صفحة 1 من 6 123 ... الأخيرةالأخيرة
النتائج 1 إلى 10 من 60

الموضوع: رحلة 15 يوم الي اجمل مدينة في العالم - فانكوفير الكندية

  1. #1
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    رحلة 15 يوم الي اجمل مدينة في العالم - فانكوفير الكندية




    السلام عليكم ورحمة الله



    رحلة 15 يوم الي اجمل مدينة في العالم


    فانكوفير الكندية







    اول ما تقراؤن عنوان الموضوع بعضكم بيقول على اي اساس اقول ان فانكوفير اجمل مدينة في العالم ، البعض بيقول وين راحت جنيف و باريس و باقي دول العالم المشهوره.

    صحيح فانكوفير مدينة مجهوله و غير معروفه للكثير من المسافرون العرب ، و الي فتره قريبة كان الكثير من المسافرون العرب ما عمرهم سمعو اسمها.

    لكن خذوها مني ، خذو العلم من شخص سافر للمدينة هذي 10 مرات متتالية ، و في كل مره اروح الها يلقاها اكثر جمال و جاذبية من المره اللي قبل.

    كل شخص سالني عنها و راح الها بناً على كلامي ، رجع و قال ان اللي ذكرته عنها ما يجي ولا 10% من جمالها الحقيقي.

    ابعطيكم في الموضوع هذا تفاصيل دقيقه الي اقصي درجة ممكنه عن رحلة لمدة 15 يوم ، ممكن تكون شهر عسل للمتزوجين الجدد و ممكن تكون رحلة رومنسية لزوجين حبو انهم يعيشون جو فانكوفير الرومنسي ، و طبعاً ممكن تكون رحلة استكشافية لمن يرغب في رؤية مدينة الاحلام فانكوفير.

    الرحلة هذي بتكون مبنية على السفر الي فانكوفير في شهر 5 ميلادي .

    __________________


    الحصول على تاشيرة الزياره الي كندا:


    ان طبعاً ما عمري سافرت الي كندا بتاشيره لانه و بكل بساطه الي قبل سنتين ما كانو الكنديين يطلبون تاشيره زياره من السعوديين ، لذلك معرفتي الشخصية باجرات الحصول على التاشيره محصوره في معلومات اخذتها من السفاره الكندية و من الانترنت.

    -) رقم تلفون السفارة الكندية في الرياض هو 4882288


    متلطلبات التقديم على تاشيرة الزياره الي كندا:

    -) تعبية النموذج الخاص بطلب التاشيرة.
    -) صورتين ملونه لطالب التاشيرة.
    -) كشف حساب بنكي لطالب التاشيرة.
    -) تعريف من عمل طالب التاشيرة.
    -) ان يكون جواز طالب التاشيرة صالح الي ما بعد تاريخ العوده من كندا.

    المدة المتوقعة للحصول على التاشيره في حدود 7 الي 15 يوم و ممكن اطول من كذا و بالذات للسعوديين كما هو مذكور في الموقع الرسمي للخاجية الكندية.


    __________________


    الطيران الي فانكوفير:


    1) الخطوط البريطانية:

    -) تقلع الطيارة من الرياض الساعة 0150 يوم السبت و الثلاثاء و الخميس ( ايضاً تقلع من الدمام و جده لكن في مواعيد مختلفة).
    -) الوصول الي لندن حدود الساعة 0600 بتوقيت لندن.
    -) مدت الرحلة في حدود 6 ساعات ( لا تنسون فارق التوقيت بين السعودية و بريطانيا ناقي ساعتين).
    -) الانتضار في مطار لندن حدود 10 ساعات ( ترا مطار لندن ما ينمل و الوقت بيمشي بسرعة) ، و اللي وده ممكن يمر صالة الواحة ( Oases Lounge ) المخصصه لمسافري الشرق الاوسط و الاسترخاء فيها مع تناول مختلف المشروبات مع الماكولات الخفيفه المجانية ، الصالة مزوده بفرش لمن يرغب بالنوم و غرف استحمام لمن يرغب ياخذ له دش يساعده على الاسترخاء. و ممكن للي يبغاء ياخذ له غرفة في فندق المطار و يريح فيها.
    -) تقلع الرحلة من لندن الي فانكوفير حدود الساعة 1600 بتوقيت لندن بعد انتضار 10 ساعات في المطار.
    -) و تصل الطياره الي فانكوفير حدود الساعة 1800 من نفس اليوم بتوقيت فانكوفير .
    -) مدت الرحلة حدود 9 ساعات ( فارق الوقت بين فانكوفير و لندن هوناقص 8 ساعات).
    -) مع العلم بانه فيه رحله يوميه بين اندن و فانكوفير و احياناً رحلتين ، يعني اللي وده ممكن يجلس في لندن كم يوم قبل ما يكمل الي فانكوفير.
    -) الخطوط البريطانية عندها شراكة مع الخطوط الكندية ، و ممكن تكون رحلتك من لندن الي فانكوفير على الخطوط الكندية.
    -) تكلفة التذكره حسب الموسم في حدود 4000 الي 5000 ريال للشخص.

    ملحوضة:

    انا سامع ان الخطوط البريطانية ناوية تلغي خطها بين السعودية و لندن مع بداية شهر 3 ميلادي القادم ، في الحاله هذي ممكن تطلعون من الرياض الي لندن على الخطوط السعودية.
    و ممكن تشترون تذكرتكم على الخطوط الكندية مباشره ، و تطلعون من السعودية الي لندن او فرانكفورت على السعودية و بعدين على الكندية.


    2) الخطوط الالمانية (لوفتهانزا):

    -) الاقلاع من الرياض ايام السبت و الثلاثاء و الخميس الساعة 0225 .
    -) مدة الرحلة الي فرانكفورت الالمانية 6 ساعات و 5 دقايق
    -) الوصول الي فرانكفورت الساعة 0730 بتوقيت فرانكفورت.
    -) الانتضار في مطار فرانكفورت لمدة 6 ساعات.
    -) الاقلاع من فرانكفورت الي فانكوفير الساعة 1315 بتوقيت فرانكفورت.
    -) مدت الرحلة الي فانكوفير من فرانكفورت 9 ساعات و 45 دقيقة.
    -) الوصول الي فانكوفير الساعة 1400 بتوقيت فانكوفير.
    -) تكلفة الرحلة ايضاً في حدود 4000 الي 5000 ريال.


    3) فيه ايضاً الخطوط الفرنسية و الدنماركية ( KLM) بس ما عندي فكره عن مواعيدهم لاني ما عمري سافرت معهم ، و اعتقد مواعيدهم ما تناسب المسافر من الشرق الاوسط.

    4) الطيران عبر دول شرق اسيا عن طريق الكاثي باسفيك او السنغافورية او الماليزية او حتي الصينية، طبعاً المشوار اطول لان الرحلة من السعودية الي شرق اسيا في حدود 9 ساعات و من ثم 14 ساعة اخرا الي فانكوفير ، السعر طبعاً ارخص بس الفرق بس في حدود 500 ريال للتذكره الوحده.


    ______________________


    في الطياره من لندن الي فانكوفير:


    حاولو تقعدون جمب الشباك عشان تستمتعون برؤية المناظر من فوق ايسيلندا و شمال كندا ثم وسط كندا.
    المناظر بالذات فوق كندا خيال و روعة ما لها وصف ، بتشوفون في البداية جزر الثلج المتحركه و ثلوج على مدا النظر ، و اول ما تنتصفون فوق كندا بتبدون تشوفون الغابات الكثيفة و البحيرات المتناثره في كل محل و الانهار الطويله ، و اول ما تقربون من المقاطعات الكندية الغربية بتشوفون سلسلة جبال الروكي الكندية بجبالها الشاهقه و الثلوج اللي تغطي قمم الجبال.

    و اذا قربتو من حدود مدينة فانكوفير بتندهشون من كبرها و جمالها و في نفس الوقت بتلاحضون تناسق العمران و تداخله مع لطبيعة الخلابه.

    في الطياره بيعطونكم المضيفين كروت تعبونها عشان الجوازات الكندية ، اذا كان عندكم مشكلة في تعبية الكروت اطلبو من المضيفين يساعدونكم و صدقوني بيطيرون فيكم و يخدمونكم بعيونهم بالذات على الخطوط البريطانية و الكندية ، اما الالمان فيعتمد على مزاج المضيف.

    الكرت بيكون فيه لااسئلة التالية:

    -) سبب الزياره و مدتها.
    -) اذا كنت تعرف احد في كندا.
    -) كمية الدخان و المشروبات الروحية اللي معك ( ما يسمحون بدخول اكثر من كمية محدوده من الدخان الاجنبي ، اللي يدخن الله يعينه لان دخانهم مخيس.
    -) اذا كان معك هدائيا لحد ( اذا معك هدية سعرها فوق 150 دولار بياخذون عليك ضريبة).
    -) المكان اللي بتسكن فيه.


    _______________________


    الوصول الي مطار فانكوفير:

    اول ما تنزل من الطياره بتمشي حدود 5 دقايق الين توصل الي كونتر الجوازات ، اذا خفت انك تضيع امش بس ورا الركاب الثانين و هم يدلونك الطريق.

    على كاونتر الجوازات بيسالونك عن سبب زيارتك و بيراجعون قايمه معهم عن اسماء اشخاص ممنوعين من دخول كندا و بيطلبون منك تعطيهم تذكرتك عشان يتاكدون من موعد العوده حقك.

    ايضاً بيطلبون منك تعطيهم الكرت اللي انت عبيته في الطياره ، بعد ما يخلص موظف الجوازات من سؤالك و مراجعة تذكرتك بيحط علامة على الكرت اللي معك و يرجعة لك و يسمح لك بالدخول الي منطقة استلام العفش.

    بعد ما تستلم عفشك و تتوجه للباب اللي يطلعك من صالة الوصول بيقابلك موظف عند الباب و يطلب منك الكرت اللي انت عبيته في الطياره ، و هؤنا مربط الفرس ، اذا كان موظف الجوازات حط لك علامة مرور ( علاماتهم مدري وش تعني) فهذا يوم سعدك و بياخذون منك الكرت و يخلونك تطلع من الصالة ، اما اذا العلامة اللي على كرتك ماهي علامة المرور فهم بيرجعون لك الكرت و يدخلونك مع باب ثاني الي غرفه كبيره فيها مجموعة اخرا من موظفي الجوازات ، الموظفين هذول بيستجوبونك من جديد و يفتشون عفشك. ( يعني بختصار لا تكذب في الكرت اللي انت عبيته لانهم ممكن يصيدونك) ، طبعاً اذا صادوك الموضوع سهل ، بيصادرون اللي معك او ياخذون عليها ضرايب و بعدين بسمحون لك بمغادرة المطار.


    ____________________


    الخروج من المطار:

    قبل ما تطلعون من المطار بدلو الفلوس اللي معكم الي دولارات كندية ، و اذا كان معكم ريالات سعودية يفضل انكم تبدلونها و انتم في اوربا .

    اول ما تطلعون من المطار منتم لاقين تكاسي قدامكم ، بيصير فيه واحد موجود و على ملابسه كتابه انه مسؤال عن التكاسي ، اطلبو منه التكسي او اذا بغيتو لموزين طويل ، و قولول له انكم بتروحون الي فندق الهيلتون ميترو تاون ( Metro town Hilton ) ، التكسي تكلفته في حدود 30 دولار كندي ، و مدت المشوار حدود 25 دقيقة اذا ما فيه زحمة.




    و الخريطه التالية بتوضح لكم الخط من المطار الي الفندق ، الفندق هو اللي عنده النجمة الحمرا و الخط الازرق المتعرج هو الطريق اللي بيمشي فيه التكسي من المطار.




    و هذا الخريطه توضح لكم الفندق بشكل اوضح ، موقع الفندق هو النجمة الحمرا.


    انا اتوقع انكم بتكونون طلعتو من المطار و في طريقكم للفندق حدود الساعة 1600 بتوقيت فانكوفير ، و يكون باقي على غرور الشمس حدود ساعتين الي ثلاث ، لذلك احرصو انكم تتفرجون على الطريق اللي بيمشي فيه التكسي لانه بيمر جمب بعض الغابات و نهر الفريزر ، و قبل الوصول للفندق بتلاحضون ان التكسي بدا يطلع ما يشبه طريق جبلي ، و السبب هو ان منطقة الفندق فوق هضبه مرتفعة عن باقي برنبي و فانكوفير. و انشاءالله ما يكون الجو ممطر عشان ما يفوتكم ولو جزء بسيط من جمال فانكوفير.

    اول ما توصولون للفندق و تستلمون الغرفة حقتكم ، اكيد بتريحون شوي من مشوار الطريق و بتاخذون لكم دش و بتتعرفون على غرفتكم و تتفرجون على المناظر اللي تطل عليها شبابيك غرفتكم.




    هذي صوره خارجية للفندق.


    انا تعمدت اختار لكم هذا الفندق لانه اولاً جديد ( مبنى من حوالي 4 سنوات ) ، و لانه يقع في منطقه حلوه و هادية و استراتيجية ، الفندق جمبه كل شي ممكن يحتاج له الشخص.
    الفندق 4 نجوم و يكلف حدود 400 ريال سعودي في اليوم.


    بعد ما تريحون لكم حدود 3 ساعات في غرفة الفندق ، اكيد بتكونو جايعين و ودكم تاكلون شي زين.
    انا ارشح لكم مطعم تايلندي ( انا ناسي اسمه ) ، لان اكله جداً لذيذ و لانه اول مطعم اكلت فيه اول مره زرت فانكوفير عام 1994 ، و ميزت المطعم انه خلف الفندق مباشره على شارع كنقز وي ( Kings Way ) ولا ياخذ منكم اكثر من 3 دقايق مشي.




    الخريطة توضح الطريق للمطعم ، اتبعو الخط الازرق ، و النجمة الحمرا هي الفندق.







    اضغط هنا


    التعديل الأخير تم بواسطة ابن الخضراء ; 2019-01-17 الساعة 12:03 AM

  2. #2
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    رغم ان شهر 5 في فانكوفير هو منتصف فصل الربيع الا ان الجو يكون في بعض الاحيان شوي بارد ، عشان كذا خذو معكم من ديرتكم جكيت واحد خفيف و يفضل يكون مقاوم للموية عشان المطر.
    في المطعم اوصيكم تاخذون كمقبيلات لحم تايلندي مشوي زي الكباب و يجي على عصيان صغيره و يكون معه صحن صغير من زبدت الفول السوداني و المطبوخ بطريقة خاصه كمقدمة للاكل ( ابتايزر) ، بعد كذا اطلبو لكم شوربة الربيان الحاره التوم يوم قوونق ( Tom Yum Goong ) ، و اذا تحبون الاكل الحار اطلبو منهم ما يحطون فيها فلفل.

    بعد كذا اطلبو الطبق الرئيسي المفضل عندهم و اللي ما تلقونه عند احد غيرهم و هو طبق مشكل من الماكولات البحريه بالخضار ( Seafood platter ) ، شي يجنن شي خطير ، طبعاً الاكله تجي حاره بالفلفل ، بس انتم ممكن تقولون لهم يقللون كمية الفلفل او ما يحطونه بالمره. و اطلبو مع الاكله اطلبو رز ابيض او رز مقلي مع الخضار ( فرايد رايس).

    و اذا ما تحبون الاكل البحري ، عندهم تشكيله كبيره من الاكلات الثانية.

    العشاء بيكلف حدود 50 دولار كندي لشخصين.


    بعد ما تخلصون من العشاء و تشبعون ارجعو للفندق و نامو لانكم اكيد تعبانين من المشوار.


    اما اذا فيكم بعد بعض النشاط ، ممكن انكم تمشون للسوبر ماركت الكبير اللي جمب الفندق و تشوفون اذا انتم محتاجين بعض الاغراض لغرفتكم او لكم في الفندق (تراني نسيت اسم السوبر ماركت).

    طبعاً انا حرصت انكم تروحون للسوبر ماركت و تشوفونه عشان تشوفون الفرق بينها و بين اللي عندنا في السعودية ، بس يا خوفي معاد تطبون سوبر ماركتات السعودية عقب ما تمرون هذي.

    قبل ما انساء ترا السوبر ماركت هذا اللي قلت لكم عليه صغير بالمقارنه بواحد ثاني كبير في مجمع الاسواق اللي جمب الفندق.




    الخريطة توضح طريقة الوصول للسوبرماركت من المطعم التايلندي ، الشارع اللي يودي للسوبر ماركت من المطعم التايلندي ما يضهر على الخريطه ، انتم امشو مع الخط الازرق و اول شي بتشوفونه هو مطعم الريد روبن ( Red Robin )
    و هو المربع الازرق في الخريطة ، وجمب المطعم ممر للمشي بعدين يجي محل ستار بكس (المربع الاخضر) و جمب الستاربكس يجي مطعم يوناني صغير يبيع الشاورمة و بعض المشويات ( المربع البنفسجي) و بعده يجي كم محل صغير ، بعدين يجيكم السوبر ماركت ( المربع الاسود) ، و جمب السوبر ماركت فيه مطعم الاكلات السريعة اي اند دبليو ( A & W ).

    مع العم انه للمطعم التايلندي باب خلفي يطلع مباشرة على مواقف السيارات المقابلة للسوبرماركت.


    اليوم الثاني من الوصول لفانكوفير:

    اول ما تصبحون اما افطور في مطعم الفندق او اطلبو فطور في غرفتكم ، و احرصو انكم تقولون اهم انكم ما تبون لحم خنزير في الاكل ( قولو لهم : نو بورك اور هام).

    بعد كذا اذا تبون تستاجرون سياره اتصلو على احد شركات تاجير السيارات التالية و قولو لهم انكم ساكنين في فندق الميترو تاون هيلتون ( Metro Town Hilton )في مدينة برنبي ( Burnaby ).

    اسعار السيارات تختلف حسب النوع و مدت التاجير ، لكن اذا اخذتم مثلن سياره فورد توريس بالنضام الاسبوعي ( تاجير السيارات يومي او اسبوعي او شهري ) بيكون السعر بدون الضريبة و التامين في حدود 250 دولار ، يضاف اليها 14% ضريبة و 10% تامين شامل ( طبعاً السيارات تعرض عليك بدون تامين لان الكنديين و حسب وثيقة التامين الخاصه بسياراتهم ممكن يغطون تامين سيارة الاجار تحت وثيقة التامين الخاصه بسياراتهم الشخصية ).

    يعني السيارة بتطلع بحدود 300 دولار كندي في الاسبوع ( حدود 900 ريال سعودي).
    طبعاً عشان تستاجرون سيارة لازم يكون معكم بطاقة ائتمان و تكون معكم اما رخصة دولية او تكون رخصتكم مترجمة باللغة الانجليزية.

    و هذي ارقام تلفون بعض الشركات:

    -) ناشونال لتاجير السيارات ( National ) : رقم تلفونهم ( 8002277368 ).
    -) ثرفتي لتاجير السيارات ( Thrifty ) : رقم تلفونهم ( 8008474389 ).
    -) بدجت لتاجير السيارات ( Budget ) : رقم تلفونهم ( 8002688900 ).
    -) ديسكاونت لتاجير السيارات ( Discount ) : رقم تلفونهم ( 8777428787 ).

    حقين شركة التاجير بيجون الين عندكم و ياخذونكم الي مكتب التاجير و يخلصون اجرات التاجير و يعطونكم السيارة ، طبعاً المشكلة الان هي في رجعتكم الي الفندق من مكتب التاجير ، اللي منكم يقول انه دلوله و يقدر يعرف طريق الرجعة من التركيز على الطرق اللي هو يمشي معها الي مكتب التاجير او بامكانه يطلب من مكتب التاجير يبيعه خريطة للمدينة او يشتريها من احد محطات البنزين اللي يمر عليها.

    و اللي من النوع القلق و يخاف انه يضيع ، يفضل انه ياجل موضوع استأجار السياره الي بعد المرور على مجمع اسواق الميترو تاون اللي جمب الفندق ، لانه في المجمع بيلقاء محل يبيع خرايط و ممكن يشتري منه خريطة.

    اذا جت الساعة 10 الصباح و كنتم قررتو ما تستاجرون السيارة الا بعد ما تشترون الخريطة من سوق الميترو تاون ( انا افضل انكم ما تستاجرون السياره الا بعد ما تشترون الخريطة) ، فغيرو ملابسكم و البسو جزم مناسبة للمشي و توكلو على الله وروح لم السوق.




    الخريطة توضح طريقة الوصول الي المدخل الاول للسوق ، اذا طلعتو من باب الفندق لفو يسار مع الخط الازرق الين توصلون الي تقاطع الطرق ، بعدين لفو يمين من عند المطعم التايلندي و امشو على طول ، بيجيكم مطعم الريد روبن على يمينكم و بعده بيجيكم مطعم بوسطون بيزا و جمبة بيجيكم محل او مطعم ( المحل هذا تغير اكثر من مره ولا ادري وشو الجين) ، بعد ما تعدون المحل هذا بيجيكم درجة صغيره ، اطلعو معها و بيجيكم مبني طويل على اليمين امشو جمبة الين يجيكم مدخل السوق. الممشاء كله من الفندق الين مدخل السوق بياخذ منكم حدود 5 دقايق.




    من الخريطة اول ما تدخلون السوق بيجيكم محل ادوات رياضية على اليسار و سوبر ماركت كبير على اليمين ، السوبر ماركت اسمهذا كنيديان سوبر ستور ( The Canadian Super Store ) مقابل السوبر ماركت فيه زي البقالة الصغيره و عندهم جميع انواع و اشكال الخرايط لمدينة فانكوفير و لكل كندا ، احرصو انكم تشترون الخريطة اللي على شكل كتاب اللي اوراقه بحجم اوراق التصوير A4.

    جمب البقالة هذي بتحصلون بنك و مكائن صرف اذا كنتم محتاجين تسحبون من حسابكم في السعودية.

    بعد ما تشترون الخريطة تمشو في السوق بس انتبهو لا تضيعون ، ولا اقول اكيد بتضيعون عشان كذا تذكرو انكم دخلتو مع الباب اللي جمب سوبر ماركت الكنيديان سوبر ستور ( اذا بغيتو تقولون اسم السوبر ماركت قولو سوبر ستور مندون ما تقولون كلمة كنيديا) طبعاً هذا اذا ضعتو و احتجتو ترجعون لم الباب اللي دخلتم معه.

    سوق الميترو تاون ( Metro Town ) هذا هو اكبر سوق في فانكوفير و في مقاطعة برتش كلومبيا ، فيه حوالي 460 محل من كل شكل و نوع ، فيه محلات ماركات عالمية مثل:

    Swatch
    Avanti
    Bentley Leather
    Mayfair
    Gap Kids
    Jacob Jr.
    Sears
    The Bay
    Zellers
    The Body Shop
    GNC General Nutrition
    Aldo
    Bata Shoes
    Nine West
    Club Monaco
    Costa Blanca
    Danier Leather
    Esprit
    Gap
    Guess?
    Roots
    Tommy Hilfiger
    Zara
    La Senza
    Fairweather
    Mariposa


    انا اشور عليكم انكم ما تتقضون او تشترون شي غير ضروري من السوق ، لانها بتثقل عليكم من غير داعي ، الا اذا كنتم بتشترون جكيتات خفيفه عشان البرد الخفيف و المطر.

    بعد ما تخلصون من الدوران في السوق ممكن انكم تتغدون في صالة المطاعم ( الفود كورت ) الموجود في السوق ( ترا فيه 2 فود كورت) او انكم تتغدون في احد مطاعم السوق الكثرة او اذا بتاخدون شور ، تغدو في مطعم الريد روبن ( Red Robn ) اللي كان في الطريق من الفندق الي السوق.



    ( يتبـــــع)

  3. #3
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    اذا قررتو تتغدون في مطعم الريد روبن انا اشور عليكم بالاكل التالي:

    مزمزو لكم كمقبلات على اجنحة دجاج حاره اسمها بزرد وينقز ( BUZZARD WINGS ) ، الاجنحة يقدمونها مع صحن صغير من الجبنة الزرقاء ( ترا الجبن ماهو ازرق اسمه بس كذا) و بتدعون للي لانها اخطر اجنحة ذقتها في حياتي.

    بعد كذا اذا تحبون البرقرات ( المطعم عنده تشكيله واسعه من البرقرات الخطيره) و كنتم جوعانين اطلبوالمونستير برقر ( MONSTER BURGER ) ، و هي مكونه من طبقتين من لحم البقر المفروم مع الجبنة الذايبه و الخس و الطمامط و الخيار المخلل بالاضافة للميونيز .

    او جربو شرايح فيلية الدجاج مع البطاطس و ركزو على البطاطس حقهم ياهو بطاطس ولا في الاحلام ، اسم الاكله كلوكس اند فرايز ( CLUCKS & FRIES ) ، و قولو لهم انكم تبون الوجبة و ليس الابتايزر.

    و اذا تبون شوربه جربو شوربة الكلام شاودر ( CLAM CHOWDER ).

    و اذا تبون سلطة لا تفوتكم سلطة السيزر حقتهم.

    سعر الاكلات هذي لشخصين في حدود 40 دولار كندي.


    بعد ما تخلصون من الاكل ارجعو للفندق ، بعد كذا اما ريحو و اتصلو على شركات تاجير السيارات او اجلو الموضوع الي ثانب يوم ، لان اليوم هذا قرب ينتهي و حرام ياخذون منكم اجار سياره على اليوم و هو ما كمل .
    اذا قررتو ما تستاجرون السياره انا اشور عليكم تمشون للحديقة القريبة من الفندق و اسمها السنترل بارك ( Central Park ).




    الخريطه توضح طريقة الوصول للحديقة من الفندق ، انتم اتبعو الخط الازرق.


    الحديقة هي احد اكبر الحدايق في فانكوفير ، هي عباره عن غابه فيها بحيرات و اشجار و ورود من مختلف الاشكال ، فيها ايضاً ملاعب تنس و سلة.

    و انتم في الحديقة لا تستحون تقطفون الكرز الاحمر او الازرق من اشجار الكرز الموجوده في الحيقة بكثره.
    المشوار من الفندق الي الحديقة في حدود 10 دقايق.

    التمشية في الحديقة و التمتع بطبيعتها الخلابة بياخذ منكم حدود ساعتين ، بعدها ارجعو للفندق قبل ما تغرب الشمس ( الشمس تغرب في شهر خمسه حدود الساعة 6 او 7 مساً).

    اذا رجعتو للفندق ممكن انكم تقضون باقي اليوم في الفندق تتفرجون على التلفزيون او ممكن تسوون زيي و ترجعون للسينماء حقة السوق و تشوفون لكم فلم.

    السوق فيه مجمعين للسينماء ، الاول مقابل الفندق على طول بس السينماء هذي صغيره و قديمة ، او ممكن تروحون للسينماء الكبيره و الجديده و اسمها سلفر ستي ( Silver City ).




    الخريطة توضح موقع السينماء الصغيره ، اتبعو الخط الازرق ، و في النهائة بيجيكم مدخلين على شكل درج حديدية طويلة توديكم للدور الثاني.


    جمب السينماء الصغيره فيه محل كبير للالكترونيات اسمة ذي فيوتشر شاوب ( The Future Shop )، اذا كنتم من محبي التجهيزات و الاجهزه الالكترونية ، لا يفوتكم المحل هذا لان فيه اشياء ما عمركم شفتوها.




    الخريطة توضح طريقة الوصول للسينماء الكبيره الموجوده جوا السوق ، انتم اتبعو الخط الازرق ، اول ما تدخلون مع الباب و اصعدو مع الدرج اللي تجيكم على اليمين للدور الثاني ، اذا وصلتو للدور الثاني لفو يمين و بيجيكم مطعم تي جي اي فرايديز ( T.G.I. Friday`s ) قدام المطعم على طول درج متحركة توديكم للدور الثالث و للسينماء .

    تنقو الفلم اللي تبونه و اشترو التذكره حقته ، اذا كان باقي على الفلم وقت قبل ما يبدا ممكن تنزلون للدور الثاني و تخلون مطعم فرايديز على يمينكم و تمشون قدام الين يجيكم محل العاب الكترونية ( اركيد ) ، اسم المحل بليديوم ( Pladeom ) ، المحل هذا فيه العاب الكترونية من كل شكل و نوع ، انا ما عمري شفت اركيد فيه العاب بكثر المحل هذا ، هو مكون من دورين و كل دور فيه العاب ، اذا تبون تلعبون بالالعاب اشترو من عند الكاونترات اللي في المدخل كرت يسمح لكم بالعب ، طبعاً سعر الكرت يعتمد على عدد المرات اللي بتلعبون فيها.

    و لا تقولون انكم منتم بزران و ان الالعاب ماهي جايزه لكم ، انتم ادخلو المحل و اذا شفتو الالعاب بتحسدون البزران و بتصيرون زيهم.

    عقب ما تخلصون من الفلم اكيد بتكونون جوعانين ، مرو على مطعم فرايديز و كلو اللي انتم تبونه ، و ترا لحم الستيك البقري عندهم زين و ما يفوت.

    و اذا تبون رائي في وش تاكلون :




    عشان ما تختلفون على نوع المقبلات خذولكم صحن مقبلات مشكل سمه ثري فور ال ( THREE-FOR-ALL ) ، و يتكون من البطاطس و جبنة الموزريلا المقلية و اجنحة الدجاج الحاره .




    و اذا تبون سلطة جربو سلطة دجاج سانتا في ( SANTA FE CHICKEN SALAD ).


    اما بانسبة للوجبة الرئيسية فيعتمد على رغبتكم.




    فيه باستا (مكرونة) كاجونا الدجاج و الربيان ( CAJUN SHRIMP & CHICKEN PASTA ).




    و فية الربيان المشوي ( SIZZLING SHRIMP ).




    و فيه المفضل بالنسبة للي الجاك دانيلز ستيك ( JACK DANIEL'S STEAK ).


    بعد كذا عاد ارجعو للفندق و نامو نومة العوافي.

  4. #4
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643



    اليوم الثالث من الوصول لفانكوفير



    اذا اصبحتو الصبح و بعد ما تخلصون من موضوع سيارة التأجير ، ممكن انكم ترجعون للسوق حق الميترو تاون و تتقضون لكم شوي ، لان السيارة معكم ولا عندكم مشكله في شيل الاغراض.

    و عشان ما تتوهقون مع الشرطة في ما يخص نضام و قوانين قيادة السيارات في فانكوفير هذي بعض المعلومات العامة:

    - اغلب شوارع فانكوفير لازم تدفع فلوس مقابل الوقوف فيها. وسعر الوقوف يختلف من شارع الي اخر.

    - ما بين الساعة 6 الي 9 الصباح و ما بين الساعة 3 الي 6 بعد الظهر من يوم الاثنين الي يوم الجمعة من كل اسبوع يكون وقوف السيارات ممنوع في اغلب الشوارع و بالذات في وسط المدينة حتي لو كنت دافع فلوس مقابل الوقوف ، واذا نسيت توخر سيارتك من الطريق اللي فية الوقوف ممنوع في الاوقات هذي الله يعينك على المخالفة والله يعينك تروح لم الشركة الي سحبت سيارتك و تدفع لهم قيمة السحب.

    - في مواقف السيارات الجانبية اللي ما تكون على الطرق الرئسية يمنع الوقوف فيها بعد الساعة 12 بالليل الي الساعة 6 الصباح.

    - قبل ما توقف سيارتك في اي مكان اقراء اللوحات وتاكد انه ممكن توقف سيارتك و الاوقات الي ممكن توقف فيها.

    - في وسط المدينة من الصعب جداً انك تحصل موقف للسياره و اذا حصلت موقف فهو في العاده غالي.

    - لازم تعرف ان الدوران للخلف بالسيارة ممنوع منع بات واذا ديورت ممكن تاخذ مخالفة ، اذا احتجت تديور ادخل احد الحارات وديور و ارجع للخط الي انت تبية.

    - اذا و وصلت الي تقاطع رائيسي او فرعي ولا فية اشارة فعرف ان اول واحد يوصل للتقاطع هو اول واحد يعدي التقاطع.

    - اذا كنت تمشي في خط مكون من اكثر من مسار وفجاة واحد من المسارات كان مسدود وحبيت تغير مسارك بعد ما توقف فعرف ان السيارات تبي توقف لك عشان تعدي ونت لازم تسوي زيهم.

    - اقصي سرعة للسيارة في الشوارع اللي ما فيها لوحات تحدد السرعة هو 50 كم في الساعة ، و اذا تعديت السرعة هذي بتاخذ مخالفة وقيمة المخالفة تعتمد على سرعتك عندما يصيدونك.

    - اقصي سرعة للسيارة في المناطق الي تكون حول المدارس هي 30 كم في الساعة اوقات الدراسة الرسمية.


    اما بالنسبة للفطور فنتم ممكن تفطرون في الفندق.
    او روحو لمطعم الفطور المفضل بالنسبة لي و هو مطعم اي هوب ( I HOP ).
    قايمة الفطور عندهم طويلة بس افضل ما عندهم هو البان كيك بجميع انوعة بالاضافة الي تشكيلة واسعة من بيض الاومليت.




    اتبعو الخط الازرق من الفندق و بيوديكم مباشرة الي المطعم


    بعد ما تخلصون من الفطور جهزو اموركم و خذو معكم الكميره حقتكم و توجهو الي حديقة بحيرة الغزال ، دير ليك ( Deer Lake )




    اتبعو الخط الازرق من الفندق.


    الحديقة لها مدخلين الاول كما هو موضح في الخريطة يؤادي الي المدخل الرئيسي للحديقة ، عند المدخل الرئيسي هذا بتحصلون مبني فيه صور و معلومات كاملة عن الحديقة.
    ممكن تتجولون في المنطقة المحيطة بالمبني او تتجهون الي البحيرة عبر الممرات التي تمر بين اشجارالحديقة.



    هذي صوره للمدخل الرئيسي للحديقة.




    هذي صورة المبني الموجود في الحديقة.




    هذا الممر المؤدي للبحيرة.


    او ممكن تركبون سيارتكم و تروحون مباشرة الي البحيرة.




    اتبعو الخط الازرق للبحيرة.


    المخل المؤدي للبحيرة يمر عبر حي سكني ، عشان كذا لا تستغربون رؤية البيوت قطع الشارع من البحيرة.





    هذي صور من البحيرة.


    في الحديقة بتستمتعون بمشاهدة اشجار من كل شكل ولون بالاضافة الي الحيونات الصغيرة ، و الطيور مثل البط و الاوز في البحيرة.

    عند البحيرة نفسها ممكن تستاجرون لكم قارب صغير و تجدفون عليه في انحاء البحيره.
    طبعاً ممكن تصيدون سمك اذا حبيتو بس لازم يكون عندكم تصريح لصيد السمك من بلدية فانكوفير.
    و ممكن انكم تجيبون معكم فحم و بعض اللحوم و تشوون عند طرف البحيرة.

    بعد ما تخلصون من التجوا في المنتزه ارجعو لم سيارتكم و توجهو الي حديقة بحيرة برنبي ( Burnaby Leek ).





    اتبعو الخط الازرق و بيوديكم من منتزة الدير ليك الي منتزة نهر برنبي.






    هذي صور من منتزة نهر برنبي.

    المنتزه اكبر بكثير من منتزة الدير ليك ، البحيرة فبه على شكل نهر طويل ، ممكن تتمشون بين الاشجار و على ضفاف البحيرة عبر الممرات المخصصه للمشي ، مسافة الممشاء عبر الممرات و حول البحيرة في حدود 4 كم ، في المنتزة ممكن تستاجرون قارب و تجدفون علية داخل البحيرة او ممكن تستاجرون لكم خيول و تتمشون عليها في المنتزة ، و ممكن طبعاً تشوون في المنتزة.

    في بعض ايام نهاية الاسبوع يكون فيه سباقات تجديف قوارب بين فرق مختلفة في مدينة فانكوفير ، المنتزه بتلقون فيه المقر الرئيسي لنادي التجديف في مدينة برنبي.


    بعد ما تتمشون في المنتزهين و تتمتعون بطبيعتها الخلابة اكيد بتكونون جعتو من كثر المشي ، تعالو معي الان خلوني اعشيكم على حسابكم في واحد من افضل المطاعم الايطالية في مدينة فانكوفير ، المطعم اسمة انتونز ( Anton’s )، و يقع على شارع هيستنق الشرقي مقابل المرفأ البحري لمدينة فانكوفير.




    اتبعو الخط الازرق من منتزة بحيرة برنبي للمطعم.


    المطعم بيجيكم على اليسار اول ما تاصلون عند اخر ملف يسار ، طبعاً لانه ممنوع تديورون في وسط الخط دور لكم على حاره على اليمين او اليسار و ديورو معها و ارجعو للخط اللي علية المطعم ، الشارع اللي علية المطعم ممنوع الوقوف فية ايام الاسبوع من الاثنين الي الجمعة ما بين الساعة 1500 الي 1800 ، فا اذا رحتو للمطعم في الاوقات المذكوره وقفو سيارتكم في الحاره اللي خلف المطعم و ادخلو مع باب المطعم الخلفي.

    المطعم فية قايمة طويلة من كل ما لذ و طاب من الماكولات الايطالية.

    و اذا بتاخذون شوري في الاكل، فخذو التالي:

    اول ما تجلسون في المطعم بيجيبون لكم خبز ايطالي حار و طازج مع الزبده ، و هذا يكون بالمجان.

    خذو لكم سلطة سيزر او سلطة انتونز (سعر السلطة الوحده 7 دولار).

    و اذا تبون شوربة اطلبو شوربة المينستروني ( Minestrone )، و هي عباره عن شوربة خضار خفيفة ( سعر الشوربة 5 دولار)


    اما بالنسبة للطبق الرئيسي فيعتمد على نوع الصلصة اللي تحبونها.

    اذا تحبون الصلصة الحمرا بقطع لحم البقر المفروم ، اطلبو لنقويني بولانيز ( Linguine Bolognese ).
    ( سعر الطبق 9 دولار).

    اما اذا تحبون صلصة الاكلات البحرية فطلبو الفوتاتشينو فروتي دي ماري ( Fettuccine Frutti di Mare )
    وهي خليط من ثمار البحر مع الفطر.
    ( سعر الطبق 10 دولار)

    و اذا تحبون الصلصة البيضا فطلبو الفوتاتشينو الفريدو ( Fettuccine Alfredo ).
    لكن اطلبو منهم يبدلون لكم الهام (لحم الخنزير) بالدجاج او لحم البقر او حتي بربيان اذا بغيتو.
    الطبق مكون من صلصة جبنة البرميزان البيضا مع اللحم اللي تختارونه.
    ( سعر الطبق 9 دولار)

    احرصو اذا رحتو للمطعم تروحون له قبل الساعة 1800 لانه بعد كذا بيكون مليان و بتضطرون تمسكون سرا الين تفضا طاولة ، مع العلم ان المطعم ما يستقبل الحجز المسبق.

    اذا خلصتو من المطعم ارجعو للفندق و عاد اما نامو او روحو للسينما او مرو السوق و تسوقو.



    الخط الازرق هو الطريق من المطعم للفندق ، مع العلم بانكم تتجهون جنوب ، و اذا ما عرفتو وين الجنوب ، فالجبل الكبير هو في شمال فانكوفير ، يعني خلو الجبل خلفكم و انتم تمشون.



    ( يتبــــــــع )

  5. #5
    كبار شخصيات سفاري الصورة الرمزية محمد الشرقاوى
    تاريخ التسجيل
    May 2005
    الدولة
    مــالـيــزيـا
    المشاركات
    1,842

    انت رائع دائما عزيزى اسبرانزا

    ما شاء الله عليك مواضيعك كلها دسمة

    خالص التحية لك من الشرقاوى

  6. #6
    مسافر مشارك
    تاريخ التسجيل
    Jun 2005
    المشاركات
    182

    رااااااااائع في وصفك

    عيشتنا في الجو

    كاننا نحن اللي كنا هناك

    يعطيك الف عافيه

  7. #7
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    محمد الشرقاوي
    عصفوره

    مشكورين على تشريفكم الموضوع بمشاركاتكم الكريمة

    لكم اجمل تحية

  8. #8
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643



    اليوم الرابع من الوصول الي فانكوفير:


    الفطور اليوم هو من اختياركم ، يعني ممكن ترجعون الي مطعم اي هوب او تفطرون في الفندق او ما تفطرون بالمره.

    المهم بعد ما تقررون وش بتسوون في الفطور جهزو حالكم و خذو معكم كميرتكم و لاتنسون تلبيون ملابس مريحة و جزم مريحة للمشي.

    اباخذكم اليوم الي اجمل و اروع حديقة ( منتزة ) في مدينة فانكوفير ، اباخذكم الي حديقة الملكة الزبيث ( Queen Elizabeth Park ).




    اتبعو الخط الازرق من الفندق الي المنتزة.


    و لان الطريق من الفندق الي المنتزة طويل ، هذا وصف تفصيلي للطريق:

    -) لين طلعتو من مواقف الفندق الموجوده تحته لفو يمين على شارع كنقز بوروه ( Kingsborough St )

    -) بعد ما تلفون يمين على الشارع السابق و بعد حوالي 100 متر بيجيكم شارع ولنقدون ( Willingdon Ave )
    لفو يسار مع الشارع ، اول ما تلفون مع الشارع بيجيكم اشارة تحت الجسر الخاص بالقطار الكهربائي ، بعد ما تتعدون الاشارة المرورية بحوالي 3 كيلومتر بيجيكم اشاره ثانية ، لفو معها يمين على شارع امبيريال ( Imperial St ) ( بتلاحضون عند التقاطع على يمينكم نهائة حديقة السنترال)

    -) اثنا مشيكم على شارع امبيريال بتلاحضون حديقة السنترال ، بعد كذا بتجيكم اشارة مرورية ، تعدو الاشارة و خلوكم ماشين في طريقكم نفسة ، شارع الامبيريال اللي انتم علية بيتغير اسمه الي شارع 49 شرق ( E 49 St ).
    و انتم على الشارع بتلاحضون انه ينحني بشكل بسيط نحو اليمين ، استمرو في المشي علية.

    -) استمرو في مشيكم على الشارع نفسة الين تجيكم اشارة مرورية على تقاطع شارع 49 شرق مع شارع مين
    ( Main St ). قبل ما توصولون للتقاطع هذا بتكونون تجاوزتو حوالي 5 اشارات مرورية من اخر اشارة ذكرتها لكم ( طبعاً هذا ما يشمل الاشارات المرورية الخاصة بالمشاة.
    عند اشارة شارع مين لفو يمين.

    -) امشو على شارع مين الين تجيكم اشارة مرورية على تقاطع شارع 41 شرق ، تعدو الاشارة هذي الين تجيكم اشارة شارع 33 شرق ، عند الاشارة هذي لفو يسار ، و بكذا تكونون وصلتو لمنتزة الملكة الزبيث.




    هذي خريطة المنتزة.


    اذا دخلتو المنتزة امشو الين تجيكم مواقف السيارات ، في داخل المنتزة بتطير عقولكم من جمالة الخلاب ، فية حدايق زهور منتم شايفين زيها في عمركم كله ، و بحيرة ماء مليانة طيور من كل الاشكال و الانواع.
    في قلب المنتزة جبل عالي مليان اشجار من كل شكل ، اذا حبيتو امشو مع الممرات الخاصة بالمشاة و اصعدو الجبل الي قمته ، الجبل هو اعلى نقطه في الجزء الغربي و الشرقي لمدينة فانكوفير ، اذا صعدتو الي قمة الجبل بتقدرون تشوفون اغلب اجزاء فانكوفير.












    هذي بعض الصور للمنتزة.



    المنتزة فيه كل انواع الاشجار و النبتات و الزهور اللي تنمو في جميع ارجاء كندا.

    لا تنسون تصورون كثر ما تقدرون لاني متاكد انكم منتم ناسين اي شي تشوفونه.

    ايضاً في داخل المنتزه يوجد مبني كبير على شكل قبة زجاجية ، روحو للقبة و ادفعو دولار واحد للشخص و تمشو بين الاشجار و الطيور ، القبة هذب في داخلها اشجار و نباتات و زهور ما تنمو الا في المناطق الاستوائة ، عشان كذا بتلاحضون الرطوبة و الحراره العالية شوي داخل المبني هذا.

    عند باب المبني الزجاجي و حوالية بتلقون ناس يبيعون التحف المنوعة و بتلقون ناس قاعدين اذا حبيتو ممكن يرسمون لكم اشكالكم بالاقلام الرصاصية في خلال 10 دقايق.

    التمشية داخل المنتزة بتاخذ منكم حدود 4 ساعات ، بعد كذا ممكن تروحون للمطعم الموجود في المنتزه و تستريحون و اذا كنتم جوعانين ممكن تتغدون فية.
    اذا كان الجو زين ولا فيه امطار احرصو انكم في المطعم تجلسون في البلكونة اللي تطل على المنتزة ، بتدخلون في جو رومنسي ما فية زيه و بتدعون للي.

    بعد كل التمشية هذي اكيد بتكونون تعبتو ، ممكن ترجعون للفندق و ترتاحون.

    اما اذا فيكم حيل تتمشون زود ممكن تروحون لم سوق اوكريج ( Oakridge Centre ).




    اتبعو الخط الازرق من المنتزة للسوق ، المسافة ما تتعدا كم دقيقة.



    السوق يتكون من دورين و فيه حدود 150 محل ، السوق صغير مقارنه بالمترو تاون ، لكن فيه شي ماهو في سوق الميترو تاون ، فيه محلات مجهورات و تحف من البلور تاخذ العقل ، انا ما عمري شفت على كثر ما ادور اسواق المجوهرات شي زي الي شفته في السوق هذا. يا ناس عندهم مجوهرات خيال ولا في الاحلام ، ولا تحف البلور و الزجاج يافيها تفنن ماهو في الدنيا هذي.

    اهم شي و انتم في السوق لا تنسون تشترون الفشار اللي بمذاقات مختلفة ، و ركزو على الفشار الحار.




    هذي صوره للسوق من الجو.




    و هذي صوره ثانية للسوق من الجو ، و لاحضو منتزة الملكة الزبيث في الزاوية اليمين فوق.


    ( يتبــــــــع )

  9. #9
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    اليوم الخامس من الوصول لفانكوفير



    اليوم اباخذكم معي في مشوار طويل شوي ، بس يستاهل.

    بعد ما تفطرون في الفندق او في احد المطاعم القريبة منه و اللي ذكرتها من قبل ، جهزو نفسكم ولا تنسون الكميرة حقتكم و امشو معي:


    جسر كابيلانو المعلق
    Capilano Suspension Bridge




    و الان اتبوع خرايط الطرق التالية عشان توصلون للمنتزة اللي فيه الجسر:
    الجسر موجود في شمال فانكوفير.





    اتبعو الخط الازرق ، لمن تطلعون من الفندق لفو يمين على شارع ويلنقدون (Willingdon Ave)





    من اول ما تبدون تمشون على شارع ويلنقدون بيجيكم 4 اشارات مرورية ( هذا ما يشمل اشلرات المشاة) ، بعد الاشارة الرابعه بيجيكم جسر و تحتة طرق سريع ، لفو يسار و امشو مع الطريق السريع هذا.





    هذي صورة للتقاطع ، بيجيكم ملفين على اليسار الاول يوديكم في الاتجاه المعاكس و هذا ما نبية ، و الثاني هو المطلوب ، لفو معه يسار ، حسب ما هو موضح بالخط الازرق (الخطوط الحمراء هي الخط السريع).





    ابتلو ماشين مع الخط السريع ، الخط السريع بيمشي بكم فوق جسر البوندري اللي يعبر فوق مضيق خليج فانكوفير ، و بتشوفون البحر على يمينكم و يساركم ، بعد ما تعبرون الجسر بيبدا الخط بالصعود على شكل خفيف ، استمرو بالمشي علية. و انتم على الخط بيجيكم مخرج على اليمين يوديكم الي شارع كابيلانو (Capilano Rd)





    اطلعو مع المخرج و ابدو في السير على شارع كابيلانو ، الخط بيبدا يصعد جبل بشكل واضح.



    و هذي بعض الصور من الجسر.











    الصوره الاخيرة هي لنهر كابيلانو من على الجسر.


    و هو عبارة عن جسر خشبي معلق بين قمتى جبلين ، الجسر مثبت بوايرات حديدية سميكة و ارضيته مصنوعة من الواح خشبية. الجسر يعد واحد من اهو المعالم السياحية في فانكوفير.

    من على ظهر الجسر الشخص بيشوف نهر كابيلانو اسفله و هو على ارتفاع ما يقارب 200 متر ، بالاضافة الي النهر و من على ظهر الجسر بتشوفون الاشجار الخضراء المنتشرة في كل محل و الغابات الكثيفة.

    عبور الجسر ممكن يكون مخيف شوي لاصحاب القلوب الرهيفة ( الخوافين) لانه يبدا يتحرك و يهتز على خفيف لمن تمشون عليه ، لكن اذا قدرتو تمشون الي نهاية الجسر و وصلتو للطرف الاخر ، فالمكافاءه اللي تنتضركم هي غابات مطرية في منتهاء الروعة و الجمال.

    ايضاً يوجد في منتزة الجسر محل تحف عنده اشيا بصراحة تاخذ العقل من المنحوتات الخشبية و الفخار و الزجاج الملون ، لا تفوتكم البلورات الزجاجية اللي على شكل بطة ، و تكفون اللي يروح للجسر يشتري لي وحده لان نفسي فيها الي الان ( انا كنت شريت وحده و للاسف ضاعت مع عفشي على الخطوط السعودية). بس تراها غالية شوي ، يعني في حدود 200 الي 900 دولار.

    لمن توصلون للطرف الثاني من الجسر و تدخلون جوا الغابات المطرية ، بتحصلون جسور معلقة صغيرة ممدوده بين راؤس الاشجار الطويلة ، فيه زي الدرج تطلعكم للجسور هذي ، و اذا مشيتو فوقها بتكونون فوق راؤس الاشجار و بتشوفون الغابات اسفل منكم على ارتفاع يقارب 30 متر.

    المشي من فوق الجسور هذي و بكل بساطة بياخذ انفاسكم.

    اذ حبيتو تتغدون او تاكلون لكم شي خفيف في المنتزة ، مرو على احد المطعمين الموجودة فيه.

    و ترا الدخول للمنتزة حق الجسر بحدود 5 دولار.



    جبل قروس
    Grouse Mountain



    بعد ما تنتهون من التجول في جسر كابيلانو ، اركبو سيارتكم و توجهو الي جبل قروس ، الجبل قريب من موقع جسر كابيلانو و على امتداد نفس الخط ، استمرو في السير الين يتهي الخط بتجيكم مواقف سيارات ، وقفو فيها و روحو لم مكتب تذاكر التلفريك ، تذكرة التلفريك حدود 30 دولار كندي.

    الرحلة على التلفريك تستغرق حدود 15 دقيقة ، و من ظهر عربة التلفريك بتشوفون اغلب اجزء مدينة فانكوفير بتشوفون البحر و بتشوفون الانهار و البحيرات ، بختصار ال 15 دقيقة هذي بتكون رحلة العمر.







    عندما توصلون الي قمة جبل قروس بتحصلون مجموعة من المحلات اللي تبيع التحف و الملابس بالاضافة الي المطاعم.

    الجبل هو مخصص في الاصل للتزلج ، لذلك بتلاحضون ان فيه قمة ثانية صغيرة و جميع الاشجار المؤدية اليها مقطوعة و مزالة من الطريق.







    لكن لانكم بتروحون للجبل في الصيف منتم محصلين ثلج ، لكن جمال الطبيعة في اعلى الجبل بالاضلفة للمناظر لجميع المناطق المحيطة به و اللي تشوفونها من اطراف الجبل قمة في الروعة.

    و ممكن الواحد يمشي و يصعد الي قمة الثانية الموجوده على الجبل ، او تركبون ما يشبة الزلاجات اللي ترفعكم الي القمة هذي.







    و لمحبي المغامره ممكن انكم تاخذون رحلة على الهيلكبتر الموجوده في الجبل ، الهيلكبتر بتلفبكم على القمة و الوديان المجاوره لها بالاضافة الي اغلب اجزء شمال فانكوفير.







    و في طريق العوده من الجبل للفندق ممكن انكم تتعشون في اي مطعم على الطريق او في احد المطاعم القريبة منه .

    بكذا نكون انتهينا من اليوم الخامس للرحلة.

    ( اذا لم تظهر بعض الصور اعيدو تحديث الصفحه او قومو بوضع مواشر الفاره على الصوره ومن ثم اضغطو الزر الايمن للفاره و قومو باختيار اظهار الصوره)


    ( يتبـــــــع )

  10. #10
    ©؛°¨°؛©][مشرف سفاري الفلبين][©؛°¨°؛©
    تاريخ التسجيل
    Jun 2005
    المشاركات
    3,643

    اليوم السادس من الوصول لفانكوفير


    اليوم ابيكم تصحون بدري ، يعني حدود الساعة 8 الصباح لان وراكم مشوار طويل شوي ، اهم شي تاخذون معكم شوية ملابس لانكم اذا حبيتو ممكن تمرحون لمدة ليلة وحده في المكان اللي بوديكم لمة.


    بحيرة هيرسون
    Harrison Lake



    البحيرة هذي تبعد عن الفندق حوالي 130 كم و مشوارها حوالي ساعة و نصف بالسيارة ، طبعاً مسافة 130 كم ما تحتاج للمده هذي كلها لو انكم في السعودية و تمشون بسرعة على الخط ، لكن لان اقصي سرعة على الخط السريع اللي بتمشون عليه للبحيرة هو 90 كم في الساعة ، فالمدة تقريباً مناسبة. ولا تفكرون تتعدون السرعة هذي ولا صادتكم الشرطة و غرمتكم.

    بالنسبة للفطور لا تشيلون هم ، على الخط الكثير من المطاعم اللي ممكن توقفون في واحد منها و تفطرون فيه.






    اتبعو الخط الازرق من الفندق الي الخط السريع و سمة كندا هاوي ( ترا الطريق للخط السريع هو نفس الطريق اللي اختوه لمن رحتو لم شمال فانكوفير و الجسر المعلق) ، لمن توصلون للخط السريع روحو يمين ( اليسار يودي الي شمال فانكوفير).




    الخط الازرق هو الطريق من الفندق الي البحيرة.


    تفاصيل الطريق بالكامل تحصلونها على الرابط التالي:

    http://www................com/vb/sho...3322#post63322



    الطريق للبحيرة بيمر على قريتين هم ابتسفورد ( Abbotsford) و شيلواك (Chiliwack) ، البحيرة هي من اجمل الاماكن اللي انا زرتها في فانكوفير ، البحيره لمن توصلون لها بيبدو شكلها صغير من الشاطي حقها ، لكن اول ما تستجرون قارب و تبدون تتجولون فيه على ضفافها و بين الجبال المحيطه بها بتلاحضون انها كبيره بالفعل.

    في وسط البحيرة جزيرة اسمها جزيرة ايكو (Echo Island) و معناها بالعربي جزيرة الصدى و سميت بالاسم هذا بسب ارتداد الاصوات من على جانبها الغربي المقابل للجبال.

    البحيرة بحجمها الكبير و البالغ حوالي 70 كم تخترق الجبال المحيطه بها من اكثر من اتجاه.
    المياه في غالبها ماهي عميقة ولكن في بعض الاحيان يوصل عمقها الي اكثر من 1000 متر.

    لمن توصلون للقرية اللي تطل على البحيرة ممكن انكم تمضون يومكم فيها و تتمتعون بالتجول على شاطئ البحيرة و تستاجرون لكم قارب و تسوقونه بنفسكم في ارجاها الكبيرة.








    هذي صور للبحيرة.


    بالاضافة للبحيرة ، يوجد في القرية ينابيع ماء حار من البحيرة نفسها تنفع للاسترخاء بالذات للي عضامه توجعه.
    و ايضاً بالقرب من البحيرة على الخط السريع القادم من فانكوفير فيه شلالات في منتها الجمال و الروعة اسمها شلالات براديل فال (Bridal Veil Falls).




    هذي خريطة لمنطقة البحيرة ، البحيرة في الاعلى و الشلالات في اليمين.






    هذي صور للشلالات.


    ممكن انكم تجيبون معكم لحمكم و فحمكم و تشززن عند البحيرة او ممكن تتغدوم في المطاعم الكثيرة المحيطة فيها.


    اذا حبيتو تمرحون في منطقة البحيرة و تتمشون فيها زياده في اليوم الثاني فيه عدة خيارات للسكن.


    فيه شاليهات على جوانب البحيرة في وسط الغابات المحيطه فيها في منتها الجمال في منتجع شاطء ايكو
    (Echo Beach Resort)

    الشالية يكلف في حدود 280 دولار كندي.

    اذا كنتم تبون تسكنون فيه اتصلو عليهم و احجزو احد شاليهاتهم ، و هذا رقم تلفونهم:

    18667091019

    و الخيار الثاني هو انكم تسكنون في فندق بنقلو (Bungalow Motel).

    و سعر الغرفة عندهم في حدود 80 دولار كندي ، ميزت الفندق هذا انه يتبع لشركة ، تنضم رحلات سياحية في المنطقة.
    اذا كنتم تبون تطلعون في احد رحلاتهم السياحية ، اتصلو على الرقم التالي و احجزو معهم:
    6047963536

    بالنسبة للرحلات للمسافرون العرب اللي هم ينضمونها في منطقة بحيرة هيرسون فهي تنطلق من الفندق الساعة 9 صباحاً و تكلفة التمشية هي 75 دولار كندي للشخص و هذا المبلغ يشمل الغداء.


    ( يتبــــــــــــع )

    التعديل الأخير تم بواسطة ابن الخضراء ; 2019-01-18 الساعة 10:38 PM

صفحة 1 من 6 123 ... الأخيرةالأخيرة

المواضيع المتشابهه

  1. معهد اسبيكت ( Aspect ) للغة الانجليزية في مدينة فانكوفير الكندية
    بواسطة Esperanza في المنتدى سفاري أمريكا الشمالية والجنوبية
    مشاركات: 10
    آخر مشاركة: 2015-09-15, 08:32 PM
  2. معهد Ef الدولي للغة الانجليزية في مدينة فانكوفير
    بواسطة Esperanza في المنتدى سفاري أمريكا الشمالية والجنوبية
    مشاركات: 24
    آخر مشاركة: 2008-03-11, 12:23 AM
  3. مدينة فيكتوريا الكندية - Victoria
    بواسطة Esperanza في المنتدى سفاري أمريكا الشمالية والجنوبية
    مشاركات: 12
    آخر مشاركة: 2007-08-03, 04:25 PM
  4. اسعار رحلاااات الى اروبا عامة ،، تفضل بالزيارة
    بواسطة محمد الدارى في المنتدى سفاري فرنسا وألمانيا France & Germany
    مشاركات: 11
    آخر مشاركة: 2005-08-23, 12:23 PM
  5. دبي.. مشروع حضاري يذهل الزائر باستمرار مدينة الفنادق والمنتجعات
    بواسطة حمودي الرساوي في المنتدى سفاري الإمارات Emirates
    مشاركات: 3
    آخر مشاركة: 2005-08-04, 03:52 AM

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
X