اكتشف معنا متحف آثار الإسماعيلية جولة فى تاريخ مصر (متحف قصته ارتبطت بقناة السويس )

[منصور عاشق الترحال]

م/ محمد منصور

السلام عليكم و رحمة الله و بركاته

خلال رحلة عائلية الى مدينة الاسماعيلية للاستجمام قولت لازم ادور على حاجة جديدة اعملها و قريت عن متحف اثار الاسماعيلية و قررت القايم بجولة و اكتشاف لاحد المتاحف الاقليمية فى مصر فى مدينة الاسماعيلية و هو متحف آثار الإسماعيلية الى بيرتبط تاريخه بشركة قنال السويس لان من قام بانشائه مجموعة من العاملين بها و المتحف يضم اكثر من 4000 قطعة اثرية تعود لعصور مختلفة و هو تحفة معمارية رائعة.

كان المتحف فى بدايته سنة 1911م متحف مفتوح بحديقة المتحف قام بانشائه مجموعة من العاملين بشركة قنال السويس ، وتم إنشاء المبنى الحالى على شكل صرح أو معبد، وافتتح للزيارة 1934 ، وماتوالد عن حفر قناة السويس من أثار عثر عليها أثناء الحفر مما دعا الباحثين (هواه ومحترفين ) عن الأثار للقدوم لمنطقة الإسماعيلية ،والعمل بها للتنقيب عن الأثار، وكان أشهر هؤلاء “جون كليدا” ، الذى قام بالعمل فى عدة مواقع أثرية مختلفة فى خليج السويس وسيناء والإسماعيلية، وكان من انتاجها العديد من القطع الأثرية لذا بدء فى التفكير فى إنشاء متحف كى يضم هذه المجموهة النادرة وعرضها على الجمهور وعليه بدأ الأثرى "هولد"، فى تصميم وعرض مشروع المتحف.

المتحف اجمل حاجة فيه وجود اثار حقيقة و تماثيل اصلية فى حديقة المتحف يعنى متحف مفتوح غير المعروضات الموجودة داخل المبنى الى رغم انه مش ضخم لكنه متنوع من العصر الفرعونى الى عصر اسرة محمد على بالاضافة الى موقعه فى حى الافرنج الى بتميز بالخضرة و الطراز المعمارى الفرنسى

دخول المتحف ليه قصة ظريفة لانى روحت يوم فى نص الاسبوع وصلت ملقيتش حد بيدخل او يخرج ..... دخلت و طلبت تذكرة حسيت انى بطلب شىء غريب

انت اول واحد تيجيلنا النهاردة ........ و فعلا مشفتش اى زائر غيرى


المتحف يستحق الزيارة و الوصول اليه سهل من طريق البلاجات 10-15 جنيه تاكسى و اتمنى انى اعرفه لاهل الاسماعيلية و زوارها مش هتاخد اكتر من ساعة - ساعة و نصف هناك و ممكن تتمشى فى المنطقة المحيطة بالمتحف زى ما انا عملت بس مانصحكش تعمل كده فى الصيف عشان الشمس رهييييييييييبة

تذكرة الدخول للمصريين 5 جنيه و التصوير داخل المتحف 50 جنيه

الموقع على خرائط جوجل

https://goo.gl/maps/CBemacSs7762

العنوان: ش محمد على , حى الافرنج, الاسماعيلية

تمثال من البازلت العصر البطلمى

حوض استحمام من العصر الرومانى

تابوت من العصر الرومانى

و صور من شبكة الانترنت لمتحف اثار الاسماعيلية من الداخل















و كان معكم من محافظة الاسماعيلية

م / محمد منصور

القاكم دوما بكل خير

[ابن الخضراء]

تقرير رائع جداا ...
و المتحف تحفة ...
بارك الله فيك أخي محمد منصور ...

[منصور عاشق الترحال]

تقرير رائع جداا ...
و المتحف تحفة ...
بارك الله فيك أخي محمد منصور ...

الاروع هو مرورك ابو محمد

نورت الاسماعيلية