سفرتي لـ دمشق بالسيارة

[sultan 96]

السلام عليكم ورحمة الله وبركاته

وصلت لارض الوطن امس بعد زيارة قصيرة لمدة يومين للعاصمة السورية دمشق (الزيارة ليست بقصد السياحة )

بعطيكم ملخص للسفرة وامور تهم المسافر فالوقت الحالي :

نبدأ بالمسافة والطريق من الرياض لدمشق :

الرياض القصيم 340 كيلو

بريدة حائل مع الطريق الجديد حوالي 310 كيلو من الدائري حق بريدة عكس ماقيل ان المسافة 240 ..!! الطريق جيد ولكن انتبة من الابل فالليل


حائل الرديفة بعد ماتتعدى 5 اشارات داخل حائل وتروح يسار فيه محطة بعد حوالي 7 كيلو تعبي منها فل وتمشي حوالي 370 كيلو والطريق خطر خطر جدا الطريق كله منحنيات وطلوع ونزول ويشبك مع بعض وغير جاهز عكس ماسمعنا ولاتستغرب بان تشاهد رمل النفود على اجزاء من الطريق فخذ حذرك والسيارات الجاية توقع انك تقابلها على نفس طريقك يعني امسك اليمين دائما وانتبة من سيارات الشركة لانها منتشرة يمين ويسار الطريق تدخل وتطلع لك فالخط من الساعة 4 الفجر يشتغلون لاانصح بالسفر على هالطريق حاليا وبالمناسبة رجعت عن طريق عرعر حفر الباطن القيصومة النعيرية ابو حدرية الدمام وجلست فيها يوم لزيارة احد الاقارب


من الرديفة الى ابو عجرم الى القريات ومنها الى الحديثة مسافة الطريق 360 كيلو الطريق مسار واحد وفيه صيانه وتجهيزة ليكون طريق سريع وهم في البداية والشاحنات عليه بكثرة والطريق جزء منه مقبول وجزء سئ ونفس الشئ لاتتعدى سرعتك 110 والا بتتعب منهم .


الحديثة الازرق والزرقاء الى حدود جابر 190 كيلو الطريق سئ جدا جدا وتتعب وانت تقول سئ وانتبة من الصرافين لاتصرف من اي صراف اسمه الزعبي انتبة اصرف من حدود جابر افضل لك واصرف حق يومين بالكثير


من منفذ جابر الى دمشق 110 كيلو الطريق جيد .


المسافة الكلية من الرياض الى الحديثة 1370 كيلو ومن الحديثة الى دمشق 300 كيلو .


ترى مادخلت سوريا بسيارتي ولكن اللي يبغى تربتيك يحصل المحلات منتشرة فالحديثة


واي سؤال انا حاضر


القادم تقرير مبسط عن المعاملة من الجمارك والجوازات السورية والاردنية والسعودية

[نبض الحرف]

الحمدلله على السلامة ونحن بانتظار التقرير

[sultan 96]

الله يسلمك شكرا لك
...............
(المعاملة من الجمارك والجوازات السورية والاردنية والسعودية)

الجمارك والجوازات السعودية ماعندهم فوضى او مماطلة فالدخول والخروج

جمارك وجوازات الاردن ماعمري شفت اسوأ منهم ماعندهم تنظيم ولا احترام ومايستحقون ان الشخص يحترمهم ولو ترد عليهم اعتبر نفسك اخر واحد بتستلم الجواز والله بغت تصير مشكلة في منفذ جابر بسبب كلمة من مشرف حقير اردني مع دلاخة احد السعوديين المفهَين ...ولاتستغرب حقين الجمرك لو يطلب احدهم دخان ..!!!

فالعودة الجميع متذمر منهم العراقي متضايق والسوريين نفس الشئ فيه سوري كلمني يقول ان له 27 سنه ونفس هالمعاملة ماتغيرت وماعمرة شاف تحسن من الاردنيين .

الجوازات السورية بكل صراحة في منفذ جابر الدخول كان مميز وسلس رغم الزحمة الشديدة وكان فيه ضابط سوري محترم جدا والتنظيم رائع والجمارك نفس الشئ .

لكن فالعودة تغير الحال الى فوضى وطلب رشوة عيني عينك اعطيته جوازين والكروت ورجع لي واحد من الجوازات وقال حطلي فيه فلوس قلت انت موظف وتستلم مبلغ خدمتك وكان فيه شخص على الكمبيوتر يتبسم فقط ورجعت الجواز لنفس الشخص وختمه لي ورماه علي وبنفس شينه وكانه قاعد يخدمني ببلاش شف شلون قله الادب بغياب الضابط تكون .

[نبض الحرف]

شكرا على معلوماتك الحديثة .. ويظل تعامل موظفي الجمارك والجوازات على الحدود من الأمور التي لايمكن التنبوء بها

[sultan 96]

بالنسبة للسياح في سوريا من خلال المعابر الحدودية ووسط دمشق والشوارع الرئيسية فـ البلد وبعض الاحياء
الاحظ ان هالموسم اعداد السياح من السعودية قليلين جدا واغلب الموجودين من العراق وقليل من العوائل الكويتيه جميع السوريين ملاحظين هذا الشئ من سائقي التاكسي واصحاب المحلات والمطاعم والفندق اللي سكنت فيه (القصر الفرنسي)والفنادق المعروفة مثل الماجد وغيرها جميعها قريبه ومالاحظت تواجد السعوديين فيها بالشكل المعتاد كل سنه .

الامن هناك متشدد وفيه ملاحقة لاصحاب التكاسي اللي هم سبب المشاكل ويصتادون السائح .

فيه مراقبة لهم من الامن الجنائي بسيارات مدنية مظللة وبلباسهم المدني ودائما يوقفون اصحاب التاكسي وظيفتهم حماية السائح .

البلد ماشفت فيها مضايقات اي وقت تقدر تطلع ولاتنسون تاخذون جولة بالتاكسي بعد الساعة 1 الليل تتمشى فالبلد روووووووووعة الشام شوارعها واحيائها فالليل .

الاستغلال موجود ومافيه مراقبة من الشرطة السياحية اللي مفروض انهم يفرضون على كل مطعم قائمة بالاسعار خاصة اللي تكون بمكان كله شقق وفنادق .

اصحاب التكاسي اذا بدأ معك بكلمة بدك وبدك عندك خيارين مالهم ثالث اول واحد انك تنزل وتسحب نفسك وتخلص امورك بهدوء او انك توقفه وتمغطه كان لك نفس لانه مايقدر يشتكي او يسوي شئ الحين السائح مصدق باي شئ اذا مقابلك سائق تاكسي وهذا كلام احد العراقيين فالبلد .

واخر شئ بقولة ان البلد فيها اجاويد واجد وفيهم خير ويقدمون المساعدة بدون مقابل وترى المشاكل اللي تصير دائما سببها امور بعيدة عن السياحة الشريفة .

وشكر للجميع

[حليب ابو قوس]

الله يعطيك العافيه على هالنصايح

وهالموضوع والتوضيح بارك الله فيك

[helmyjanbi]

جزاك الله الف خير وكثر الله من امسالك والشكر الجزيل على المعلومات

[((عمدة جاكرتاء))]

الله يعطيك العافيه

[Dr3]

مشكور على هالمعلومات والله يعطيك العافية

[ثامر2006]

مشكور بس يومين ماتسوى تعب الطريق معان