السلام عليكم اهل المنتدي الكرام
حابب أحكيلكم عن تفاصيل رحلتي لتونس ومدي جمال ومغامرة الرحله وصعوبتها في نفس الوقت
هبدأ معاكم بالفيزا التأشيره وهي اصعب شئ في الرحله
القصه بدأت من سنه ونص لما قدمت علي الفيزا كأي مواطن عادي جدا
مليت الاستمارتين وجبتلهم الورق الي عاوزينه وقدمت عادي جدا فاكر انها هتتقبل عادي يعني وتترفض ليه
المهم انها اترفضت
قدمت تاني وظبط حسابي البنكي وخليت صديق تونسي يبعتلي دعوه قعدوا بعديها حوالي شهرين يأجلوا الرد عليا ويقولولي لسه الرد مجاش وفي الاخر برده اترفضت
طب ليه وازاي وايه السبب ... محدش بيجاوبك
اسكت ؟؟
ودي تيجي ؟؟
حد من السفاره تطوع مشكور وقالي خلي حد يسأل من تونس هناك وهو هيحركلك الدعوه
المهم قدمت تاني واتبعتتلي دعوه والرد اتأخر برده وخليت حد في تونس يروح يسأل عن سبب التأخير فالحمد لله ربنا يسر وقالوله يروح في السفاره في مصر وهيلاقي الموافقه جت
وبدأت الرحله من الاعداد والتجهيز للسفر وحجز تذاكر الطيران
وهوب دوبل كيك ركبت الطياره ونزلت مطار قرطاج في تونس العاصمه
اول حاجه اتلدعت فيها التاكسي ركبته من جوه المطار لحد ساحة برشلونه اخد مني 30 دينار
والناس كلها قالتلي بعد كده مكنتش ركبت من المطار من بره المطار هيشغل العداد ومش هياخد منك 3 او 4 دينار
بس فل يعني الواحد بيبقي عاوز يعرف في الاول بس الوضع عامل ازاي
قعدت في فندق في وسط البلد في برشلونه في شارع شارل ديجول يعتبر افضل اختيار بالنسبالي اليوم كان ب 25 دينار واهم شئ ان الاوضه كان فيها سخان مركزي فكانت دفيه وفيها حمامها الخاص
موضوع الدفي ده مهم جدا يا جماعه
انا رحت في شهر 11 الجو كان تلج يعتبر لبست كل اللبس الي واخده معايا البالطو مكانش بيفارقني يا جماعه
نيجي بقي للترحيب من الناس هناك
الشعب التونسي شعب يحب الضحك والهزار ... هما اينعم بحس انهم بيضحكوا علي اقل حاجه يعني انا هناك كنت حاسس نفسي الخليل كوميدي اي حاجه اقولها يضحكوا عليها
هما بيحبوا عادل امام جدا لدرجة ان واحد قالي انه لو يطول يخليه رئيس بلده هيخليه
الناس في تونس بتحب المصريين جدا وتحب تفضل تحكي معاك ويهزروا ويحسسوك انهم بيكلموا بالمصري كويس واهل كرم بجد
نيجي بقي للزيارات والاماكان الي رحتها
كان معايا صديق تونسي اسمه عباس من مدنين في جنوب تونس ظبطني بصراحه في اماكن يمكن محدش راحها في تونس
هوريكم فيفيديوهات بتظهر ده
معلومات عامه كده ... تونس بلد جميله جدا وشعب متحضر ومنظم ومثقف
الفيديو الاول في كافيه في البلده القديمه في تونس في يظهر المدينه القديمه ورانا
باقي الفيديوهات هتلاقوها بعد الفيديو ده علي اليوتيوب وهتعجبكم
اتمني اون افادتكم برحلتي دي الرحله فيها تفاصيل كتير بس محبتش اطول عليكم
واي حد عاوز يسأل عن اي حاجه انا تحت امره
بدايه من الفيزا الي تذاكر الطيران والفندق والاماكن الي يروحها هناك .. علي اد معلوماتي هحاول اجاوب
وشكرا ليكم يا اغلي ناس