في صباح اليوم التالي وبعد الافطار في الفندق، كان موعد لقائي مع جيني واخوها تمام الساعة 9 الصباح، توجهنا بعدها الى منطقة اسمها دونق فوق، تبعد عن لويانق 80 كم، وهذا سبب تطوعها في الاساس انها توديني، لان المنطقة بعيدة شوي وحسب كلامها انه راح يكلفني كثير لو خذيت سائق خاص
بما ان المسافة كانت تبعد 80 كم، استغلينا الوقت بالحكي، كنت اعرف اني انا الان في مدينة ما تبعد هذاك البعد عن ردم ذو القرنين، قررت اجس النبض، سألت جيني، قلت لها مدينة جنج جو اللي تعتبر اكبر مدينة فيها مقاطعة خنان، مافيها شي او معلم مميز، ردت على طول قالت لي فيه جدار قديم بس، وفيه النهر الاصفر كمان، على طول رديت وقلت، الجدار القديم، مين بناه؟ قالت لي اسم غريب، ومن هنا بدأت الكلام، قلت لها انا قريت كتاب في بعض المعلومات عن هالجدار وما اعرف اذا كانت معلومات صحيحة او لا، طلبت تعرف ايش عندي من معلومات اللي قرأتها بهالكتاب، بالنسبة لها، كونها تلتقي بشخص من بلد عربي لاول مرة، ويقولها انه قرأ معلومات عن منطقة هي ساكنة فيها، امر جديد بالاهتمام، قلت لها ان هالجدار اقدم من سور الصين العظيم، واساساً اسمه ردم مو جدار تصميمه على هيئة الدفن مو كهيئة البناء، يعتبر اكثر قوة وصلابة من سور الصين، مبني من مواد مميزة جداً حيرت الكثير، مكوناته متنوعة مابين الحديد والقطران ومواد اخرى مخلوطة جميعاً ومزجت بالحرارة (كما ذُكر في سورة الكهف: آتوني زبر الحديد حتى إذا ساوى بين الصدفين قال انفخوا حتى إذا جعله نارا قال آتوني أفرغ عليه قطرا) كان هذا الردم ردم دفاعي من ناس يسمون بـ يأجوج و مأجوج، وهم ناس غالباً من منغوليا وسيبيريا معاهم خيول شرسة وهم ايضاً شرسين، كان الصينيين يجدون صعوبة في حماية انفسهم من هالقوم، الى ان جائهم شخص ما يتكلم لتغهم (اسمه اخناتون ولقبه ذو القرنين) وطلبو منه مساعدة في قوله: حَتَّى إِذَا بَلَغَ بَيْنَ السَّدَّيْنِ وَجَدَ مِنْ دُونِهِمَا قَوْمًا لَا يَكَادُونَ يَفْقَهُونَ قَوْلًا قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا قَالَ مَا مَكَّنِّي فِيهِ رَبِّي خَيْرٌ فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْمًا
وغالباً هذا الشخص اتى من مصر وساعد الصينيين ببناء هذا الردم ولهذا هو ردم مميز وغير مكرر لانه ليس من من بناء الصينيين أنفسهم، وهو صامد الى الان، ما قلت لها عن تكلمة الاية اللي تقول: فإذا جا وعد ربي جعله دكا وكان وعد ربي حقاً، اكتفيت بهالكلام اللي قلته، كانت مصابة بالذهولة، بمجرد ما خلصت، سألتني سؤال واحد، قالت لي: انت رحت شفت هالردم من قبل؟ قلت لها لا، قالت: جالس توصفة وكأنك من سكان نفس المدينة، صار عندها فضول، وهذا اللي ابيه بالضبط، قالت لي من وين جبت هالقصة بالتفصيل؟ قلت لها من كتابنا المقدس في الاسلام، اقصد القران، وفيه كاتب باحث وضح فيه امور كثيرة، عرضت عليها اني ازودها بنسخة انجليزية من الكتاب كنوع من الشكر والعرفات، وافقت بدون تردد، والاهم من هذا كله، انها ايدتني بأغلب اللي قلته، خصوصاً بالجزئية اللي هي تعرفها، بعض الاشياء كانت تجهلها، اول ما رجعت السعودية ارسلت لها نسخة انجليزية من الكتاب، هدفي مو بس اني اعرفها عن هالردم وبس، هدفي اني اعرفها عن الاسلام، لعل وعسى!!
موقع دونق فوق بالنص مابين جنج جو و لويانق اتمنيت لو كان عندي وقت كافي لزيارة ردم ذو القرنين، بس ربي ما كتب
وصلنا مدارس الكونغفو بعد هالحديث الشيق، دونق فوق فيها 20 مدرسة كونغفو بمجموع 100 ألف طالب، وتعتبر مدرسة تاقو هي افضل مدرسة بالمنطقة، جت لي او جاكي شان، نسيت ايهم درس بهالمنطقة
اصغر متدرب عمره 4 سنوات
كلهم رحبو فيني واخذت جولة كاملة بالمدرسة
هذا عمره 14 سنة، حاول يدربني بس استسلمت من اول 4 دقائق، طلبته يستعرض قدامي ببعض الحركات، صورته فيديو راح انزله ضمن الفيلم الخاص بهالمدينة
فيه جزء للملاكمة بعد، انتبه تزعل حد من هذولا
الساعة 12 الظهر رن الجرس وكلهم بدأو يلمون اغراضهم، استعداد للدروس الفصلية المدرسية
وهذا صاحب المدرسة
بعدها توجهنا للغداء، ولاني قلت لها اني نباتي من قبل لا اوصل، ما تعبت بحكاية الاكل
المطعم بنيته جميلة صراحة
بعد الغداء اخذتني جيني لزيارة معبد اسمه Shaolin Temple لمشاهدة خفيف وسريع للكونفغو
بعدها بدينا نتمشى في المعبد
زهرة اللوتس تعتبر زهرة مباركة عند بوذا، تقولي جيني ان بوذا يحب اللوتس، عشان كذا ممكن نشوف زهرة اللوتس بكثرة في آسيا عموماً
هالشجرة لها قصة اسطورية عجيبة ماتدخل العقل
ثم بدأنا نشوف اشكال ضخمة من المجسمات اللي يزعمون انها آله، يزعمون ان هذا اله ويسمونه إله الشر!! استغفر الله
وهذا كان قباله بالضبط يسمونه اله الخير، يقولك انهم كانو يحاربون بعض!!
هذولي يوصفونهم بأصحاب اللهو والطرب
بدأنا برؤية المعابد من الداخل
في المعابد ياخذون دائما 3 عيدان خشبية و 3 بالتحديد لان كل واحد منهم له رمز (الماضي - والحاضر - والمستقبل) يشبونهم في النار و يحطونهم بهالطريقة، هذي طريقتهم في الصلاة! تعالى الله
بعد ما يشبون العيدان من فوق، وقبل لا يحطونه بمكانه المخصص، يمسكونه بنفس الطريقة اللي بالصورة، ويركعون 3 ركعات، كمان ركعة للماضي، وركعة للحاظر، وركعة للمستقبل!! المحزن في الموضوع، ان احد الاطفال اخذ 3 عيدان وشبهم بس زاد من ادخال العيدان وكثرت النار عليه، حس بالحرارة وخاف قام رماهم في الارض وانحاش وقام يصيح!! أفلا يبصرون!!!
يصلون مرتين في الشهر في الغالب، الملتزم منهم يصلي مرة كل اسبوع، كنت في المقابل كل معلومة تقولها لي، اقوها ايش المقابل عندنا في الاسلام، الين ماصارت هي تقولي عندنا في بوذا كذا وكذا، كيف انتو عندكم
هذا اللي كان يصلون له، بوذا ومساعده، والامرأة اللي معاه اسمها ساكاموني!!
زهرة اللوتس زهرة الحظ، بالمناسبة، زهرة اللوتس عندهم تكون 7 طبقات فوق بعض او تكون مرتبة 7 مرات، لان 7 رقم الحظ في الديانة البوذية
أحد المقابر الموجودة بالمكان
بالطريق للرجوع، شفنا حفل تخرج لمدارس الكونغفو
بعد هالمشي الطويل، رجعنا الى لويانق، وصلنا قبل الغروب، ارتحت الين المساء ورحت للسوبرماركت اتبضع بعض البضائع لأن بكرة كمان عندي رحلة مبيت الى شنغهاي
الله وكيلكم، من دخلت السوبر ماركت صار هالموقف
قسم الاندومي
وهذي المؤونة - الاندومي بنكهة البيض والخضار بحياتي ماكليت نوديلز كثر ما كليتها بالصين
بعدها رحلت لمطعم امس الاسلامي تعشيت منه
صورت للوالدة الصحن قبل و بعد عشان تعرف اني اكل
تكلمة التقرير بالصفحة التالية