السلام عليكم ورحمة الله وبركاته ..
طبعا هذا اول موضوع لي بهالمنتدا وانشالله يكون فاتحة خير
لاحظت يوم دخلت القسم ان اغلب المواضيع استفسارات عن كوريا
وعاد اختكم بالله خبره فحبيت افيدكم
انا سافرت لاروبا وسافرت لسرلانكا وماليزيا وتركيا
لكن اكثر بلد عجبتني هي كوريا ومع اني مو من نوع البنات اللي يحبون الكورين ومسلسلاتهم وخرابيطهم
بس حبيتهم بعد السفره
والاحظ كثير من الناس يسافرون مكان ولا يعجبهم
طيب ليه ؟
لانك رحت وانت ماتدري وش السالفه المهم انك تحجز فندق وتذكره وميزانيه
واشهر الاماكن وتقول يالله قدام
وهذا اكبر خطا
مفروض قبل السفره تعرف كل شي عن الدوله
انا عن نفسي اول مانخطط لسفره ابحث عنها عن اماكنها وابحث تقارير عن ناس سافروها وهذا اهم شي
تكون عندك خلفيه
عشان كذا اعصب من بعض الاعضاء لما يقولون رحلتنا مو موفقه مع اني اكون رايحه لنفس الدوله بس اشوف ان كلامه غير
سوري طولت عليكم نجيكم بالزبده
طبعا انا سافرت كوريا من سنة تقريبا وعاد امي اعجبتها كوريا وصممت الا نروح هالسنه
وانشالله بنروح قريب وراح نغير عن الجدول الاول بشوي
اول شي كوريا من سنة 2010 بدات تهتم بالسياحه
وشعبها راقي بشكل مو طبيعي
يحبون المساعده ودائما مبتسمين ويحترمونك مهما كان لبسك ولا شكلك ولا جنسيتك
طبعا بالنسبه للغه مو الكل يعرف انقليزي لكن تمشي حالك بالحركات
لكن احنا مشتنا اختي اللي تحب الكورين بشكل مبالغ وهي اللي خلتنا نسافر لها
لدرجه انها وهي تتكلم واحد سالها لكم كم هنا اشرت بايدها 5
قال خمس سنوات ؟ قالت لا 5 ايام
اخونا بالله انهبل وحالته حاله الا تعلميني كيف تعلمتي النطق الكوري والكلام بطلاقه
من ناحية الاكل بسيؤول متوفر بكل مكان
بشارع ميونغ دونغ فيه ماك وسالنا اذا الزيت حلال ولا لا
وفي مطعم عربي اسمه الزعفران
طبعا فيه مطاعم عربيه كثير بشوارع ثانيه
بالنسبه للميزانيه هي غاليه شوي خصوصا اذا كان اللي بالسفره بنات وحريم بتخلص ميزانيتك على الشراء والخرابيط زي ماسويت
وبالنسبه للمواصلات ( التاكسي )
وفيه نوعين نوع غالي ونوع ارخص والفرق ان هذا مريح اكثر
(الميترو)
سريع واغلب مشاويرنا فيه وممتع وارخص
بس يبيله احد يعرف له
(الباص) ماجربنا الا مره او مرتين
واي استفسارات انا حاضره حتى لو تبون جدول لسفرتكم بس علموني كم يوم بتقعدون
وانصحكم فيها وانشالله تروحون وترجعون بالسلامه