مرحبا
الاسبوع الماضي كنت في قطر و قلت بجرب مطعم الاعظميه العراقي حيث قرأت عنه الكثير هنا
كان المطعم مزدحم جدا ... و نفسيه العاملين براس خشمهم ... سأل زوجي الويتر اذا فيه طاولة فاضية فقال ماتشوف في ناس جالسين عليها ؟؟ فطبعا زوجي ما قصر و أخذ حقه و اشتكى عليه قال انا اسال اذا فيه طاولة فاضية .. العامل قال انا ضنيتك تسال عن الطاولة هذي ........ حتى لو كان يسال .. هل هذا رد ؟؟؟؟ وين الذوق واللباقة المفروض تواجدها باستقبال الزباين
المهم تم توفير طاولة بصعوبة ... والانتظار لمده طويله جداً حتى وصل الاكل ....
وكان جنبنا عائلة قطرية جالسين على طاولة فيها بقايا اكل الناس اللي قبلهم و يا سلام على الذباب مسوي حفلة
و الرجال صابر لين نفذ صبره و لما طلب منهم ينظفونها .. قالوا انتظر قال لهم انا الآن صار لي نصف ساعة جالس على الطاولة انتظر احد يجي ينظفها و بجلس ساعة لين تجيبوا الطلب .. يعني الغداء تحول لعشاء رد العامل بكل برود و احنا مو قاعدين نلعب احنا قاعدين نشتغل
وصل الاكل كان لذيذ للامانة مقبلات مشكلة و مشاوي و عصيرات ، بعض العصائر تأخرت و كنسلناها
بس لذة الاكل ما راح تستمتع فيه اذا الخدمه سيئة و العمال معكرين مزاجك و الذباب مسوي حفلة بالمطعم
للاسف هذي مشكلة بعض المطاعم يبدون بداية قوية لكن لما يشتهر المطعم و يكثر زباينه تشين اخلاقهم و يصير تعاملهم مع الزبون بفوقيه يعني احمد ربك انك حصلت على طاولة انتظرر و انت ساكت
انا عندي المطعم الناجح لابد من توفر نظافة المكان و بشاشة و لباقة الويتر و لذة الاكل اذا نقص واحد من هالشروط احط عليه اكس و ما اعيد تجربتة
انا اتفق مع الاخوان اللي بالمنتدى على ان اكله لذيذ .. لكن اعيب على المطعم تبطره على النعمة لما كثروا زباينة
يعني لقيت في المطعم المقابل له ( المرجان ) ما افتقدته في مطعم الاعظمية
لما جيت له 11و نص بالليل كان باقي نص ساعه و يقفل و مع هذا استقبلونا احسن استقبال و استئذنوا بطريقه لبقه هل تكفيكم نص ساعه ؟ لان راح نقفل الساعه 12 بس راح نجيب لكم الطلب بسرعة
طلبنا مقبلات حارة و باردة و عرايس كفته كانت لذيذة جداً و عصائر .... خدمة سريعة و لباقة و اكل لذيذ
اتمنى تتقبلون نقدي بصدر رحب ...
تحياتي