...الاستعداد للسفر...
انا من قبل 5 سنوات و انا حاطه في بالي اندونيسيا و كان اللي يسالني عنها يحسبني رحت لها لانو كنت من هداك الوقت و انا اجمع المعلومات ...
السبب:
رحت على شهر العسل على ماليزيا و لانو ما كان في تخطيط للرحله ابدا (قبل الرحله بــ4 ايام اشترينا التذاكر) و ما عرفنا عن (افا موسى ) الا قبل الرجوع بيوم... فما مدانا اننا نروح ...
بحثت في النت لقيت انو (تامان سفاري في اندونيسيا نفس افا موسى من هنا بدأ المشوار..
و سنه و رى سنه و انا استنى السنه اللي زوجي يقول لي فيها (هيا اتلمت فلوس السفر) لانو زوجي كان حاطط في بالو انو ما يبغى يروح الا فنادق خمسه نجوم يعوض عن شهر العسل لانو ما اخدنا الا فنادق 4 و 3 نجوم(طبعا بحكم انو دوبوا خلص الشقه و الفرح ..
الين ما جات دي السنه و الحمدلله و تم الحجز على الخطوط السعوديه من قبل الرحله بــ شهر و 4 ايام, و من باب (استعينوا على قضاء حوائجكم بالسر و الكتمان ) ما جبنا سيره لاحد بس هنا في المنتدى لانو كنت باسال و استفسر ..
بس جات على راسنا
اخو زوجي يبغوا يسوو لو الملكه
حقت الرجال ... قلت لزوجي قول لحماتي عن موعد السفر لانو تذاكرنا (V class)يعني ما نقدر ترجعها و لا نغير الموعد ... راح و قالها .. الحمدلله تم بحمدلله و سارت الملكه قبل السفر ..
اهل العروسه قالو يبغووا يسوو شبكه
فزوجي قال لاخو الكبير على موعد السفر عشين يكلم ابو البنت و يغيروا يوم الشبكه لانهم حجزوو و نحن رح نكون مسافرين ..<<<هادا كللو بالسر و الكتمان هع هع ..
الحمدلله و تم تغيير الموعد و تمت الامور على خير
يوم الجمعه <<قبل السفر بــ5 ايام... صحيت و الاقي الخبر المفجع في التلفزيون:
زلزال اليابان ...خلااااص سرت بس ابكي مني عارفه ايش بدي اسوي في عمري ايش السفره دي اللي مهي راضيه تزبط و طبعا في الاخبار كانو بيجيبوا على الزلزال ممكن يضرب اندونيسيا و من دا الكلام ... و انا كل يوم استخير بعدد الصلوات و قلبي في ركبتي و في نفس الوقت مصممه على السفر و اقول ما رح اكنسل الا اذا السفاره ما خلتنا نروح و قالت لنا اجلسو في السعوديه ...
((و لكم ان تتخيلوا كل البشر عرفوا اننا مسافرين و كل مين يفتي من عندوا اخبار))
يوم الثلاثاء<<قبل الرحله بيوم:بنت اخت زوجي شفتها على المسنجر في الصباح و قالت لي: نحن اليوم خرجونا من المدرسه و قالوا لنا بكره كمان لا تجوو عشين احتمالية سقوط امطار شديده
و برضوا لكم ان تتخيلوا حجم الرعب اللي دب في قلبي
لانو من مكه للمطار لازم نمشي من المنطقه المنكوبه في جده ... او اننا نروح على طريق عسفان .. اتصلنا على الدفاع المدني و قال لنا الطريق مافيه شي .. و نحن رايحين على المطار نزل هتان
دمي نششششششششف ... بس الحمدلله وصلنا على المطار بالسلامه ..
طبعا سار لنا موقف في المطار :
زوجي كان حاجز من زمان على كرسيين و اعطوها طبعا شي تااااااااااااني و المصيبه انو كرسي في الشرق و التاني في الغرب ... و رحنا على مكان اسمو على ما اعتقد (خدمة العملاء) و سوو لنا الكراسي لانو مو بس نحن في غيرنا كتير
<<<تعبت من كتر الاحداث و من كتر الكلام و ان شاء الله الاقيكم في الحلقات القادمه اللي ان شاء الله تكون ممتعه ..
ملاحظه:
كل الصور اللي في دا الجزء و الجزء الاول من الانترر نت ...