أهلا وسهلا بكم من جديد في موضوعي المميز دائما نكمل ماسبق
قمت من النوم صباح يوم الأربعاء الساعة 8 صباحا وشغلت الرسيفر على قناة الشارقة وقلت أقعد شوي على مايجي خويي (هو في الأساس على حسب كلامه انه راح يروح للسفارة اليمنية لأن عنده شغل هناك) المهم وقاعدت أقلب في هالقنوات إلين ماوصلت الساعة 11 فدق علي خويي وقال لي انه منتظرني تحت انا أخذا شنطتي ولحقته
طبعا نزلنا من الفندق ونزلنا المترو اللي بجنب الفندق اللي هو محطة جمال عبدالناصر وركبنا المترو إلى محطة الدقي ونزلنا وخرجنا من محطة المترو ودخلنا فيها عند ذيك الحارة ودخلنا ووصلنا البيت اللي هو ساكن فيه
بصراحة شقته مفروشة و هي عبارة عن غرفتين وصالة وحمام ومطبخ وفرن وثلاجة وغسالة أتوماتيك وتلفزيون بصراحة روعة بالنسبة لطالب جامعي وكانت الشقة إيجارها 1000 جنيه في الشهر (600 ريال) وهو ساكن مع صاحبه واحد سوري درس معاه البكالريوس في اليمن بصراحة روعة المهم وحطيت أغراضي وقال لي خويي أنا ماقدرت أروح للسفارة وراح أروح الحين قلتله يالا نروح ونزلنا كانت السفارة قريبة منه بالمرة يعني حدود 5 دقايق ووصلنا (على فكرة موقعها جنب الملحقية الثقافية للسفارة السعودية ) وخلصنا مشوارنا ورجعنا واحنا في الطريق قال لي خوي انه راح يروح المقهى (إنترنت يعني) عنده شوية شغل في الإنترنت وقال إذا كنت تبي تدخل على النت ماعندي مانع قلتله يلا (انا كنت ابغى اشيك على إيميلاتي ) ودخلنا وهنا أكبر مفآجأة الإنترنت عندهم يابلاش 2 جنيه في الساعة(1.3 ريال) بصراحة أنا أعجبني لا وتراه DSL 512 يعني كل شي تمام
المهم خلص خويي شغله ورجعنا الفندق احم اقصد الشقة
أذن الظهر ورحنا صلينا ويازين ذاك المسجد كان عبارة عن مدخل لأحد العمارات ضبطه وخلوه مسجد حقيقي يازينه المهم رجعنا الشقة وخويي طلب من ذاك المطعم اللي كلمتكم عنه عنه وقعدنا ندردش شوي وعرفت منهم انه في الإسكندرية فيه قطارات بس أصغر من اللي هنا في القاهرة ويسمونها الترام لكن في القاهرة يسمونها المتر (تدرون كيف عرفتها واحد من الشباب أصحابهم كان عنده في الشقة هو من الإسكندرية قام يقول نكتة ويقول فيه واحد صدمه الترام ومات أرسلو لأهله رسالة وقالوا له ان ولدكم مات يوم صدمه الترام فيوم قروا الأهل الرسالة ردوا وقالوا الولد مات مايهمنا لكن وش هو الترام ههههههههههههههههههـــ )
المهم جات وقت العصرية وقاللي خويي وش رايك نروح لمدينة 6أكتوبر قلتله يلا لكن في البداية أبغاك توريني طب القاهرة (أو طب القصر العيني زي مايسمونها هناك) فقاللي طيب ونزلنا الشارع وركبنا الباص ياما أحلى باصهم السعر للشخص الواحد نص جنيه (30 هللة) المهم وبدا يمشي لكن مرت نص ساعة وهو مامشى إلا يمكن 500 متر لأن ذاك الوقت كان زحمة فقام خويي ومسك يدي ونزلنا من الباص ومشى كم متر وخرج من الشارع الثاني وركب له تاكسي وقال وصلنا على طب القصر العيني وقام وصلنا فسأله خويي كم حقك قام يقوله مثل ماكان الأخ محمد الداري محذرنا(خله علينا) المهم وفي الأخير أخذ 5 جنيه ويوم وصلنا ولا بصراحة كان روعة المستشفى والكلية كانوا على تقاطع شارع آل سعود وشارع القصر العيني كانوا عبارة عن مبنيين الأولى لطب الأسنان ومن وراه الطب البشري وعلى يسارها المستشفى المركزي ويوم تمشي حوالي 400 متر تلاقي فرع من نهر النيل ويوم تطلع على شارع ال سعود تلاقي نهر النيل الأساسي ويقطع جسر يمونه جسر الجامعة الله ماحلى المنظر يوم تكون هناك وقت المغربية المهم شوي ولا خويي ماسكني في كتفي ويقولي بصوت واطي "تبغى تعرف وين السفارة الإسرائيلية" قلت كيف ليش هم لهم سفارة هنا قال ايه وقال لي على الجانب الثاني من الجسر راح تلاقي عمارة كبيرة حاطين فوقها دعية لشركة حلويات اسمها (Cadbwary) هناك عند العمارة الللي حنبها في آخر دور راح تلاقي السفارة وطالعت هناك لقيت العلم موجود المهم ماعلينا كملنا مشينا إلين ماوصلنا جامعة القاهرة وطبعا مرينا على طريق كان على يساره حديقة الحيوان وعلى يمينه حديقة ماأدري وش اسمها وقال لي خويي هذي الحديقة نسبة الأكسجين فيها 100% لأن كلها نباتات طبيعية المهم وصلنا للجامعة ومن هناك ركبنا الباص على ميدان لبنان عشان نروح لـــــ6أكتوبر وركبنا ويوم وصلنا كان وقت صلاة المغرب وصلينا المغرب وبعدين ركبنا الباص إلى مدينة 6 أكتوبر وكان سعر التوصيل 2.5 جنيه (1.5 ريال) المهم تصدقون ياخوان انه في مدينة كاملة على الطريق ويسمونها مدينة الشيخ زايد ومرينا بعد من طريق الإسكندرية الصحراوي المهم ويوم وصلنا سألو خويي ين نوقف لك قال عند مسجد الحصري واه من مسجد بصراحة من وجهة نظري وأكرر هذي وجهة نظرر ديكرها يأتي في المرتبة الثانية بعد المسجد الحرام بمكة المكرمة تصميم ولا أروع المهم وصلنا هناك وخويي اللي سميناه محمد دق على واحد صاحبه خلنا نسميه سالم مثلاً
سالم هذا واحد درس طب أسنان في الأردن وأخذ البكالوريوس وبعدين رجع للسعودية وقرر يشتغل فقالوا له انه لازم ياخذ خبرة خمس سنوات ايش يعني هالكلام ؟؟؟؟يعني انه لازم يشتغل في مستشفى حكومي 5 سنوات بدون مايعطوه راتب وبعد الخمس سنوات يبدأ يصرفون له الراتب المهم فسأل لهم سالم وايش الحل قالوا له تكمل الماجستير وتعوض سنوات الخبرة فقال لهم انه راح يدرس في مصر فقالوا له كل سنتين تعادل سنة خبرة يعني الماجستير 4 سنوات تعادل سنتين خبرة فقط المهم ماعلينا هو راح يدبر نفسه احنا وصلنا 6 أكتوبر قريب من صلاة العشاء فرحنا عند سالم هذا وكان مستأجر شقة مفروشة راقية جدا بجنب مسجد الحصري سعره بالشهر 2000 جنيه (مطخطخ الرجال) المهم قعدنا عنده وجا خويي اللي سميناه محمد يقول لسالم هذا واحد جاي من السعودية يبي يدرس طب وش تنصحه قام طب علي وقال لا يكون تقول أبغى طب أسنان قلتله لا اللي يعافيك أنا أبغى طب بشري قام بعد عني وقال ايه أحسن لك لا تغلط مثل غلطتنا المهم وقاعدين نتكلم شوي ولا أذن العشاء فنزلنا لمسجد الحصري وصلينا فيه ياسلام ماأروعه من مسجد المهم وخرجنا من المسجد فقام سالم عازمنا على شراب أول مرة أسمع به في حياتي واللي هو عصير الحب حب أو عصير الجحة زي مايسمونه بعض الناس ماأدري إذا كان هالعصير موجود في الرياض اللي يعرف مطعم يسويه يدلني عليه المهم وقاعدنا في المطعم حدود الثلاث ساعات واحنا قاعدين صارت حاجة غريبة جا شخص وماسك جرايد ويقول (اللي عاوز يقرأ جرايد بكرة ) معقولة جرايد بكرة تتوزع اليوم اجل ايش الفايدة منها ههههههههههههههههههــ المهم في الأخير قام سالم عازمنا على العشاء فقلناله لا مشكور ما قصرت لكن لازم نرجع القاهرة عشان أنا مسافر بكرة فقال لي خلاص
نسيت أقلكم واحنا في الطريق لقينا جامعات مثل جامعة مصر للعلوم والتكنلوجيا وأخير أحلى وأرقى جامعة جامعة 6 أكتبر بصراحة خيالية يعني كبيييير بدرجة ماتتصورها وبجنبها مستشفى الجامعة راقي جدا جدا جدا جدا لكن مشكلة هالجامعة كثرة المصاريف يعني حدود 50000 ريال في السنة (أنا أقصد كل المصاريف من دراسة وسكن ومصروف شخصي وغيرها ) يعني بصراحة جامعة بريتيش كولومبيا في كندا نفس هالسعر فايش رايكم أكيد الأفضل كندا لأن كندا الألى في الطب عالميا المهم وركبنا الباص ورجعنا وقام خويي محمد عازمني على مطعم بجنب الشقة حقته بصراحة أنا أكلت أكلة ولا أروع أكلة اسمها فاهيتا وهي عبارة سندوتش بداخلها إيدام باللحم أو شيء زي كذا المهم وتعشينا ورجعنا البيت وحطينا راسنا ونمنا
في اليوم الثاني اللي هو الخميس وفي الساعة 11 أخذت شنطتي وعلى المطار وركبت تاكسي طبعا حق التوصيلة 35 جنيه المهم وصاحب التاكسي يقولي أنا كمان شغال في المطار وقام موريني بطاقته وقالي أنا راتبي 500 جنيه وأسوق التاكسي عشان أكمل المصاريف لأن حق الإيجار 300 جنيه وحق الأكل الشرب 300 جنيه يعني يادوبك يكفي المهم وقال (شوف كيف الأستغلال) إذا كنت عاوز أمشيلك حاجة ولا حاجة هذا رقمي قبل ماتسافر دق علي وأنا أجيك إلين داخل المطار وأخرجك بس حيب معاك نوكيا 6600 يقصد الباندا وأنا أحاسبك عليه لأن يقولون عندكم رخيصة أنا في ذي اللحظة قلتله لا بالعكس هناك أغلى من هنا بكثير فقام يقولي خلاص لاتجيب ووصلنا الفندق وأعطيته 40 جنيه (كريم) ودخلت المطار ورحت عشان أقص البوردنج باس وقصيته وبعد كذا أخذت سرا عند الجوازات وأعطوني ورقة ثانية نفس اللي أعطوني إياها يوم وصلت وعبيتها وعطيتها للظابط وقام خاتم على الجواز حقي أعطاني إياه ودخلت طبعا قعدت في الأنتظار وأنا قاعد ولا ألاقي مقهى انترنت فرحت له ولقيته مطفي فسألت واحد من الناس كيف أدخل على النت قال رح لقسم الأستعلامات وهم يدلوك فرحت لهم وقلتلهم أبي انترنت فقالوا لي رح عند هالبنك وكان قريب مني وادفع 6دولار وجيب الأيصال قالوا الـ6 دولار يخليك تستخدم النت لمدة 37 دقيقة كييييييييييف مو تونا كنا طيبين كان 2 جنيه للساعة و انتو تقولون 6دولار فقلتلهم لا شكرا بطلنا ورحنا وقعدنا في الانتظار الين مافتحت البوابة ودخلنا فيها وركبنا الباص وودانا الين الطائرة وركبنا بصراحة ما كان في زحمة بالمرة حتى أنا استغربت كيف يقول انه مليان أنا عن نفسي أخذت كراسي حق 3 أشخاص المهم وأيضا تأخرت الطائرة بسبب بسييييط وهو أنهم تأخروا يحطون الوجبات في الطائرة وأقلعت الطائرة ويوم وصلت الرياض وقفت بعيد عن المطار فاحنا مستغربين المفترض تقف عند البابة ويخرج الناس عن طريق الأنبوب لكن هذا امصار فسألناهم ليش فقالوا راح يجي الباص ويأخذكم المهم وجا الباص بصراحة فرق كبيييير بين الباصات اللي هنا واللي هناك أكيد اللي هنا أحسن ووصلنا المطار وخرجنا
وتوتة توتة خلصت الحتوتة
في أمان الله
أتمنى اني أكون أفدتكم في هالمعلومات البسيييييطة
وللمعلومية فإني الآن أجهز نفسي للذهاب إلى جامعه صنعاء للعلوم والكنلوجيا
لييييييييييييييييييييييييييييييييششششششششششششششششش ششششششششش
لسبب بسييييييط أنه الدراسة بدأت في مصر وهم لسا ماأرسلوا لي خطاب القبول
وهذا مايعني انهم رفضوني لأنهم ل رفضني كان أعطوني رد بالرفض لكننننننننننننييي كلما اتصلت عليهم قالوا الأسبوع القادم
فما أدري هل في أحد يقر يخدمني ويروح لإدارة الوافدين ويعرف السالفة بالتفصيييييييييييللل أرجو الرد عبر الخاص
في أمان الله
وراح أدور على سفاري اليمن عشان أبدأ أحط مواضيعي فيها إلا إذا ,,,,,,, ومن يدري
وانشاء الله راح أحط ملخص مختصر بسييييط عن الأوراق المطلوبة والتواريخ وأرقام العاتف عما قريب فانتظروني
أخوكم
عثمان بن أبوبكر بن عمر باعثمان (لا تقولون انه اسمي ناقص كلمة علي عشان يكتمل الخلفاء الراشدين فأنا بإذن الله أبو علي وبالمناسبة لي أخ اسمه محمد يعني كل شيء تمام)
الرياض
حي ....................(لا هذي خصوصيات)
02-10-2006, 01:51 PM
العرض العادي
