مكان ثاني , بنقولكم في وقتها ....

نعود لخط سيرنا وصلنا القصر اخذنالنا كم صورة من الخارج ثم قطعنا التذاكر لدخول جميع غرف القصر .. دخول قصر الشنبرون على ثلاث فئات الفئة الاولى نصف غرف القصر الفئة الثانية جميع غرف القصر الفئة الثالثة جميع غرف القصر مع الحديقة المتاهة وبعض الاماكن الخارجية الاخرى .. احنا اخذنا الوسط اللي هو كامل غرف القصر كان الدخول 11.5 يورو للشخص الواحد ..

ويعطونك جهاز لاسلكي يتحدث عن تاريخ ومهمة كل غرفة تدخلها , تمشينا في الغرف وشفنا صور اليزابيث وغرفتها الخاصة وغرف ادارة الحروب وغرف الابناء ....الخ , بعد ال22 غرفة الاولى يتغير نظام الاثاث تماما في الغرف الاخرى , طبيعة الغرف اكثر فخامة من الاولى , حاجة راقية والله .

خلصنا القصر وطلعنا للحديقة التابعة له تمشينا فيها حتى تعب .. وهنا بين عامل اللياقة بيني وبين صاحبي , قالي انا مااقدر اكمل الى المطل اللي عند بحيرة البط , قلت انا بكمل , والله وانفصلنا عن بعض وطلعت عبر ممرات جميلة للغاية تتفرع منها طرق تؤدي الى اشجار كثيفة كالغابات , ومن جنبك شوي يمرعليك سنجاب مضيع , بطة تصايح , حمام وانت ماشي , خلصت التمشية ورجعت لصاحبنا الرشيق هو في انتضاري , قالي شرايك ودك ندخل حديقة الحيوان !! قلت مايحتاج انا شفت كم سنجاب وبط يكفي .....

خلصنا من زيارة القصر وكانة الساعة تشير للواحدة ظهرا وهذا موعد استلام السيارة من مكتب بدجت في مطار فيينا , وعن طريق قطار الكات وصلنا للمطار , توجهنا للمكتب مباشرة واعطينا الموظف اوراق الحجز واستلمنا السيارة , السيارة ماكان فيها نيفيقيشن بس احنا ماخذين احتياطنا وجايبين معنا واحد من السعودية , طلعنا شغلنا النيفيقيشن حقنا وطلع نكبة يشتغل شوي ويطفي شويتين واحنا في هالحالة الى ما ضيعنا .. طفيناه ورجعنا على الخريطة وهي نصف ساعة تقريبا تضييعة الا واحنا عند ملاهي براتر ...
قال بوعبدالرحمن خل نشوف تاكسي يرجعنا للفندق , والله واركب انا مع التاكسي وهو يتبعنا (من قده عنده رخصة دولية)

وقفنا السيارة في مواقف بجنب الفندق , يمكن تتسآئلون ليش وقفنا السيارة ؟ احنا مشينا على نصائح المجربين السواقة في فيينا صعبة وماتلاقي مواقف بسهولة فقلنا ليش نضيع وقتنا الله يخلي الباصات والآندرقراوند وخلها لسازبورغ وزيلامسي , تغدينا وطلعنا لساحة ستيفينز , ونتفرج على المهرجين والممثلين ..

طلعنا من ستيفينز الى ملاهي براتر عند المحطة PratersternU1 ... ومن دخلنا وصاحبي يلله يابوالفوارس شرايك بهلعبة وانا ارفض .. صحيح اني شجاع بس مش على اطلاقها ..

لعب اهو لوحده وشفنا واحد نمساوي معبي الطاسة وبيده البطل الله يعافينا وماتم احد يمر بجنبه الا ويصارخ عليه اخذت كاميرة الفيديو وجلست اصوره واتحمد الله على العافية ,, بعدها رجعنا الى بداية ال U1 وهناك سألنا عن مطعم نظيف فدلنا واحد مصري يبيع جرايد على مطعم تركي اكلنا فيه والله اكله جيد , ورجعنا بعدها للفندق للراحة بعد هذا اليوم المجهد واستعدادا للانطلاقة في الصباح الباكر الى سازبورغ الجميلة ..

اترككم مع الصور ..
آسف على الاطالة بس انا احب اذكر التفاصيل ولكم تحياتي ,,,

[الفارس]

(( صور اليوم الاخير في فينا ))

ساحة مدخل قصر الشنبرون ..





الممرات على شكل غابات ..



الحديقة الخلفية والمؤدية الى حديقة الحيوانات ..



تنسيق رآئع للزهور ..



نافورة الحديقة ..



شفنا هالفسيلة وحنينا لبلادنا ولنخيلها ..



مدخل حديقة الحيوانات ..



عودة لساحة ستيفنز وبعض المهرجين ..







مدينة العاب البراتر وانصح بزيارتها ليلا ..



وهذي اللعبة اللي يبيني العبها بو عبدالرحمن .. مهبول انا .. انا اشوف الصورة اخاف شلون اركب ..





اتمنى اني وفقت في اختيار الصور والتعليق عليها ومنكم العذر والسموحة اذا كان فيه قصور فهذا اجتهاد .. اودعكم اليوم وغدا بمشيئة الله نغادر بكم الى مدينة سازبورغ وما حصل لي فيها من موقف محرررررج سأرويه لكم في وقته.. تصبحون على خير ..

[الفارس]

(( يوم السبت 5 / 8 / 2006 م ))

في هذا اليوم طبعا صحينا بدري من النوم بحكم انو ورانا طريق ماندري عنه شي الا الرسومات اللي على الخرايط وبصراحة كانت الليلة الماضية تجهيز وقراءة فيها ..

بعد الافطار اللي زودنا عياره شوي عشان ما ندري كيف بيكون يومنا اخذنا اغراضنا ونزلنا عملنا شيك اوت من الفندق وشفنا الهندي اللي يشتغل بالاستقبال وتاكدت من الطريق مرة ثانية ..

بعدها طلعنا وشغلنا السيارة وقربناها عشان نركب الشنط شاف صاحبي راعي باص كبير يجهز الباص قال خلني اساله بمكن بيروح سالزبورغ طبعا طلع مايعرف انجليزي ..

المهم فهم اننا نبغى نروح سالزبورغ والله ولا كذب خبر دخل الباص ورجع ومعاه مجموعة من الخرايط وتحمس الرجال ويشرح ويوضح وياشر ..

ركبنا الشنط في السيارة وتوكلنا على الله في الذهاب الى سالزبورغ وكان طبعا لازم نتبع الطريق المؤدي الى لينز وهو a1 ومنه حنوصل الى سالزبورغ ..

هذا الفندق وهذه السيارة في صباح المغادرة وباين في الخلف الباص اللي سألنا سواقه ..
بوعبدالرحمن يسلم عليكم ..



الطريق طبعا رااااااائع جدا جدا وواضح جدا وواسع ولا فيه اي مشاكل او تضييع والحمد لله
ما سبق لنا ان استمتعتنا بالسواقة زي هالمرة شي والله حلو مرة
وهذه بعض الصور من الطريق ..







في الطريق الناس كلها ماشية على الجانب الايمن وما تروح لليسار الا عشان تتجاوز بس والله في ناس تسرع يعني في سيارات تمشي فوق 150 وبالراحة يمكن مافي تفتيش سرعة الله اعلم ..

وقفنا بعدها في محطة بنزين شفنا الناس توقف وتنزل تريح وتتمشى قلنا خلنا اليوم نصير اوربيين ونزلنا شوي .. وهنا ميزة السيارة الخاصة عن القطار والباصات توقف اذا شفت منظر اعجبك ولا محطة ولا بترتاح يعني ماحد يامر عليك بشي انت تتحكم في وقتك ..

ودخلنا بقالة واشترينا موية واغراض واهم شي انها بدون غااااز .. لان اغلب المياه اللي عندهم غازية وماتصلح لنا واحنا خربناها اول ماوصلنا وشرينا كرتون ماي طلع بالغاز والله ماشربنا منه شي .. بوريكم الفرق بعدين بين النوعين ..

اترككم الان ولنا لقاء اليوم مع اجزاء برنامج سازبورغ الجميلة ..

*** ترقبو في الحلقة القادمة مايلي***

- ماذا حصل لي من موقف محرج عند وصولنا الى سازبورغ وكيف تصرفت!!
- نقل مباشر لوقائع الالعاب الفانتازية المائية من قصر الهلبرون .. مقالب وتوهيقات ..
- الفارس الشجاع وزميله متورطين في عرس نمساوي .. تخيلو ..
- ابو الفوارس جاب العيد في البريك فاست وخرب جو الرومنسية ..
- البحيرات الثلاث وبحيرة موندسي الام وقرية وولف قونق ابداع الهي ..
- على سطح البلكونة .. غزال يمشي على هونه !!
- رحلة المغامرات الى المغارة والكهف الجليدي احداث ومشاهدات ..

[al3rbee]

روووووووووووووووووعه

مشكور

[Dr3]

مشاء الله عليك ابو الفوارس صراحه تقرير ولا اروع يا الاوربي هههههههههه ناطرينك ابو الفوارس بس كم كيلو طلع المشوار وكم تمشون ؟؟؟؟؟؟؟؟

[سفير الامارات]

مشكور على التقرير الروعه