النتائج 1 إلى 3 من 3
Like Tree1اعجاب
  • 1 Post By الدهـنـــيـم

الموضوع: تجربتى فى تونس بالاسعار المطاعم و الوجبات و الاكلات الشعبية و الكافيهات (تقرير مصور)

  1. #1
    [ عضو مجلس الإدارة ] الصورة الرمزية منصور عاشق الترحال
    تاريخ التسجيل
    Feb 2011
    الدولة
    القاهرة
    المشاركات
    4,993

    تجربتى فى تونس بالاسعار المطاعم و الوجبات و الاكلات الشعبية و الكافيهات (تقرير مصور)


    م/ محمد منصور

    السلام عليكم و رحمة الله و بركاته

    تونس بتحب الاكل و الكل بيحب تونس

    نلتقى معكم اليوم من تونس من جديد و موضوع خاص لعشاق الأكل الذى لا تكتمل متعة الرحلات من دونه و تجربة ما هو جديد و يو مختلف و مميز بنكهة البلد التى تسافر اليه

    بداية فى تونس كانت المفاجأة الاحلى ان الاكل اطعم و مقارب فى السعر لمصر بل و ارخص فى كثير من الاحيان فى مدينتين و هما فى البداية الحمامات و الختام تونس العاصمة علما بانى ماروحتش لاى محل بتخطيط عن شهرته و كله بالتجربة.

    ان شاء الله اتمنى التقرير السياحى ده يعطى فكرة جيدة للمسافرين الى تونس عن مستوى الاسعار بالنسبة للطعام هناك


    الدينار التوسى = 1000 مليم



    الدولار الامريكى = 2.5 دينار تونسى تقريبا


    بداية اسعار المياه فى المحلات العادية و الاكشاك ( طبعا فى المطاعم اغلى حسب مستوى المحل)

    زجاجة مياه صغيرة 400-500 مليم
    زجاجة مياه كبيرة 800-900 مليم

    اسعار المياه الغازية فى المحلات العادية و الاكشاك ( طبعا فى المطاعم اغلى حسب مستوى المحل)

    الكانز او الزجاجة الصغيرة 700 - 800 مليم

    اللتر حوالى 1300 مليم

    اللتر و نصف حوالى 1700 ملي

    فى تونس الانواع المشهورة عالمية زى كوكاكولا و فانتا و لكن ارشح لكم بوفا Boga و هو ماركة تونسية أعجبتى جدا و لها نكهات مختلفة افتقدتها كثيرا








    الشيكولاته التونسى

    بناء على توصية اصدقاء من تونس الخضراء هناك نوع شيكولاته تونسى طعمه مزيان برشا و تحسه اوربى و لكن سعره اقتصادى جدا مقارنة بالطعم المميز و من احلى الماركات Maestro مع الاسف لم اتذوقه الا بعد رجوعى مصر و الا كنت جبت منه كونتانير

    هتلاقى انواع و صناعة اوربية باضعاف سعر الشيكولاته التونسى نصيحة ماتجيبهاش











    حاجات كنت المفروض اجيبها بس يالا المرة الجاية ان شاء الله

    التونة فى تونس وهمية و الهريسة الى هيا الشطة مع انى مش غاوى شطة بس جميلة فعلا


    التاى ( الشاى)

    زى المغرب بالضبط لازم تجرب كاسة الاتاى (التاى) بالنعنان و ياسلام بقى باللوز

    كاسة تاى باللوز على شاطىء البحر و ليلة شتاء جميلة و ذكريات باسمة فى اول ايامى فى تونس العاصمة فى كافيه فى حلق الوادى









    و كافيه فى شارع الحبيب بورقيبة و كاسة تاى ساخنة فى ليلة شتاء باردة الطقس دافئة المشاعر و اسعار المخبوزات من 800 - 1300 مليم و الحلويات من 3.5 دينار (مناسبة للافطار و العشاء)








    مطعم Mouka Rest
    للمشويات و الاكلات التونسية " مدينة الحمامات"

    الموقع على خرائط جوجل فى ياسمين الحمامات

    https://goo.gl/1Njy7R

    المنيو




    بعد تمشية طويلة و اكتشاف الحمامات العتيقة و القصبة تفاصيل الجولة من هنا

    المدينة العتيقة الحمامات تونس سحر التاريخ و روعة المعاصرة (الجولة الاروع فى الحمامات)


    كنت واقع من الجوع عمال الف من ساعة ماوصلت تونس و ماكلتش تقريبا حاجة غير الفطار فى الطيارة بحثت عن مطعم لتناول وجبة اسماك و تحدثت مع بعض المارة من اهل تونس الكرام

    عاوز اكل سمك مشوى

    طبعا احتارو


    اقدك حوت

    ايوة هو ده

    وصفوا للتاكسى مكان المطاعم و قالولى ان قريب من الفندق يعنى نفس الطريق و بعد النزول كان فيه عدد من المطاعم جنب بعض اخترت المطعم ده بالاحساس كده و الحمد لله كان الاختيار موفق و هو يقدم اطباق اسماك و لحوم و دجاج و اطباق بحرية

    اخترت وجبة سمك (صحن حوت قاروص مشوى) ب 15 دينار مع البطاطس و الارز و السلاطة و الشوربة (ده اغلى طبق فى المطعم)

    فى تونس فى كل المطاعم و الكافيهات الى جربتها السعر المكتوب فى المنيو او متعلق فى المحل او بيتقال مابيزودوش خدمة وضريبة و .....

    هوا الى بتدفعه يعنى مش بيزودو خدمة او ضريبة و كده يعنى مش 15و تدفع 20 و دى من اكتر الحاجات الى عجبتنى فى تونس

    قالى الوجبة 15 زى المنيو و الفاتورة 15

    السمكة كانت من نوع القاروص ( وهى توصية من الشيف) مشوى على الطريقة المصرية تقريبا و الارز اسمه رز جربى مشطط روعة و فكرة البطاطس المقلية "البطاطا" جنب السمك مش تقليدية فى مصر بس طلعت تحفة و الخدمة ممتازة

    التقييم : 8.5/10

    أسعار الاطباق الرئيسية من 5 الى 15 دينار هناك كسكسى و سباجتى و دجاج و سكالوب و حوت (الى هوا السمك بيسموه كده فى تونس)

    طبعا اطباق الكسكسى او الكسكس التونسى مشهورة جدا ولازم تجربها هناك و هما بيعملوه حادق مش حلو زى عندنا هتلاقيه باللحم او الدجاج او الحوت

    فى تونس اكلات شعبية كتير طبعا الوقت ماسمحمشى و لا المدن انى اجربها





























    بامبالونى خميسة مارينا الحمامات

    على الكورنيش فى مدينة الحمامات و بالقرب من المارينا كشك يبيع حلوى البامبالونى التونسية الشهيرة جربتها ساخنة بالسكر روعة و تدفيك فى السقعة مع الخالة خميسة و ابنها

    سعر القطعة بالسكر 1 دينار

    التقييم : 8.5/10













    طبعا البامبالونى موجود فى اماكن كتير اشهرها فى سيدى بوسعيد بيقولو هناك تحفة بس مع الاسف مجربتوش هناك

    جربته فى تونس العاصمة ب 0.5 دينار و لكن مكنش بجودة الخالة خميسة

    عشاء خيف مقهى و مطعم Salon De The Paris

    مطعم و كافيه ظريف و جلسته ظريفة و طرب مع صوت نجاة الصغيرة و اخر ليلة للى فى مدينة الحمامات عشاء خفيف كريب تونة السعر 5 دينار

    المطعم بتميز بوجود نمزذج لبرج ايفيل الفرنسى كنا بنعلم بيه الطريق للفندق

    تقييم المكان و الكريب : 8/10

    الموقع على خرائط جوجل فى منطقة ياسمين الحمامات فى الدوار الى فيه البوستة

    https://goo.gl/maps/pciwBP9EX5J2



























    الاطعمة الخفيفة فريكاسى - شباتى

    بعد وصولى الى العاصمة التونسية تونس قررت الذهاب الى سيدى بوسعيد تفاصيل الرحلة من هنا

    سيدى بوسعيد احلى مزارات تونس العاصمة (ضاحية السحر و الجمال)


    فى طريق التمشية من شارع الحبيب بورقيبة الى محطة قطار تونس البحرية و قبل المحطة قولت لازم اكل حاجة لانى مافطرتش يومها و لسه قدامى مشى كتير حسب ما اعرف قررت تجربة الساندوتشات التونسية

    جربت فريكاسى بالتونة رووووووووعة و شباتى بالسلامى

    الفريكاسى عجبنى اكتر طعم العجينة مختلف

    طبعا خليته يضيف هريسة " الشطة" خفيف و قولتله بيض لأ

    البيض فى تونس بيدخل فى الاكل بطريقة عجيبة و كتير اوى يعنى مثلا مع التونة ماشى مع السلامى شغال زى مايكون عندهم ببلاش ححتى فى الفندق لاقيت رز بالبيض

    انا باحب البيض بس اكله مسلوق مقلى اومليت عجة لكن مبحبوش يتداخل اوى كده عشان كده كنت باخد بالى من اى اكل اطلبع لايجود و يضيف عليه بيض

    القرار كان صائب لانى مشيت بعدها و طلعت و نزلت مسااااااااااااافة محترمة

    طيب نيجى للاسعار يعنى الفريكاسى الواحد ب 500 مليم (نص دينار) و الشباتى كان ب 1700 مليم و هتلاقو باقى الاسعار فى المنيو متعلقة



    الى جاى ده الشباتى





    و الى جاى ده االفريكاسى






    فى مطعم تانى فى ساحة النصر تونس العاصمة الاسعار كانت الفريكاسى ب 700 مليم الكرواسون ب 600 مليم و عصير البرتقال 1700 مليم

    لاحظت فى تونس العاصمة موضوع الوجبات الخفيفة السريعة دى منتشر جدا فى كل الاماكن الى روحتها






    Pizzeria Mosaique

    بعد زيارة سريعة لمنطقة بيرصا فى قرطاج و اثناء العودة الى محطة قطار قرطاج بيرصا كنا جعانين طب ناكل فين

    ايه رأيك فى البيتزا ؟؟

    انا زهقان منها فى مصر


    لا محل البيتزا عنده حاجات تانية تعال بس


    المحل مش لاقيه على خرايط جوجل هو ادام المدرسة الثانوى ودى موقعها على جوجل Lycée Carthage Byrsa

    https://goo.gl/maps/edEDN2nLaaU2

    كان وقت خروج المدرسة بعد المغرب لان فى تونس المدارس يشتغلو للظهر تقريبا و يريحو و يكملو دراسة فترة تانية فكان المحل معظمه طلبة و جربت الملفوف بعد ما شوفته بيتعمل مع البطاطس المقلية (البطاطا) سعر الوجبة 7-8 دينار على ما اتذكر

    اكلته سخن فى محطة القطار تقيييمى ليه 9/10

    قولتلك اصبر مش بيتزا اهو


    برافوووووووووووووو



    دى الطريق الى مشيناه من محطة القطار للموقع الاثرى قرطاج بيرصا



    وده شكل الشارع الى فيه المحل












    الاسماك فى حلق الواد

    كانت لى تجربتان مع الاسماك فى تونس العاصمة و حلق الواد

    الاولى مش متذكر اسم محطة القطار لان فيه 3 محطات حلق الوادى اخترنا مطعم و وجبة سمك سمكة دورات مع شوية حاجات معجبتنيش حاجة الا السمكة المشوية خرااافة

    سعر الوجبة 12 دينار

    التقييم : 6.5/10

    الثانية اسماك سيسيليا الصغيرة

    محطة مترو (قطار) حلق الوادى الجديد و بعدين مشى اقل من 10 دقايق توصل لمعم سيسيليا الصغيرة -خدو بالكم فيه اكتر من محطة اسمها حلق الوادي -

    المنطقة دي فيها مطاعم تانية برضو مهما اتكلم عن الطع مش هاقدر اوصف خياااااااااااااال ده كان احسن مطعم جربته هناك فى السمك السعر للفردين حوالى 25 دينار تونسى و بعد كده دقيقتين تطلع على البحر و احلى فيو و فيه تمشية جميلة علي البحر

    اخرتنا الاسماك و شواها مع الخبز و السلطة و الهريسة

    سعر الوجبة لفردين حوالى 26 دينار

    التقييم : 9.5/10


    الخلاصة بالنسبة للسمك و 3 تجارب سعر الوجبة من 12 - 15 دينار مع الوضع فى الاعتبار ان البحريات ملهاش اخر و ممكن تختار انواع اغلى براحتك و تزود زى ما انت عاوز بس ده الوجبة الى بعتبرها عادية فى تونس

    عموما البحريات فى تونس احلى و ارخض و طازة عن مصر فهى اكتر حاجة الزم تجربوها هناك و مش هتندمو

















    ملخص التجربة :

    تونس بلد جميلة جدا سياحيا و لن تواجه مشكلة فى الطعام التنوع موجود فى الاصناف و الاسعار و الجودة عالية

    منطقة ياسمين الحمامات عموما اغلى شوية من العاصمة تعتبر زى شرم الشيخ كده و تونس العاصمة متنوعة هتلاقى العادى و السياحى و مدينة نابل الارخص و لكن لم يتح لى الوقت تجربة مطاعم

    الافطار :
    كانت رحلتى شاملة الافطار فى الفنندق و لكن عموما ممكن ب 5 دينار تفطر كويس مخبوزات مثلا او ساندوتشات او معجنات مثل فريكاسى - شباتى - ملفوف

    فيه مطاعم بتقدم وجبات افطار كاملة شوفتها فى ياسمين الحمامات بتبدا من 5 دينار قهوة و عصير و كريب و تصل الى 15 دينار اغلى فطار دلع بالحلو زى فروت سلاد مع العلم انها منطقة سياحية تعتبر غالية



    الغداء: ممكن تتغدى بداية من 8 دينار و انت طالع 15 دينار كويس جدا فيه مطاعم بتقدم وجبات كاملة بالشوربة و الحلو 18 لحد 25 دينار اغلى حاجة شوفتها فى المنطقة السياحية فى مارينا الحمامات






    يعنى من 3 دولار لحد 10 دولار ممكن تتغدى

    العشاء : ده يتوقف عليك ممكن عشاء خفيف كريب 5 دينار مثلا و ممكن يبقى زى الغدا و ممكن ايس كريم 3 دينار مثلا و ممكن مخبوزات

    وجهة نظرى 30 دينار مبلغ مناسب لاكل فرد فى اليوم

    الكافيهات : فيه قهاوى زى البلدى فى مصر بس ماجربتهاش و الكافيهات اتكلمت عنها فوق فى شارع الحبيب بورقيبة اسعارها كويسة جدا

    فيه كافيهات اغلى شوية يعنى كوب العصير 5 دينار فى كافيه فى ساحة النصر فى تونس العاصمة و دى اسعار كافيه فى منطقة المارينا الحمامات و شايفها اسعارها مقبولة برضو مع الاعتبار ان مفيش خدمة و ضريبة زيادة يعنى ممكن عصير او مشروب ساخن + صنف حلو حوالى 10 -12 دينار



    اتمنى الموضوع يكون عجبكم و يفيدكم ان شاء الله و كل الشكر و التقدير لاهل تونس الحبيبة

    و كان معكم



    م/ محمد منصور


  2. #2
    عضو فعال الصورة الرمزية الدهـنـــيـم
    تاريخ التسجيل
    May 2008
    الدولة
    قطر
    المشاركات
    3,654




    تقرير دسم حتى الأشباع يا باشمهندس
    ما شاء الله تبارك الله
    الأطباق التونسية متنوعة و شكلها لذيذ
    و أسلوبك الراقي أضاف لها بهارات زيادة

    انا أعشق الأطباق البحرية بشده
    أما الشاي و القهوة و اللحوم فأنا بعيد عنها

    بارك الله فيك

    تحياتي


    اعجب بالمشاركة

  3. #3
    [ عضو مجلس الإدارة ] الصورة الرمزية منصور عاشق الترحال
    تاريخ التسجيل
    Feb 2011
    الدولة
    القاهرة
    المشاركات
    4,993

    اقتباس المشاركة الأصلية كتبت بواسطة الدهـنـــيـم مشاهدة المشاركة



    تقرير دسم حتى الأشباع يا باشمهندس
    ما شاء الله تبارك الله
    الأطباق التونسية متنوعة و شكلها لذيذ
    و أسلوبك الراقي أضاف لها بهارات زيادة

    انا أعشق الأطباق البحرية بشده
    أما الشاي و القهوة و اللحوم فأنا بعيد عنها

    بارك الله فيك

    تحياتي


    تونس ما شاء الله جميلة و متنوعة حتى فى الطعام

    و حتما ستجد ما يلبى ذوقك

    الاطباق البحرية مزياااااااااانة فى تونس بشكل عجيييب

    انا لا اشرب الشاى و لا القهوة

    اما الاتاى المغربى او التونسى بالنعنان فهو امر مختلف و رائع و خصوصا فى ليالى الشتاء و جلسات السمر

    شكرا تشريفك و كلماتك الراقية و التى تعد تقيييم خاص جدا و رائع

    دمت بكل خير صديقى

المواضيع المتشابهه

  1. مشاركات: 8
    آخر مشاركة: 2016-11-14, 10:46 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
X