صفحة 1 من 7 123 ... الأخيرةالأخيرة
النتائج 1 إلى 10 من 68

الموضوع: أحلى الأوقات فى ربوع تركيا مايو 2012

  1. #1
    كبار شخصيات سفاري
    تاريخ التسجيل
    Sep 2012
    المشاركات
    2,141

    أحلى الأوقات فى ربوع تركيا مايو 2012


    بسم الله الرحمن الرحيم

    أخيرا قررت أنزل التقرير الخاص برحلتنا الى تركيا بعد تشجيع من بعض الأخوات جزاهم الله كله خير، مع أني بصراحة تقريري بسيط جدا مقارنة بتقارير الأخوة والأخوات الرائعين. واعذروني ما رح أنزل صور لانه الصور كلها شخصية وماكنت مفكرة أنزل شىء على الموقع.
    بعد التوكل على الله وبعد البحث فى عدة مواقع جزاهم وجزاكم الله كل خير قررنا أنا وزوجي الله يرضى عليه التمتع بجمال تركيا لمدة 9 أيام منها يوم فى بورصة ويوم فى سبنجة الغالية و7 أيام فى معشوقتي اسطنبول خلال الفترة من 3- 11 مايو 2012. والسبب الرئيسي لاختيارنا لهذا التوقيت مع أن الأسعار تكون أغلى من أي وقت هو جمال الجو فى هذا الوقت من السنة.
    أرجو الله تعالى أن تعم الفائدة على الجميع وأسأله سبحانه أن يمن علينا دائما وأبدا بنعمه التى لاتعد ولاتحصى.

    الخميس 3 مايو 2012
    توكلنا على الله انا وزوجي وطلعنا من مطار الشارقة على العربية للطيران وكان توقيت الرحلة رائع 11 صباحا بس صار تأخير على الطائرة وطلعنا الساعة 12 ونص استغرقت الرحلة 4 ساعات وعشر دقائق. لقينا مندوب من الفندق بينتظرنا وكنا متفقين معهم على توصيل من والى مطار صبيحه ب 120 يورو (600 درهم) وان شاء الله المره الجاي مارح نعمل هيك اكيد رح نستعمل وسائل المواصلات العامة. اشترينا خط تلفون من المطار (35 ليره) وعبيناه ب 10 ليرة. ملاحظه مهمه جدا اذا تلفونك على واتس اب رح ينسحب كل رصيدك برمش العين فوقفوا لحد ما ترجعوا من تركيا، كمان مافي عندهم بلاك بري.
    وصلنا على الفندق فى منطقة السلطان أحمد Art City Hotel الليله ب 120 دولار حجزنا عن طريق www.expedia.com الفندق ممتاز وموقعه رائع والتعامل ممتاز والموظفين متعاونين والفطور جيد ولكن الغرفه صغيرة وعشان نطلع اي مشوار لازم نطلع طلعة قوية والمشكله انه الشارع عبارة عن حجارة مدببه قديمه متعبة جدا جدا وحتى النزول كان صعب ومع انه الفندق جيد بس أكيد مارح أنزل فيه مره ثانية بسبب الطلعة الصعبة . يجب لبس بوت الرياضة خلال الرحلة لانه فيها مشي كتير. وطبعا خدوا معكم عدة جرابات (دلاغات) وملابس قطنية لانه ديزل السيارات صعب جدا.
    ضبينا أغراضنا بالغرفه ونزلنا مشي (5 دقائق) وبدأنا رحلتنا بالصلاة فى مسجد السلطان أحمد Sultan Ahmet صلاة المغرب جماعة والعشاء جمعناه. حسيت براحة شديدة وكأني فى مكه، وبعدها طلعنا تعشينا (الأكل عندهم مش طيب) 43 ليره واشترينا كستنه 3.5 ليره (مو مستويه) و سحلب 2 ليره (السحلب عنا أطيب) وبطيخ 10 ليرة. دخلنا على مكتب سياحة وحجزنا رحلة بحرية ليلية ورحلة بورصة.

    الجمعه 4 مايو 2012
    نزلنا من الصبح فطرنا وعلى طول طلعنا مشي على متحف أيا صوفيا Aya Sophia اللي كان كنيسة وتحول لجامع والآن صار متحف بجانب مسجد السلطان أحمد (25 ليرة للشخص مافي داعي تاخد سماعة دليل سياحي) (مواعيد المتاحف من 9:30 صباحا – 5:00 مساء) تجولنا فيه كله رائع جدا بس طبعا متعب جدا لانه طلعنا فوق كمان فاللي عنده مشكله بالركب ما يطلع أحسن . خلصنا لقينا كوفي شوب برا شربنا شاي وكملنا على قصر توب كابي Topkapi Palace بجانب آيا صوفيا. دفعنا التذاكر (25 ليرة للشخص) ثم استأجرنا سماعة الدليل السياحي بالعربي (15 ليرة) كانت ممتازه لانه عند كل موقع بتضغط على رقم الموقع والجهاز بيشرحلك شرح جميل عن الموقع. هذا القصر اللي كان عايش فيه السلطان سليمان القانوني وفيه عربات السلاطين والمجوهرات الخاصة بالسلاطين العثمانيين ثم مقتنيات سيدي وحبيبي محمد صلى الله عليه وسلم وعلى فكره فى هذا الموقع ما بتقدر غصب عنك الدموع بتنزل لما تشوف سيف الرسول صلى الله عليه وسلم وسيوف الخلفاء الراشدين والصحابة رائع رائع رائع. خلصنا كنا حنموت من التعب على طول دخلنا الكوفي شوب التابع للقصر أكلنا شاورما سيئة جدا (ترى ما عجبتنا الشاورما عندهم مع انو عنا الشاورما التركية كتير طيبه) وعصير وبطيخ ب 120 ليرة بس اللهم المنظر من هذا المكان خيالي الشجر والبحر سبحان الخالق. نصيحة لاتفكروا ابدا تاكلوا فيه.
    رجعنا على الفندق و قبلها مرينا على البقالة بجانب الفندق واشترينا جبنه ولبنه وخبز والذي منه وطبعا فواكه رهيبه. سألنا موظفي الفندق عن سواق ياخدنا على سبنجه وفعلا وفروا لنا طلبنا.
    ارتحنا شوي وجهزنا حالنا لرحلة الباخرة الليلية (60 يورو للشخص). شركة السياحة اجوا اخدونا من الفندق ورجعونا عليه والرحلة كانت ممتازه وتعرفنا على عائلة سعودية لسه عرسان يعني قد أولادنا وانبسطنا معهم وتبادلنا أرقام التلفونات وكالعادة الأكل سيء. رجعنا تعبانييييييييييييييييييين ونمنا. واذا الله كتب نصيب ورجعنا ما بفكر نطلع هاي الرحلة مره تانيه.

    السبت 5 مايو 2012
    حضر السواق 8:30 صباحا علشان ياخدنا على سبنجه Sapanca (ساعتين من اسطنبول) واتفقنا معاه على 150 دولار والبنزين علينا طلع 250 دولار مع البنزين. وصلنا الى بحيرة سبنجة هدوء وجمال الطبيعة اللامحدود جلسنا وارتحنا وطبعا شاي تركي وعوامة (لقيمات) طيبه كتير كتير وبعدين طلعنا على الجبل على مطعم ناتوركوي Naturkoy مكان خيالي رائع شلالات وشجر وبحيرات وبط وأول مره ناكل أكل طيب والله أكرمنا ومطرت وطلع البط عندنا عنجد مابقدر اوصف الجمال سبحان الله واحنا طالعين لقينا عرسان جايين يتصورا بصراحه معهم حق مش حيلاقوا اجمل من هيك. (الغداء 3 اشخاص 115 ليره). كملنا طلوع الجبل وما تتخيلوا الجمال حتى لون الشجر الأخضر لون رائع والسحب تتمشى معنا والثلوج حوالينا لحد ما وصلنا لفندق Green Park ومن هناك طلعنا بالتلفريك (عربة لشخصين) الشخص 45 ليره مناظر خلابة شجر وسحب وثلج يعني عانقنا السماء بسبنجه. خلصنا ورجعنا اسطنبول تقريبا الساعة 11 بالليل تعشينا بالغرفه ونمنا خلال ثواني.

    هيك خلصنا الجزء الأول وان شاء الله يعجبكم ويحوز على رضاكم.


  2. #2
    مسافر نشيط
    تاريخ التسجيل
    Sep 2012
    المشاركات
    30

    ماشالله عليك اول الشي من كم شهر وبعدك زاكرة التفاصيل ماشاء الله
    وتاني شي جزاك الله خير كتير حلو التقرير وخصوصي انو ذكرتي التفاصيل كرمل نستفيد
    والمرات الجاية م عليك امر حطيلنا اسماء المطاعم سواء المنيحة ولا لا كرمال نستفيد واكيد اسعارا

    ومشكورة وناطرين الاجزاء الباقية

  3. #3
    كبار شخصيات سفاري
    تاريخ التسجيل
    Sep 2012
    المشاركات
    2,141

    تسلميلي حياتي وشكرا على الاطراء بس الحقيقه ولا متذكره ولاشي انا كتبت التقرير من اول ما وصلت بس ما كنت بعرف موقع سفاري واشتركت معهم بس الشهر الماضي، ومع اني بعرف اني تقريري كتير متواضع بس قلت يمكن الناس تستفيد منه. وتأمري حبيبتي واهلا وسهلا فيك وشكرا كتير على المرور.

  4. #4
    كبار شخصيات سفاري الصورة الرمزية شهرزاد سفاري
    تاريخ التسجيل
    Oct 2011
    الدولة
    كوكبى الخاص
    المشاركات
    2,271

    مشكورة على مشاركاتنا اللحظات الجميلة دى
    واجمل مافى الامر ان ماشاء الله عليكم راضيين ومبسوطين
    وهذا اجمل شئ فى اى رحلة الروح الجميلة تفرق كتير فى رؤية الشخص للجمال

  5. #5
    كبار شخصيات سفاري
    تاريخ التسجيل
    Sep 2012
    المشاركات
    2,141

    تسلميلي شهرزاد كتير انا مبسوطه انك اول مشرفه فى الموقع بتتشارك معي وياريت باقي المشرفين كمان خصوصا الأخ أبو جنى والأخ فهد وباقي الأخوه الأجلاء. شكرا كتير على مرورك الراقي.

  6. #6
    كبار شخصيات سفاري
    تاريخ التسجيل
    Sep 2012
    المشاركات
    2,141

    الأحد 6 مايو 2012

    فطرنا فى الفندق وطلعنا على محطة الترام مشي طبعا لأنها كتير قريبه علينا اشترينا كرت اسطنبول للمواصلات Istanbul Card وعبيناه ب 60 ليره من الكشك اللي بجانب المحطه، وطلعنا بالترام (1.75 ليره للشخص واستعملنا كرت اسطنبول) اللي مكتوب عليه كاباتاش Kabataş وهي آخر محطه للترام وصلنا على كاباتاش ومشينا 5 دقايق لقصر دولما بهجه Dolmabahce Palace (30 ليرة للشخص) واحنا واقفين بالطابور الطويل جدا جدا (وقفنا ساعة كاملة) اجتنا مرشده سياحيه عربية وعرضت علينا خدماتها (10 ليرة للشخص) وطبعا بتاخدنا من الطابور وبنطلع بسرعة، على طول وافقنا وتعرفنا على عائلة مصرية وأطباء مغاربه. هذا القصر هو قصر آخر السلاطين العثمانيين وطبعا رائع جدا جدا وكان شرح المرشده ممتاز وعشنا التاريخ العثماني كأنه امبارح.
    طلعنا وصلينا بالمسجد اللي جمب القصر ولقينا بائع كباب متجول اشترينا سندويشات كباب ولبن عيران (6 ليرة للشخص) أطيب أكله أكلناها. ارتحنا شوي و حجزنا تذاكر الباخره للذهاب الى برج البنت Kız Kulesi (20 ليره للشخص رايح راجع) رحلة رائعة جدا وطلعنا البرج والدرج طويل جدا بس الطلعة بتستاهل. رجعنا على كاباتاش ومن هناك طلعنا رحلة بحرية تانية بس هاي جولة فى البوسفور يا الله شو رائعة (12.5 ليرة للشخص) هاي بواخر تابعة للبلدية ممتازة İstanbul Belediyesi ما تاخدوا المراكب الخاصة لأنها مو مرتبه. وما أدراك ما البوسفور وما جماله سبحانه ربي سبحانه، وياعيني على النورس وجماله وذكائه.
    اتصلوا فينا أصحابنا العرسان اللي تعرفنا عليهم بالمركب وقال انهم رايحين يحضروا حفلة الدروايش وكان بدنا نتعرف على ثقافات جديده، فركبنا الترام مره ثانية من كاباتاش الى السلطان أحمد وهناك التقينا معهم وتعشينا مع بعض وانبسطنا كتير معهم. وهذا كان نهاية اليوم.

    الاثنين 7 مايو 2012
    كالعادة فطرنا فى الفندق ومشينا لمحطة الترام وطلعنا فيه لمحطة كاباتاش وحجزنا فى بواخر البلدية على جزر الأميرات (3 ليرة للشخص) استعملنا كرت اسطنبول، طبعا فى جدول للرحلات ولقينا واحد بيحكي عربي وقالنا انه آخر رحلة الساعة 8 مساء واعطانا كرت مطعمه طلع أغلى مطعم. رحنا على آخر جزيرة Büyükada وتمشينا فى الجزيرة الجميلة ثم طلعنا بالحنطور (60 ليرة للعربة) لمدة ساعة لفينا بالجزيرة رائعة وممكن اللي بحب يستأجر بسكليت بس شفنا الناس اللي مستأجرين البسكليت ميتين من التعب فى نص الطريق. طبعا الجزيرة حلوة كتير وخصوصا انه ما فيها سيارات والسكان بتنقلوا بالدراجات الهوائية. خلصنا الجولة ورجعنا تمشينا وقفنا عند خضرجي واشترينا فواكه بتجنن ودلنا على مطعم قاسم Kosem ممتاز جدا مش على البحر مباشرة لانه اللي على البحر كتير غاليين هذا المطعم تاني صف على طول ومافي مشروب وماشاء الله أكلنا سمك وشربنا شاي ومهلبية وطلع الحساب 33 ليرة فقط والأهم انه المطعم نظيف وشغله تمام. رجعنا برحلة الساعة 3 العصر تقريبا (3 ليرة للشخص). وصلنا على كاباتش ومن هناك اخدنا مترو (محطة المترو بجانب محطة الترام) استعملنا كرت اسطنبول الى تقسيم Taksim وبس نزلنا على طول بوجهنا كان شارع الاستقلال اللي كل العرب بحبوا يروحوا واكيد لاقينا كتيييير عرب تمشينا وتسوقنا وتعشينا من واحد ببيع كبه رائعة وقال انه امه اللي عاملتها. ورجعنا أخدنا المترو لمحطة كاباتاش ثم الترام لمحطة السلطان أحمد ثم المشي للفندق وكالعادة وصلنا ونمنننننننننننننننننننننننننننا.

    الثلاثاء 8 مايو 2012
    اليوم رحلة بورصة وسعرها 70 يورو على الشخص – اجو الشركة السياحية أخدونا من الفندق 8 صباحا بس للأسف ما أخدونا من باب الفندق مشونا مسافة طويلة لحد ما وصلنا للباص وبعدين تجمعوا كل الباصات وزعونا حسب الجنسية وكنا متفقين مع أصحابنا العرسان والتقينا معهم بالباص. وبعدها طلعنا بالعبارة، الرحلة كاملة أخدت 3 ساعات تقريبا. وصلنا يلوا ونزلونا على محل كستناء وبعدين محل ملابس كبير ثم وصلنا على بورصة اخدونا على مطعم مو طيب بجانب سوق الحرير. دخلنا على سوق الحرير حلو وممكن الواحد يشتري منه وبعدين اشترينا راحه وحلقوم من المحل اللي جمبه وانا تركتهم ورحت على السوق بسرعة (اللي بيقدر ينزل على سوق بورصة أحلى وأرخص من اسطنبول بكتير). طلعنا بعديها بالتلفريك بس هالمره زي الباص على الواقف وصلنا للمحطة الأولى ونزلونا قعدنا نص ساعة ورجعنا صراحة برنامج الرحلة مو كويس مقارنة بالشركات التانيه لانهم بيطلعوا لاعلى الجبل، She Tours لاتروحوا معهم لأنه الرحلة كانت عباره عن تسوق أكتر من أي شىء تاني والمهم انه الدليل السياحي مابتعرف عربي مع انه الكل عرب وكان همها بس تاخد العموله. و مع انه الناس بحبوا بورصه بس احنا ما حبيناها يمكن بعد ماشفنا سبنجه ما في مكان حلو.

    وهون خلصنا الجزء الثاني وان شاء الله يعجبكم والى اللقاء فى الجزء الأخير

  7. #7
    مسافر نشيط
    تاريخ التسجيل
    Sep 2012
    المشاركات
    30

    معااااك مكملييين
    حاسة حالي بعرفك من زمااااااااااااان وكانك قاعدة بيننا وعم تحكي وخصوصا التفاصييييييييييييييييل

  8. #8
    عضو سفاري الفخري الصورة الرمزية شاطيء الغروب
    تاريخ التسجيل
    Jan 2006
    المشاركات
    10,853

    ما شـاء الله تقريـرك جميـل جـِداً و ثري بالمعلومـات الهامـة

    تمنيـت إرفـاق بعض الصـور لنشارككم أجـواء الرحلة

    لكِ كل الشكـر و التقديـر

  9. #9
    كبار شخصيات سفاري
    تاريخ التسجيل
    Sep 2012
    المشاركات
    2,141

    اقتباس المشاركة الأصلية كتبت بواسطة المهندسة نور مشاهدة المشاركة
    معااااك مكملييين
    حاسة حالي بعرفك من زمااااااااااااان وكانك قاعدة بيننا وعم تحكي وخصوصا التفاصييييييييييييييييل
    خلص ان شاء الله احنا خوات فى الله وأنا هيك حاسه انه هالمنتدى الرائع كأنه بيتي وانتوا كلكم اخواتي وان شاء الله باقي التقرير قريبا.

  10. #10
    كبار شخصيات سفاري
    تاريخ التسجيل
    Sep 2012
    المشاركات
    2,141

    اقتباس المشاركة الأصلية كتبت بواسطة شاطيء الغروب مشاهدة المشاركة
    ما شـاء الله تقريـرك جميـل جـِداً و ثري بالمعلومـات الهامـة

    تمنيـت إرفـاق بعض الصـور لنشارككم أجـواء الرحلة

    لكِ كل الشكـر و التقديـر
    حياك الله أخي أبو جنى يعني أنا تلميذه صغيره عندك وعند باقي الأخوه والأخوات، وزي ماقلت فى بداية التقرير اني ما كنت أصلا مفكره اني انزل هالتقرير فى المنتدى أنا عملته عشان أولادي أو صاحباتي اذا حد فكر ينزل يكون عنده معلومات جاهزه، فعشان هيك الصور كلها شخصية ما بينفع تنزل على المنتدى بس اذا الله كتب ونزلنا على الشمال التركي باذن الله رح انزل صور.
    أسعدني مرورك جدا ولك كل الشكر والاحترام

صفحة 1 من 7 123 ... الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
X