اخواني اعضاء منتدى سفاري و منتدى المسافرون العرب السلام عليكم ورحمة الله وبركاته وبعد
هذا ماوعدتكم به وهو تقرير متواضع عن رحلتي الاولى لبلاد العمة ( اندونيسيا ) واسأل الله العظيم ان اوفق فيه فوالله انني كلما ازور مكان حتى ولو كنت مرهقه ومتعبه اتذكركم واتذكر وعدي لكم ووقفتكم معي فلا يزيدني ذلك إلا اصرار وإلحاحا بأن اخذ اكبر قدر ممكن من الصور لخاطر عيونكم وعيون هذا المنتدى الغالي
في البدايه اقدم لكم معلومات عن الرحله
الرحله مكونة مني انا محدثتكم - زيزفون - وزوجي الحبيب الله لايحرمني منه (ابوعلي) - واخي الكريم الفاضل شقيقي إياد
تاريخ الرحله 25 - 7 - 2007
الشركه الناقله طيران الاتحاد
سعر التذكره 2280 ريال
كانت رحلتنا بعون وتوفيق من الله تعالي يوم الاثنين من مطار الملك عبدالعزيز بجدة ( الصاله الاجنبية ) في تمام الساعه الخامسة عصرا
اول مابدأ استقرار الطائرة في الجو قدمو لنا بعض التسالي ( بسكوت مقرمش ) على قولتهم من مخابزنا ثم عربة فيها اربع انواع العصائر اناناس – برتقال – تفاح – مياه وبصراحه افضلها واحسنها الاناناس
بعد ذلك بربع ساعه قدمو لنا وجبة رائعة ويختار الواحد مابين دجاج او لحم وبعدها بعشر دقايق قدمو لنا شاي وقهوه
بصراحه طيران الاتحاد رائع وخدماتهم اروع ولكن احيانا بعض المضيفات ماعندها لباقة وهذا الشيء واجهني في طيران الاتحاد بالذات يعني من بين الاشياء التي مرت عليه طلب زوجي من احدى المضيفات سكر علشان الشاي ولكنها رفضت وقالت عندك سكر يكفي طيب زوجي يحب الشاي معتدل كيف بالله يشرب شاي بدون سكر او سكر خفيف قلت له يالله اصبر من صالحنا حمية اجباريه هههههههههههههه
استغرقت الرحله ساعتين وربع كانت حلوه ومسليه ماحسينا فيها غير هذي المضيفة الي رفضت تزويدنا بالسكر زعلت منها مره مره
المهم وصلنا مطار ابو ظبي في تمام الساعه الثامنه ومعليش لعدم الدقة في تحديد الوقت لان الطياره استغرقت وقت في مطار جدة بعد صعودنا حتى تحركت
ولما وصلنا لمطار ابو ظبي بقيت جالسة على المقعد يقول زوجي يالله يابنت الحلال انزلي قلت والله ماانزل سألني ليش قلت له كيف انزل مانت شايف الزحام قدامي عيب خلنا نجلس شوي !!!!!
المهم طفش الرجال وبصراحه خفت الزحمة شوي بقي خمس اوست ركاب جالسين ياخذون شنطهم وعفوشهم والطريق مفتوح قدامي قال ابو العيال يالله نزلنا قلت لا لا والله ماانزل المهم زعل الرجال بس بإبتسامة مجاملة يقول ليه ماتنزلين وجلست المظيفة تناظر فينا وفطست من الضحك جالس الرجال يشد فيه علشان اتحرك وانزل وانا حلفت ماانزل وبعدين قال بالله وش فيك؟؟؟ – صعب عليه المسكين وقلت خلاص بعلمك بس عليه الامان ؟؟؟
قال خلاص عليك الامان!!!
قلت ابغى الطياره تخف من الزحام شوي علشان اخذ صور للتقرير حقي لما ارجع مره ثانية وهذي صور من الطياره مع الموقف الي حصل فيها
بعد ذلك توجهنا لصاله الانتظار في المطار وجلسنا فيها حوالي خمس ساعات تخللها وجبة مقدمة من طيران الاتحاد ثم جوله بطيئة على السوق الحر والله الله من اسعار فيه تفتح النفس ( غاليه موت ) وكنت مصره اشتري عطورات من هناك بس بعد ماشفت الاسعار الله يرضى على اسعارنا
المهم في تمام الساعه الثانية صباحا تقريبا بتوقيت ابو ظبي توجهنا على بركة الله الى مطار جاكرتا كان زمن الرحله حوالي ثمان ساعات وربع تقريبا ولكن انا من عندي خلوها تسع ساعات كامله
تخلل هذه الرحله وجبتنان رئيسيتان وثلاث وجبات خفيفه عباره عن تسالي من ( مخابزهم ) وشاي وقهوه ومشروبات كما اسلفت وكان هذه المره موقف مع المضيفة زعلني مررررره وهو لما طلبنا بطانية قالت خلصت البطانيات كلها وبصراحه شفت بعدها خمس بطانيات اخذتهم لركاب الدرجة الاولى وتركتنا نموت من البرد حتى ان فيه موقف طفل صغير ( حوالي اربع سنوات ) مسكين رجع من شدة البرد في الطياره وجالسه امه تطلب بطانية يقولون مافيه بعد زعلت انا وكلمت المظيف والحمدلله طلع يتكلم الانجليزية وقلت الولد تعبان وكلنا تعبانين من البرد شوفو لنا صرفة المهم الرجال ماقصر راح على التكييف وخففه لدرجة قلنا ياليتنا جلسنا برداانين ولا هذا الحر حسبنا الله ونعم الوكيل المهم ما انعشنا هو قرب وصولنا وعندما طلينا من نافذة الطائرة شفت مناظر في حياتي ماشفتها ولا توقعت اشوفها سبحان الله العظيم وقلت لازم الغالين في منتدى سفاري يشاركوني هذي اللحظة وهذه بعض المناظر للسحب
وبعد هبوطنا توجهنا للكونتر في المطار لتعبئة بياناتنا واخذنا الفيزا بسعر 25 دولا ر لمدة شهر
اعزائي نكتفي بهذا القدر هذا اليوم بصراحه يااخواني عندي الكثير منالصور الرائعة ولكن ظروف الشبكه في منطقتنا حالت دون تنزيلها كل شوي تفصل الشبكه حوالي اربع ساعات وانا اكتب هذا التقرير ولا اعلم ماهي النتيجه اتمنى انها تحوز على رضاكم ويكو ن التقرير بالطريقة التي اتمناها ولي عنده طريقة لتحيمل الصور غير المتعارف عليها ياليت يزودنابهاعلى امل اللقاء بكم انشاء الله في الحلقة القادمة ليلة سعيده واحلام اسعد واي استفسار او سؤال انا تحت امركم
ملاحظة الي ماتظهر الصور عنده ياليت يخبرني وانا ارسلها له كملف مضغوط