المعركة الفاصلة بين ملك الزاجل والدهناء والصمان.. خطط .. استعداد .. مواجهة .. أحداث

[ملك الزاجل]

المشاركة الأصلية كتبت بواسطة kfshman

خلاص من يوم و رايح اذا مالقيت احد يكشت معك كلمنى وابشر باللي يجيك مجهز عمره و عندك ابو فيصل المكتشف تراه يعجبك بالكشتات

الحين عندك ابو فيصلين مهوب واحد لانك صعبت على وانت تدور خوي

عطنا الباقي عزيزي تراك شوقتنا

أستاذي الكبير / kfshman
تسلم يا غالي على هذه العبارات الجميلة

وأقول لك : مبارك عليك العشر وأسأل الله لكم القبول
والله العظيم أنه يسعدني أنك تخاويني ولي الشرف
وأن شاء الله يكون لنا رحلة خاصة معك ومع الأخوان
يكون فيها المتعة والفائدة ،
أسأل الله أن يغيثنا
بارك الله فيكم وفي جهودكم أخي العزيز
والله يحفظكم ويرعاكم
أخوك
ملك الزاجل

[ملك الزاجل]

المشاركة الأصلية كتبت بواسطة الكعبي

لا والقهر الي يقول لك انا مسخن

متابعين معاك للنهايه

يعطيك العافيه

أخي العزيز راعي قطر / الكعبي
لك مني التحية والتقدير
ومبارك عليك العشر ، وأسأل الله أن يتقبل
الحجج كثيرة لكن الصراحة أنني عاذرهم لأنه كان الجوا بارد جداً خاصة العام الماضي
تشكر يا غالي
ويعطيك أنت العافية
والله يحفظكم ويرعاكم
أخوك
ملك الزاجل

[ملك الزاجل]

المشاركة الأصلية كتبت بواسطة زياد2010

ماشاء الله عليك

هذي راح تكون قصة ألف ليلة وليلة

صراحة شوقتنا للكشتات

وعلى فكرة إذا ركب الباخص معاك قدام تراني في المقعد الخلفي

أو تدري أنا على سيارتي أتبعكم

هههههههههههه

كمل بارك الله فيك

أخي العزيز / زياد
لك مني التحية والتقدير والشكر
الله يحيك وهذه ابرك الساعات بمصاحبتكم
لكن قصة ألف ليلة وليلة جاية بالطريق لأنها كلها من الذكريات
أكرر شكري لك أيها المبدع
وأتمنى لك التوفيق والسداد
أخوك
ملك الزاجل

[سندبـاد]

هلا عزيزي ملك الزاجل

اتحفتنا بالمرحلة الاولى من التقرير

وانشاءالله توصل الوالدة حفظها الله بالسلامة

ونحن بأنتظار الجزء الثاني

[الباخص]

ابوعبدالله

شصاير شوقتنا وعلقتنا وتركتنا ..
مايصير يباه ..
اها عاد يالله متى تبدأ
كلنا شوق لسردك وتصويرك الأروع ...





اخوك المحب

[ملك الزاجل]

الأخوة الأعزاء / أهل الدار .... سفاري

ولا يهون (أبو عبدالرحمن )
لم أتأخر عليك ، للمعلومية الحلقة الثالثة بعد العيد من الآن أقول

السلام عليكم ورحمة الله وبركاته وبعد :

نكمل اليوم لكم

الحلقة الثانية

من فيلم :

المعركة الفاصلة بين ملك الزاجل والدهناء والصمان.. خطط .. استعداد .. مواجهة .. أحداث

بطولة : ملك الزاجل وأبو ياسر
وساعد بالإخراج المخرج العالمي / توني مازراني
تصوير المصور الخرافي / ماستر كي
سيناريو وحوار / ملك الزاجل

وعلى بركة الله نبدأ :

أحبائي سوف أتكلم في هذه الحلقة عن ما توقفت عنده في الحلقة السابقة وهي وصولي لمدينة بريدة بالسلامة ،

وسوف أرجع بكم قليلاً للوراء وهو عندما كنت في الطريق ، كنت بسعاة لا توصف وأحسست بل تيقنت أنني سوف أنتصر بالمعركة مع الدهناء والصمان

بقيادة أخوكم (ملك الزاجل ) وبالقائد الشهير الذي وضعته على الميمنة ،

القائد الشهم ( خالد بن الوليد ) أبو زياد آآآه آسف أبو ياسر أتصدقون يا أخوان أني ما أدري هو ( أبو ياسر ) أو ( أبو زياد )

لسبب وهو أن الأسماء حلوه وأسماء حديثة لا تنطبق على خوينا .

المهم هذه الفرحة كانت خلال الطريق ،

وكنت إذا تذكرت شي ناسيه أتصل على النشمي أبو ياسر وأوصيه يشتري ما طلبته منه ،

أتصدقون أنني اتصلت عليه يمكن أربع مرات كل مرة بعدة طلبات يوفرها ،

مرة أقول له لا تنسى لحمة حاشي ، ومره أقول له تكفى لا تنسى الفول ( كاليفورنيا بالخطة السرية ) ومرة خبز السلمان ومرة قرصان ومرة زنجبيل ،

والعجيب يا أخون أن أبو ياسر ما يقول إلا أبشر آمر ،

المهم بعد ما وصلت تقرياً الساعة 4 العصر ذهبت مباشرة للسنيدي قلت فرصة أشتري مطرقة للرواقات لكي تحمينا من سهام العدو القادم من الشمال ،

وأشوف لعل السنيدي لديه جديد ، ويوم وصلت وجدت المعرض كأنك في إحدى محلات حراج بن قاسم من الزحمة ،

دخلت بسرعة لأنني محدد الهدف أخذت المطرقة ب6 ريال ولفيت بالمعرض بسرعة لعلي أجد الجديد لكني لم أجد شي يلفت انتباهي ،

لحسن الحظ أن بيت القائد الجديد ( خالد بن الوليد ) قريب من عند السنيدي .

اتصلت عليه وقلت أنا عند الباب مد اللي(خرطوم الماء) نعبي التانكي ماء مد اللي وعبينا التانكي وقالي: قرب السيارة نحمل عدة المعركة .

حملنا الأغراض وبصراحة كانت كثيرة وحملنا معها فروة القائد

والعجيب بالأمر اللي تفاجأت منه وهو أن هذا القائد الذي سوف أعتمد عليه بالميمنة جايب معه ( كريم مرطب ) تصدقون أني استحيت من أني أشوته لأني مضطر لخدماته .

توكلنا على الله وانطلقنا وبعد ما مشينا تذكرت أني نسيت شاحن للجوال

والعجيب بالأمر انه جوال آيميت ( أسوأ جوال على الكرة الأرضية ) مرينا كذا محل ما حصلنا عندهم .

وجلست أفكر ويش الحل محتاج الجوال لأسباب كثيرة وهي أني مخزن فيه إحداثيات مريت عليها تزيد على 350 موقع من شعيب وفيضة ونقرة دافية .

المهم تذكرت أن المعزبة معها مثل جوالي ( مشخصه فيه ) ،

اتصلت عليها تحسب أني أسأل عنها وعن العيال ، ما تدري الضعيفة أني أبي الشاحن ردت علي وقالت:

حيا الله أبو عبدالله... وشلونك بشرنا عنك ، قلت أنا بخير .... أم عبدالله .. ممكن طلب قالت آمر .... قلت أنا بورطة ..... قالت مالك إلا ما يرضيك قلت ..... شاحن الجوال معك ..... سكتت شوي وردت قالت: ليش .... قلت : أنا في بريدة الآن ومحتاج الشاحن قالت : علشان كذا متصل أحسبك متصل تسأل عن العيال وعني قلت يا بنت الحلال لا تطولين علي أبي أمر آخذ الشاحن .. قالت : تعال لكن تدخل تقهوى ... قلت معي القائد الهمام البطل (خالد بن الوليد) ما أقدر الحين رايحين لميدان المعركة ردت علي وقالت : أنت إلى متى خبل ... قلت : حتى أنتصر بالمعركة .

المهم بعد ما قربت من البيت وكان الناس توهم طالعين من صلاة المغرب اتصلت على أم عبدالله ..وقلت لها طلعي لي الشاحن عند الباب أبي آخذه واطلع بسرعة ما أبي أحد يشوفن، معي رجال بالسيارة ، قالت : مهب على كيفك أدخل سلم على خالي توه جاي من المدينة المنورة قلت لو تحلمين أبي أمشي ....

وصلت للبيت وأخذت الشاحن وأم عبدالله .. تبي تسولف معي و أنا مشغول البال , المهم طلعت من الباب إلا خال المعزبة توه جاي من المسجد

ويمسكن وخذ تلزيم بالدخول للبيت للعشاء قلت معي رجال (أتحجج بصديقي) يوم دريت إلا الرجال راح لخويي وفتح الباب ونزله وقاله أدخلوا أحد يروح بالبرد هذا . ويجرجرنا ندخل، وأنا ملزم إني أمشي .

يا خوان والله العظيم أني ما شفت أحد أكرم من هذا الرجال بحياتي المهم قلت : يا دكتور " العائلة كلها دكاترة " و أنا معزم أني أمشي تكفى أعذرني .

سمح لي وودعته وقلت له دعواتك ومشينا على بركة الله لطريق الطرفية الموصل إلى ( قبة ).

يوم وصلنا إلى الطرفية وبدأنا نقرب من ساحة المعركة .... بدأ قائد الميمنة يلمح بالخوف ويقول شف درجة الحرارة بالسيارة حنا بالطرفية ودرجة الحرارة 6 درجات . ( موضح بالصور )




صورة درجة الحرارة بالسيارة
-


قلت لخوي البطل لا تهمك هذه والسيارة تمشي لا تهمك خربانة ، صدق الرجال .

وأخذتنا السواليف كان أهمها البنزيم الجديد ... ومن ثم بدأ الجوع يلعب (بملك الزاجل) محدثكم ..

قلت لقائد الميمنة ( إلا يوجد لديك قليلاً من الأكل ) قال لي مستهتراً ... هل جعت ... قلت له ... بلى ... أنا من فطوري بعد القمزة على بيتكم .... ضحك وقال لي .. أبشر ...

وقام وأخذ لفه للخلف وناولني حبة خيار .. وبعدها وحدة ثانية وثالثة ورابعة وبعدها قلت لخويي ما عندك غير الخيار ؟ يوم دريت يوم جابلي جزر ،

وقال سو ببطنك سلطة!

تلقون خوي مثل هذا البطل ؟ بعدها وصلنا إلى( أبا الدود) وفرقنا (لقبة ) ودرجة الحرارة تنزل . حتى وصلت 5 درجات ... الساعة 7 مساءاً، وأنا أهدي من روع البطل ... والرجال يقول كيف بالليل كم تكون الحرارة.



صورة درجة الحرارة بالسيارة .




وصلنا إلى قبة ونحن في قمت الجوع بالنسبة لصاحبكم البطل (ملك الزاجل) لكن بطل الميمنة ليس بجائع ،بلاكم ماتدرون ليش؟ ما طلع من بيتهم إلا وهو دابغه قرصان .

قلت لخوي أبو ياسر وين تبينا نتعشاء قال في مطعم من مطاعم قبة ، قلت له أبشر .

وفي الحقيقة أنني ما أحب الأكل بالمطاعم خاصة على الطرق فقلت يا أبو ياسر خابر لك مطعم بخاري على كيفك بقبة ....

ودخلته من شارع إلى شارع وفجأة إلا هذا مطعم بخاري مغلق شكل البلدية مسكرته . قلت يا أبو زياد .... لا يوجد مطعم شكل البلادية مقفلته ....

وش رأيك بس أضبط لك كبسة رز مع لحمة حاشي بسامودة ..... الضعيف وافق على طول وبعدها غيرت الوجه إلى الجنوب اتجاه الطريق الجديد بين قبة وسامودة .


كما في الخريطة المرفقة وهي من كتاب الأستاذ الكبير / الشلاش" الطبعة الثالثة" الذي أهده لي أبو ناصر قبل العيد




من أجل أن أكون دقيق معكم بالوصف للطريق باعتبار أنه جديد ولم يفتتح حتى الآن.

أول ما تدخل قبة يأتيك دوار خذ اليمين باتجاه الجنوب تمشي قرابة 4 ك يأتك بعدها موقع شركة الروسان التي تقوم بتنفيذ المشروع . على يسارك وبقربها شارع يتجه شمال شرق هذا هو الطريق الموصل إلى سامودة .

أعزائي :

قبل دخولنا الطريق الجديد سألنا عدد من الأشخاص للتأكد من الطريق وبينوا لنا أن الطريق بحدود 70 ك آخر 20ك ما زال تحت التنفيذ ، بدأنا بالطريق بعد التأكد منه ، حسيت أن المعركة بدأت فلزمنا الصمت قليلاً ثم بدأ الحديث عن البرد ، والفارس المغوار صاحب الميمنة ، كل ما جلس شوي قال أبو عبدالله .. ترى برد يدخل علينا ما أدري من وين ، ....
وأنا أهدي فيه ولهيه بالخيار والجزر وأقول له ... تصدق الخيار لذيذ والجزر رائع وأرفع من معنوياته المنهارة جداً ....

لكن فعلاً بدأ البرد يزداد ودرجات الحرارة تنزل كما تشاهدون

درجات الحرارة بالسيارة وصلت 4 درجات بعد ما مشينا 30ك



وهنا وصلت درجة الحرارة 2 درجة بعد تجاوزنا 50ك باتجاه سامودة




وهنا وصلت 1 درجة واحدة بعد ما قربنا من نهاية الطريق



وصلنا نهاية الطريق وسجلت هذه الملاحظات وهي:

1. مسافة الطريق 72ك . من البداية إلى النهاية .

2. الطريق خطر جداً بالليل توجد بعض الإبل لا بد من الحذر !

3. توجد بقايا العمل بالطريق من أخشاب للعبارات وغيرها.

4. لا توجد أي لوحة إرشادية .

5. يمر الطريق طبعاً ، بشعيب السهل العظيم الممتد من الشرق إلى الغرب .

6. يمر الطريق بالقرب بفياض البساتين من جهة الشرق وفياض البريكي كذلك.

7. يقطع الطريق عرق الدخول و خبة الدخول المشهورة .

8. بعد قطع العرق تتبين لك أنوار سامودة فيكون بقي على نهاية الطريق 20ك يجب أن تكون أكثر من حذر خاصة في وقت عمل الشركة .

9. السيارات الكبيرة الناقلة وسيارة الصغيرة تقطع الطريق ، و يكون حذر عند النهاية من جهة سامودة خاصة التحويلات التي تتجه شمال يوجد فيها رمل تحتاج إلى معرفة ( لا أنصح أحد بقطع الطريق بالليل للسيارات الصغيرة والنقل ) .

10. تحذير مهم لا تقطع الطريق من جهة الردم لأنه توجد علامات للمساحة عبارة عن أسياخ من الحديد الغير مرئي.


وبعد ذلك وصلنا إلى سامودة ليلاً كانت السعاة التاسعة مساءاً ، ونسيت أعلمكم أن خويي أبو ياسر كان متخوف من البرد فوعدته أنه يوجد بسامودة أوتيل نجمتين فيها دورة مياه _ أكركم الله _ وسخانه حارة – وسينما - فرد على ... أنت تستهبل قلت له والله أني صادق ...

وفعلاً توجهنا إلى الغرف التي بسامودة بالمحطة واستأجرنا غرفة ، وحصلنا بعض الغرف مستأجرة من قبل زملائنا أصحاب الطيور . حصلت صاحبي القطري " المري " و أبو شهاب ، لزموا علينا بأن نتقهوا معهم لأنه توهم خالصين من العشاء اعتذرنا منهم .

المهم نزلنا عدتنا، وأول شي صلينا المغرب والعشاء، وكبرنا ( الله أكبر، الله أكبر ، الله أكبر ......لا الله إلا الله....... ولله الحمد ) ثم بدأنا بالعشاء الذي وعدت به صاحب الميمنة .

صلحت العشاء قطعت البصل وكشنت للحمة وربصت الرز وقطعت ( الزلطة ) وخلال ساعة العشاء جاهز كما تشاهدون .

عشاء عجل




بسم الله





آسف يا أخوان على التوقف
وسوف أكمل لكم الحلقة الثالثة _ أن شاء الله _ في أقرب وقت

وسوف تكون أحداث الحلقة الثالثة ما يلي :

1. نفوذ أم عشر.

2. فياض أم عشر.

3. غرب الصمان .

4. العودة إلى سامودة .

آمل أن أكون وفقت بنشر هذه الرحلة ،،،،

أخوكم
ملك الزاجل

=
=
=

[nasser]

بعد هالعلوم وهالاستعدادات والله استحي اعلمكم برحلاتي

مشاء الله عليك شكلك محارب نمبر ون


ماذا عساني اقول

موضوع مميز حد الثماله ,,, سردك صورك كبستك كلها على بعضها رائعة


احترامي وتقديري يامعلم

[ريشة المسك]

موضوع رائع سجلنا من ضمن المتابعين

[ملك الزاجل]

المشاركة الأصلية كتبت بواسطة سندبـاد

هلا عزيزي ملك الزاجل

اتحفتنا بالمرحلة الاولى من التقرير

وانشاءالله توصل الوالدة حفظها الله بالسلامة

ونحن بأنتظار الجزء الثاني

أخي العزيز / سندباد
جزاك الله خير وأبشرك وصلنا الوالدة وهذا الفصل الثاني جاهز
تشكر يا غالي وأتمنى لك التوفيق والسداد
أخوك
ملك الزاجل

[الباخص]

ابوعبدالله لله درك ..









حبيبي بوعبدالله تسلم وتدوم على الشغل السنع والسرد الأروع والتصوير لكل صغيرة وكبيرة ولوكانت أكثر الصور لازدادت روعة وجمالاً
ياعز تالي على بوياسر المسكين أربع مرات متصل عليه !!
وبعض الناس لوتتصل عليه وتقوله جب شي هون من الكشته
وربي انه شقردي عض عليه بالنواجذ ذا ..




والثاني
لا وبعد مسميه خالد بن الوليد

كريم مرطب حقق شفايف وإلا قصدك فازلين وإلا كريم زان !!

ههههه عاد تصدق الباخص لازم ياخذ مرطب براطم عفواً اقصد شفايف لأني في نجد والمناطق الصحراوية تفزر ههههه شرايك فيها تفزر يعني تشقق وتقشر ..







ياعيني على الرومنسية في قصة الشاحن وأم عبدالله الضعيفة

تبيك تقهوى !! وأنت مسوي أشكل ومهتم بالشاحن !!

تكفى عرفني على خال المعزبة لاهنت بوعبدالله مدامه دكتور وكريم .. حج وقضيان حاجه ههههه






أما صاحبك الفارس المغوار
حسيت انه أرنب من كثر ماياكل الجزر

أعجبني تسجيلك للملاحطات على الطريق وماحصل فيه ..








ياعيني على العشاء مع السلطة مكبوبة فوقه ولا أروع آه لويشوفها ولي العهد الدحمي مسكين







لكن ترى مهوب بكفيك تأجل الحلقة الثالثة بعد العيد
عطناها اهها بس

يالله انهج












أخوك المحب
اللي يمون عليك ههههه