5اعجاب
السلام عليكم ورحمة الله و بركاته
النهارده ان شاء الله هاتكلم عن رحلة عمل قصيرة الي لاجوس انطباعات و نصائح من خلال تجربتي البسيطه و معلش لو كان التقرير طويل ولازم اشكر اصدقاء تعرفت عليهم و كلمتهم و افادوني قبل السفر.
ان شاء الله هيكون فيه تقارير تانية بصور و تفاصيل اكتر لكن ده المختصر المفيد خلال تجربة شخصية هناك لحضور معرض و مؤتمر فى اكتوبر 2018 .
اول حاجه محدش هيفكر يسافر نيجيريا سياحه لانها بلد غاليه و فيها تضخم و حتى الطيران مش رخيص و الامان مش قد كده و مش بلد سياحيه و فيه بدائل كتير في افريقيا مناسبة اكثر للسياحة هتلاقو تجارب كتير عنها زى كينيا و تنزانيا و جنوب افريقيا.
نيجيريا بلد فيها فرص بيزنس كتير يعيبها انتشار الفساد و لاجوس العاصمة الاقتصادية و عاصمة التجارة لكن عاصمة نيجيريا الرسمية أبوجا فى الشمال و هي على كلام الناس هناك احلى كتير من لاجوس و أكثر نظام.
الافامة لازم تختار فندق نظيف و امن و من فئة مرتفعة عشان الاكل يكون نضيف و ده مايمنعنش انك تاخد حذرك
التطعيمات
ثانيا قبل السفر لازم تأشيرة من السفارة النيجيرية على الباسبور مش اون لاين و لا عند الوصول انا الشركة جابتلى تأشيرة بيزنس و ماعتقدش انها صعبه.
ثالثا التطعيمات شهادة التطعيم الدوليه من مكتب صحة فيه تطعيم دولى او مكاتب الحجر الصحي في مطار القاهره " الشهادة الصفرا" للحمي الصفرا yellow fever قبل معاد السفر ب 10 ايام علي الاقل مش هتدخل من غيرها و امان ليك طبعا لان المرض ده منتشر جدا هناك لدرجة انى قريت انهم بيطعمو النيجيرين نفسهم منه.
تطعيم الحمى الصفرا مدته 10 سنين فى الشهادة و عرفت فى مكتب الصحة ان منظمة الصحة العالمية خليته مفتوح مدى الحياة مرة واحدة فى العمر يعنى تحتفظ بالشهادة بعد السفر عشان لو احتجتها فى سفرية تانية بتطلب فى دول كتير لافريقيا.
باقي التطعيمات اختياريه مخدتش حاجه منها لان الدكتورة سألتني قولتها 3 ايام قالتلي حرص في الاكل و الشرب و الناموس اكمام طويلة و اوف طارد للناموس و عدم استخدام اي عطور او كريمات تجذب الناموس لكن لو انت مسافر مدة كبيرة او مش ضامن مستوي الاكل الافضل انك تاخد التطعيمات المتاحه زي التيفود و الكوليرا و لو بتشتكي من اي مرض مزمن قول عشان مفيش تطعيم يعمل مشكله المفترض انهم بيسالوك.
الملاريا ربنا يعافينا فيها اراء كتير من اقراص او تطعيم بس انا مخدتش لكن عملت احتياطات من الناموس و زملاء من الجروب الى كنت مسافر معاهم اشترو دوا الملاريا من هناك و احنا راجعين احتياطي و عرفنا بعض عشان لو ظهرت الاعراض لا قدر الله عند حد
النصيحة الي عرفتها لا قدر الله لو اصبت بالملاريا اتعالج في البلد هناك لان الادوية اكثر فاعليه و متوافره.
قبل السفر دورت على معلومات من جوجل و مع الاسف كانت اول معلومات بتقابلك تحذيران أمنية و صحية و النصب و الاحتيال عشان كده ينصح عدم الثقة فى الغرباء.
و انت مسافر خلي معاك دولارات فكة فئة دولار و خمسه دولارات تحسبا لاي مضايقات في المطار مش كل الناس انت و حظك انا دفعت و انا داخل " شخلل يا بلدينا " و في الرجوع غايه في الاحترام محدش ضايقني و انت و حظك.
المطار عربيه كانت منتظرانا اتعرض تاكسيات و لما كنت بقولهم فيه حد منتظرني بيقولولي متطلعش بره لوحدك و ده الطبيعي هناك في فندق مول مطعم العربيه بتدخلك و تاخدك من جوه يعنى لا تنتظر فى الشارع.
تغيير العمله سهل احسن سعر في الصرافات الي جوه المطار و بالايصال و هو تقريبا نفس سعر السوق السوده هتلاقى ناس فى الشارع ادام المطار معاهم فلوس بتغير طبعا مش محتاج اقولك ملكش دعوة بيهم.
في الفندق هتخسر 3% من قيمة الدولار لو غيرت من الريسبشن بس ماتقلقش السوق السودا مقيم في الفندق و بيغير لك عيني عينك و كان فيه البازار برضو بيغيرو بنفس سعر المطار و لما ترجع من نيجيري لدولار برضو من المطار و مابيطلبوش ايصال تغيير من دولار لنيحيري ... الدنيا سهله
الدولار حوالي 359 نايره نيجيري فى السوفق السودا وقت وصولى و العملة هناك 1000/500/100/50 و اقل
اشتري خط موبايل نيجيري لما توصل حتي لو قاعد كام يوم انا شغلت تجوال و محدش كان بيوصلي و خصمو عليا مكالمات كتير و عملت خناقه عشان استرد الفلوس
الميزة لما تشتري خط شغل اوبر يوديك من مكان لمكان لو احتجت ارخص من تاكسيات الفندق يوديك المكان و يدخلك جوه و تطلب التاني و يدخلك جوه برضه لما تخلص عشان تروح زمايلنا كانو بيتحركو باوبر.
الاكل هناك في لاجوس الطبيعي انه مش حلال في الدبح ده الي شفته و لازم تسال و تتاكد من من نوع اللحم
الفندق في المنيو كان عامل علامه علي الاكل الي فيه خنزير او كحول للتنبيه
عموما انا المدة قصيرة فمكلتش لحوم او فراخ و اعتمدت علي السي فود و الاكل النباتي زى بيتزا خضار منتشرة
طبعا مهم جدا جدا ان الفندق او السكن يكون كويس و نظيف و امان فى لاجوس
سعر الوجبة غالي اقل حاجة ما يعادل 15 دولار بيتزا مارجريتا و توصل ل 30 دولار و اكتر عموما ممكن تشوف المنيو قبل ما تقعد فى اى مطعم بس الدنيا كلها غاليه ماتنخدعش ان البلد افريقى.
الجانب المشرق الاكل هناك حلو فعلا مش عارف يمكن عشان اورجانيك و النكهة رائعة و الفواكه طبعا ماقولكش و الجو الرطوبه عاليه جدا فى النهار و بالليل لطيف و الهوا نظيف و نقى و الخضرة كتير و لما تمطر بيبقى تحفة بشرط ماتكونش تحت المطر ههههه
روحنا لسوبر ماركت اشهر واحد هناك شوب ريت shoprite عامل زي كارفور هنا الحاجات الي شوفت ممكن تشتريها الكريمات و الزيوت الطبيعيه زي جوز الهند و انواع كتير او من الصيدليه اشكال و ممكن تشتري مياه و عصائر او بقاله لان اسعار الفندق غاليه جدا (سعر الكولا 15ضعف السوبر ماركت)
الماركت جوه مول فى فود كورت صغير و صيدليه و محلات ملابس و نظارات
المول اسمه palms mall و الاسعار جواه كويسة جدا مقارنه بالتضخم الى هناك.
و التحف الافريقي فيه سوق شعبي كان بعيد عن فيكتوريا ايلاند مشهور بس الافضل تاخد معاك صديق نيجيري مروحنهاش بس قالولنا عليه وكان فيه بازار كبير في الفندق بيضربو الاسعار ف السما لازم تفاااااصل على قد ما تقدر.
هناك الي ممكن تروحو فى لاجوس مولات أو مطاعم هتلاقي اكل متنوع
عموما البلد مش مشجعه و فعلا مرعبه بالليل
ماخرجتش لوحدي من الفندق غير مرة واحده اخر يوم الصبح اتمشيت في الشارع رايح جاي جنب الفندق عشان ابقي مشيت في لاجوس هههههههههه
البلد بتغرق في شبر ميه و المطره شديده و غير متوقعه يعني المشوار الي بياخد ربع ساعه خد مننا ساعتين تقريبا لنا كانت بتمطر من غير مبالغه و لو مقيم هناك يبقي الشمسيه اساسيه احنا كنا ف الموسم المطير في سبتمبر
لاجوس اسوأ مدينة فى المرور شفتها فى حياتى
الشعب هناك في الفندق الشغل المطاعم غالبتهم ودود و مبتسم.
مطار لاجوس في الرجوع افضل من الذهاب و السوق الحره مكانه كويس و دورات مياه نظيفه و مسجد و الاسعار معقوله مقارنة بالبلد فيه بازار جوه بتفاصل فيه زي العتبه
طيارة مصر للطيران ازحم طيارة فى مطار لاجوس مباشرة الى القاهرة غير كده ترانزيت حسب ما اعرف
فيكتوريا ايلاند ارقي منطقه في لاجوس و اكثرها امنا و معظم الاجانب هناك حسب ما عرفت و ده الحي الي كنت نازل فيه
البنات لا ينصح ابدا انك تاخدي دهب او مصوغات معاكي او تلبسي خاتم او سلسله اي حاجه حتي لو فالسو
البلد مش من النوع الي تنزل تتفسخ و تركب مع نفسك و تكتشف التحركات تاني بعربيه من الفندق او اوبر ياخدك من جوه الفندق للمكان الي رايحه مول او مطعم لحد جوه و ياخدك من جوه
طبعا ماتشيلش في الشنطه الي هتبقى فى قلب الطياره اي شئ قيم يطمع في زي موبايل او تابلت كاميرا و الكلام ده عموما مش نيجيريا بس بس الحذر اكتر في الدول دي
رد مع اقتباس
المشاركة الأصلية كتبت بواسطة الغديــر
