4اعجاب
اعداد و رحلة : م/ محمود عبد العزيز
تقديم و تنسيق : م/ محمد منصور
أولا: الامان و الاسعار
السلام عليكم و رحمة الله و بركاته
نلتق معكم اليوم و تجربة جديدة و الصديق م/ محمود عبد العزيز من تنزانيا البلد الافريقى الجميل الذى جذب اليه عشاق الطبيعة الحياة البرية لاكتشافه و مشاهذة الحيوانات و الطيور فى بيئتها و التعرف على ثقافته الغنية و شعبه البسيط و الاسئلة كثيرة و ان شاء الله فى هذا التقرير هناك اجابات و معلومات و صور و امتاع فكل الشكر و التقدير و التحية الى مهندس محمود
لطفا قبل ان تسافر الى تنزانيا اطلع على
دليل تنزانيا السياحى
نسبة الأمان في تنزانيا كويسة جدا لكن الأفضل تبعد انك تمشي بفلوس أو اي حاجة قيمة بليل.
- وكمان مفيش مشاكل في الأوبئة لكن طبعا خد حذرك من الناموس عشان متتصابش بالملاريا اللي كمرض يعتبر مش خطير وخطورته الوحيدة هي التأخر في علاجه والحمدلله نسبته في تنزانيا قليلة بالمقارنة ببلاد تانية و كمان احذر من حشرة التسي تسي اللي مش هتلاقيها غير داخل الناشونال بارك ولما تخش جوة قوي كمان وخطورتها لو قرصتك من ثلاث لأربع أيام متواصلة وطبعا ضروري تستخدم سبراي أوف للناموس وتبعد عن لبس اللون الأزرق لانهم بييجوا عليه
- السياحة في تنزانيا غالية تشمل أسعار الأكل و حجز الفنادق و أسعار الرحلات.
تنزانيا غالية جدا يعني اللي هيروحها مخصوص ياما يكون لف في اسيا حبة ياما معاه فلوس ومش فارق معاه ياما تنزانيا هدف ليه وعايز يحققه لان مقارنة بآسيا فارق كبير جدا ومعظم افريقيا كدة
صعود جبل كليمنجارو هتلاقيه فوق ال 1200 دولار للفرد وده بياخد ست ايام كرحلة واحدة بس ثلاث ايام صعود ويومين نزول و ده في الطريق الممهد الي شكل كبير و اللي فيه فنادق في الاستراحات بتاعته غير كدة في ست طرق للقمة تانيين بس بتبقي camping و طرق اصعب اكتر رغم انها ممكن تكون اقصر ومعرفش اسعارهم كام بس متهيألي مش هيقلوا عن الف دولار
لو عايز تطلع سفاري ل serengeti و ngrongoro مثلا وهتكون مع مجموعة تبع شركة سياحة مش هتلاقي اقل من 600 دولار للفرد والمبيت في lodges او camps طبعا هتلاقي اسعار فلكية بخدمات احسن وفنادق خمس نجوم وكدة او عروض طيران بالرحلة كلها بطائرات اللي بتشيل ثمانية راكب وممكن الفرد يكون 1500 دولار ل 2000 دولارلو رحلة كاملة من دار السلام ليهم طيران
بالنسبة لزانزيبار انا مجربتش الحاجات الرخيصة خالص لكن اسعار فندق مستواه عادي في شمال زنزيبار كان عامل 70 دولار لغرفة بفردين وطبعا غالي جدا الرحلات البحرية ارخص حاجة شوفتها ب 30 دولار snorkeling جنب جزيرة اسمها mnemba ومعرفش تفاصيل عنها
رحلة لشلالات كليمنجارو من مدينة موشي مع كام نشاط معاهم مع شركة حوالي70-80 دولار قعدت في فندق كويس في موشي ب 65 دولار بالفطار لفردين وممكن تلاقي حاجات كويسة وارخص من كدة نفس الكلام
اروشا هتلاقي فيها حاجات بعشرين دولار ونضيفة الاكل في اروشا وموشي ممكن في حدود 7 ل 15 دولار علي حسب نوع الاكل ومقدرش احدد بالضبط عشان انا بروح اكل في مطاعم مش اكل محلي لكن في زنزيبار ودار السلام الاكل اغلي
التاكسيات غالية بردو يعني ممكن مسافة 10 كيلو تدفع 10 دولار وفي موتوسيكل وتكاتيك ومجربتهاش
الافضل للسفاري عشان التوفير جروب يجمع نفسه ست افراد مثلا يأجروا عربية 4x4 ويطلعوا هما مع نفسهم من الألف للياء و ان شاء الله هيكون لينا موضوع مخصوص للكلام ده
ثانيا احسن وقت للسياحة فى تنزانيا:
أفضل وقت للسياحة في تنزانيا شهر يونيو لأكتوبر وده لانه موسم الجفاف وتقدر تشوف في الناشونال باركس حيوانات بأعداد كبيرة و المناخ بيكون معتدل من يونيو لسبتمبر(فصل الشتاء في تنزانيا) طبعا كل وقت بيبقي ليه مميزاته وعيوبه زي انك اكيد هتقدر تشوف طائر الفلامينجو في بحيرة مانيارا من فبراير لابريل ولكن في العموم أفضل وقت بمميزات أكتر هي اللي ذكرتها فوق.
ثالثا الاماكن السياحية فى تنزانيا:
- سياحة شاطئية:
* جزيرة زنزيبار (وأفضل مكان فيه المحيط الهندي لونه صافي في شمال زنزيبار في منطقة اسمها Nungwi) وطبعا في snorkeling و diving لكذا مكان لكن مش بنفس مستويات الشعب المرجانية عندنا في مصر (مصر أروع طبعا) وطبعا فيها prison island قريبة من الstone town. (عاصمة زنزيبار فيها أماكن أثرية) اللي هتشوف فيها سلاحف بأحجام كبيرة وكمان في رحلات تشوف فيها دلافين في جنوب زنزيبار ورحلات تانية كتير.
* جزيرة المافيا (مشهورة بنوع من الحيتان للي غاويين الحاجات دي يعملوا snorkeling معاهم) لكن مروحتهاش الصراحةواحتمال ميحصلش ابدا
- بحيرات
أشهرهم
*بحيرة فيكتوريا والأفضل زيارتها من مدينة mwanza
*بحيرة chala علي حدود كينيا شرقا وهي بحيرة روعة تستحق الزيارة رغم انها صغيرة جدا
*بحيرة manyara و دي بداخل ناشونال بارك
*بحيرة eyasi ومعنديش معلومات كافية عنها
- جبال
* جبل كليمنجارو (kilimanjaro) أعلي قمة جبلية في أفريقيا وصعودها امن لكن غالي جدا وأفضل وقت تشوف الجبل فيه من الأرض بيبقي في أكتوبر وديسمبر لكن غير كدة السحب هتحسسك ان مفيش جبل
* جبل ميرو (meru) تاني أعلي قمة جبلية في تنزانيا وصعودها أصعب من كليمنجارو وهي في مدينة Arusha
مطلعتش حاجة فيهم ومعنديش معلومات كافية عنهم
- شلالات
وفي شلالات
في udzungwa mount قريب من Mikumi national park
و kilimanjaro mount
و lushoto city بين دار السلام و كليمنجارو والمكان ده مش مشهور قوي لكنه في قمة الجمال رغم ان الشلال أصغر من التانيين
... دول اللي اعرفهم وزورتهم
محميات طبيعية national parks
وطبعا في حوالي 16 أو 17 national parks في تنزانيا واشهرهم واجملهم هما
Serengeti international parks
Ngrongoro crater
Tarangiri national park
Ruaha national park
Selous game Reserve
Lake manyara national park
Arusha national park
Mikumi national park
Mkomazi national park
هتشوف فيهم اكيد أفيال وزرافات و غزلان و zebras و wildbeast و buffaloes و قرود و طيور بأشكال مختلفة
والأسود احتمال مش كبير علي حسب حظك والمرشد اللي معاك لكن في ngrongoro و serengeti و بعدها Tarangiri هتقدر تشوف اسود باحتمالات كبيرة جدا
والنعام و الضبع ووحيد القرن و حيوانات تانية بتبقي موجودة في اماكن معينة واقل الحيوانات فرصة انك تشوفهم هما وحيد القرن اللي متواجد في ngrongoro بس و
ال leopard و ال cheetah والاحتمال ضعيف جدا جدا انك تشوفهم.
- أخيرا ينابيع المياه الساخنة hotsprings
ودي موجودة بين moshi و Arusha
السياحة فى دار السلام عاصمة تنزانيا
- دار السلام فيها سياحة بردو أشهرهم جزيرتين mbudya وتروحها من waterworld او whitesand resort و جزيرة bongoyo وتروحها من slipway hotel وكمان في بلد قريبة من دار السلام اسمها bagamoyo ودي لمحبي الحاجات الأثرية
رابعا : الطيران
طبعا الأفضل مصر للطيران ودي ذهاب وعودة رحلتين أسبوعيا... الذهاب السبت والثلاثاء 11 مساء والعودة الأحد والأربعاء 7 صباحا وبعدها الطيران الأثيوبي (ترانزيت في أديس أبابا) وله رحلات يومية
تعديل 1: الفيزا السياحية بخمسين دولار وتقدر تطلعها من سفارة تنزانيا بمصر أو لحظة وصولك المطار في تنزانيا والأفضل يكون معاك ورقة حجز الفندق لكن مش شرط (انت ورزقك
اللغة هناك اسمها سواحيلي وطبعا هتتعامل بالانجليش وفي زنزيبار هتلاقي ناس بتكلمك باللغة العربية لو عرفوا انك مصري
خامسا : صور من رحلات و جولات فى تنزانيا
Lake chala
Tarangiri national park
Udzungwa waterfalls
Udzungwa mount
Ngrongoro crater
Mkomazi national park
قبيلة في شمال تنزانيا بس مش فاكر اسمهم ايه
Kilimanjaro waterfalls
Kilimanjaro mount
Hotsprings
Nungwi beach
و فى النهاية نتمنى ان ينال التقرير اعجابكم و يكون مفيد و مرجع لمن يودون التعرف و زيارة هذا البلد السياحى و الذى حتما هو تجربة مميزة و كلمات الشكر لا تفى حق م/ محمود على التعاون و الشرح و الاجابة عن تساؤلاتى لايصال اكبر قدر ممكن من المعلومات اليكم و التفضل بمشاركتنا تجربته فى منتدى سفارى
رد مع اقتباس
المشاركة الأصلية كتبت بواسطة hearty
