السلام عليكم
أنا أتوقع بإذن الله أنه هالعدد راح يكون آخر عدد بإذن الله .....نتابع ونشوف
أنا انتهيت من تسليم أوراقي ورجعت للفندق وطبعا انتو تدرون انه الصواريخ والمفرقعات في بطني شغالة المهم وطرت على ذاك السرير وحطيت راسي ونمت طبعا أنا قلت الحمد لله انه دورات المياه (الله يعز السامع) قريب من السرير وانتو تدرون ليش المهم كانت الساعة 11.30 ونمت لين 2.30 (لا تقولون افا هذا ما يصلي ترى أنا مسافر ومن حقي اني اجمع الظهر مع العصر) طبعا يتخلل هذا النوم الذهاب إلى ................ ماعلينا يوم صحيت خف الوجع شوي ولا ألاقي خويي اللي سميناه محمد داق علي ويسلم علي وسألني إذا كنت تغذيت ولا لا (طبعا هو داري اني شريت ذيك المرة من مطعم حضرموت وعرف السعر ) فقلتله لا فقال هذا مطعم اسمه(.................) ناسي الإسم يسوي لك مندي على كيف كيفك وسعره رخيص مرة قلتله يعني كم قام قالي 12 جنيه والتوصيل من 5 إلى 10 جنيهات (طلع 7 جنيه) واعطاني رقم المحل ورقم جوال صاحب المحل (اللي يبغاهم يراسل على الخاص) واتفق على اننا نتقابل المغرب فقلتله صل المغرب وتعال بعدين عشان نتمشى المهم ودقيت عليهم وطلبتلي ذاك المندي وقالو بنيجي بعد نص ساعة انا توقعت انهم راح يتاخروا فعشان كذا قلت لصاحب الفندق أنا رايح أأكد الحجز وإذا جاو حاسبهم وانا أدفع لك بعدين قالي طيب ونزلت وسألت على مصر للطيران فأعطوني الوصف اللي هو قريب من الفندق (أظن أني قلتلكم انه الشارع اللي أنا ساكن فيه كله مكاتب سفر وسياحة ومكاتب الخطوط الجوية للجميع ) المهم مرة من المرات قبل هالوقت كنت مار على ذا الشارع ولقيت الخطوط الجوية الكويتية وشفت عند الباب الكلام هذا
تحذر الخطوط الجوية العملاء بأنها غير مسؤولة عن عمليات بيع التذاكر التي تتم خارج مكاتبها من قبل أشخاص
طبعا واحد مثلي مايدري وش السالفة يقول حاضر وعلى أمرك المهم ولا طلع كل مكاتب السفر والسياحة حاطين هذا التحذير ومن بينهم مصر للطيران ويوم وصلتلهم ودخلت شفت ذيك الزحمة الله لا يوريكم إياها وأخذت لي رقم كان الرقم اللي اخترته يفرق عن الرقم المعروض بعشرين رقم فأنا قلت وش يصبرني فسمعني واحد من العملاء فقام قالي اذا انت مستعجل رح لاي فندق ينتهي اسمه بكلمة (هيلتون) راح تلاقي مكتب مصر للطيران وماراح يكون زحمة أنا قلتله طيب وش أقرب مكان قام يقولي رمسيس هيلتون واعطاني الوصف بصراحة انا شكرته وطلعت من المحل ولا واحد يمسكني ويقولي عاوز تأكد حجزك ولا حاجة (قلتله ايه )قالي رح المكان اللي في ذيك العمارة (أنا في ذا الوقت دق ناقوس الخطر في عقلي وذكرت الكلام المكتوب) أجل انتو اللي محذرينا منكم قلتها في نفسي وقلتله لا أنا الحين مستعجل قام قالي ماتاخذ دقيقتين قلتله لا معليش المرة الجاية قام سابني وتركني
المهم ومشيت ومشيت الين ماوصلت إلى فندق رمسيس مرورا بميدان رمسيس (هذا الميدان يقص الناس منه تذاكر الباصات وأظن القطارات ) طبعا مريت على كل مكاتب الخطوط الجوية وفي الأخير يوم وصلت ولا ذاك الحارس حق الفندق يقول لي انه هذا الفندق بالذات مافيه مكتب طيران أنا بصراحة تحطمت وقلتله طيب وين أقرب فندق قام يقولي فندق النيل هيلتون اللي على النيل قلنا يلا نمشي وش علينا ووصلنا الفندق ولكن صار لي موقف عجيب دخلت الفندق وسألت عن مصر للطيران فقالي برا الفندق عند جنينة الفندق قلتله طيب وسألته بلهجتنا هنا (فيه عندكم موية) أنا قصدي موية للشرب فقالي ايه هناك ورا العمود فرحت ولفيت العمود العمود ومالقيت شيء رجعت قلتله وين الموية قالي انت عاوز موية للشرب ولا الحمام قلتله لا أنا أبغى موية للشراب فقام يقولي هناك (غريبة أول مرة أسمع واحد يقول أبي موية يعني أبي الحمام ) المهم رحت الجنينة على كلام أخونا في الله وصلت مكتب مصر للطيران فدخلت فيه وسألت واحد من العملاء وين أأكد الحجز فقالي أنت شركة ولا مسافر قلتله لا مسافر قالي تاخذ ذاك الدرج وينزلك تحت عند قسم المسافرين ونزلت وأخذت الرقم وقاعد أنتظر دوري
طبعا في البداية أبغاتكم تعرفون هذي المعلومات البسيطة
الذهاب إلى مصر الأحد 23/7/2006
الذهاب للسفارة الإثنين 24/7/2006
تسليم الأوراق لإدارة الوافدين الثلاثاء 25/7/2006 وهو نفس اليوم الذي قررت فيه الذهاب إلى مكتبة مصر للطيران
أنا بصراحة ماحبيت أقعد في مصر كثير لأني أدري إني بإذن الله راجعها فقلت أخلي السياحة في ذاك الوقت أحسن مع إني خلال هاليومين تسيحت في مصر لين قلت بس لكن مو ذاك الزود
طبعا أنا من الرياض كنت مخطط إني أرجع الخميس أو الجمعة فقالي الموظف الي في مكتب السياحة حجز العودة ما في إلا بعد شهرين لكن إذا انت ناوي ترجع مر على مصر للطيران وهم لهم طرقهم انهم يخلوك ترجع في هذي الأيام لكن لا زم تدفع لهم (أنا مأقصد بقشيش)
المهم نرجع لموضوعنا لاحظ اني الحين أنا لي في مصر تقريبا 3أيام فيوم جا دوري ورحت عند الموظف وأعطيته التذكرة وشافها جا قالي نظام التذكرة حقك مايسمح لك ترجع (وش تقول) إلا بعد أربعة أيام من وصولك أو تدفع غرامة قدرها 180 جنيه أوف يعني (120 ريال ) ليش هذه كله بعدين سألته طيب يعني أقدر أرجع يوم الخميس قال ايه فقلتله طيب شوف على يوم الخميس فشاف وقال للأسف ما في وسع في الطائرة المهم فدقيت على الوالده وقلتلهم على السالفة فسألوني كم باقي عندك من الفلوس قلتلهم باقي .......ريال (هذا شيء يخصني لا أحد يسألني بعد كم بقى لي) فقالو طيب بنتشاور في الموضوع وبعدين ندق عليك قلتلهم طيب لا تطولوا وسكرت ورجعت الكراسي مالة الإنتظار (على قولت المصريين الأنتريه) وشوي ويدقوا علي أهلي ويقولوا لي ادفع المبلغ (كيف لا مستحيل توني ما سويت سياحة في مصر) طبعا أنا ماأرد لهم كلام وقلتلهم حاضر ورحت وقلتله خلاص راح أدفع لكني سألته أنا الحين ماعندي إلا 100 دولار (للمعلومية: 1 دولار=3.75 ريال=5.73 جنيه مصري) فقال لي مانقبل دولارات لازم تصرفها فقلتله طيب وين أقرب بنك فقالي في الجنينة فقمت طالع الدرج إلى فوق وخرجت من المكتب ومشيت تقريبا 100 متر في نفس المكان ولقيت بنك مصر (على ماأظن) وصرفت 100 دولار إلا(عاد انتو احسبوها كم جنيه تطلع) ورجعت للمكتب وأخذا رقم للمرة الثالثة ويوم جا دوري قالي ها اش قررت قلتله ليش وهو انا عندي اختيار مالي إلا أدفع وطلبت منه يتأكد مرة ثانية حق يوم الخميس فراح يتأكد
مصر لطيران مقسمة الدرجة السياحية إلى 7 أقسام على ماأظن طبعا أقصد الموقع من الطائرة فكل ماكنت ورا كلما رخصت سعر التذكرة فعشان كذا أظن إني كنت في الرابعة فقام يقولي نرقيك للثالثة يوم الخميس بس لازم تدفع الفرق قلتله طيب كم الفرق قال لي 100 جنيه يعني 65 ريال قلت لا أدفع 100 جنيه وأقعد يومين أحسن من إني أدفع 180 جنيه وأقعد يوم واحد فدفعت المبلغ وأعطاني التذكرة وخرجت من المكتب و رحت للفندق ولقيت الطلب وصل أخذته وطلعت الغرفة وبديت شغل عليه المهم وبعدني صليت الظهر والعصر
تذكرون هذا المقطع
اقتباس:
|
المشاركة الأصلية كتبت بواسطة Athman
متطلبات السفر الضرورية
هناك قلتله بدل ماحنا قاعدين في ذا الشمس خلنا نقعد في السفارة علشان أول مايخلصون ناخذها وجري على إدارة الوافدين (بيني وبينكم أنا كان ودي أروح مكان في بالي لكن بعدين راح تعرفون) المهم |
الشيء هذا راح أقولكم عليه بس لا تتوقعون اني صغير الشيء هذه هو (سلسة ملف رجل المستحيل) أظن أنه بعضكم يعرفه لكن أنا راح أشرحه لكم
هذه عبارة عن روايات مصرية ألفها نبيل فاروق روايات صغيرة على قد الجيب وصلت هذي الأعداد إلى 155 وأنا متابعها باستمرار وموجودة في الرياض عند الخريجي المهم العدد 155 ماوصل هنا لسا فأنا قررت أشتريه من مصر وأخذت العنوان ودقيت عليهم وعرفت أن مكانهم في الفجالة لكن هم قالوا لي بدل ماتيجي عندنا في مكتبة تجيب كل الأعداد اسمها مكتبة متبولي ولحسن الحظ طلعت عند ميدان طلعت حرب على نفس الشارع اللي فيه الفندق ورحت لهم لكن قالوا انهم ماعد صارو يجيبونه واني لازم أروح للمكتب الرئيسي فسألتنهم عشان ماأبغى التكاسيث يلعبون علي كم حق المشوار فقام يقولي ماتاخذش 3 جنيه طلعت وقلت أنا راح أكون كريم معاهم ووقفت لي واحد ودليته على المكان وقلتله 5 جنيه قام سابني وتركني ووقفت الثاني ووافق على طول المهم وصلت المكتبة أوف الشارع اللي هو فيها كانه سوق أشيقر اللي في الديرة كله مكتبات ودفاتر واقلام وحركات المهم رحت المكتب وللصدفة لقيت واحد جاي من الدمام مخصوص علشان يشتري من هالمكتبة المهم شريت اللي أبيه وأنا طالع سألت الرجال اللي في المكتبة كم حق المشوار إلى ميدان التحرير فقام يقولي شوف إذا طلعت من المكتبة اتجه يمين وامش على طول الشارع العام إلين ماتوصل مسجد(ناسي اسمه) المهم هذا المسجد عند ميدان تلاقي فيه محطة مترو تركب القطار بواحد جنيه افضل من التاكسي اللي حياخذ 3 أو 5 جنيه (أوه أنا في ذا الوقت تذكرت خويي يوم كان بيوريني المترو ويوم أنا قلتله خلاص آخ ياريتني خليته يكمل ) االمهم لكن قلت في نفسي ليش هو أنا بزر فقمت سألته وش أسوي لما أوصل قال أبد تنزل تحت عند المترو وتقص التذكرة وتروح على القطار طوالي فقلتله طيب ورحت ورجعت الفندق
المهم وبعد ساعة أذن المغرب وصلو الناس وانتظرت خويي وجاني اتفقت معاه أنا انه بكرة أكون في ضيافته عشان أشوف جو العزوبية وجو الدراسة كيف المهم طلعنا ورحنا عند ميدان التحرير وقعدنا فيه وسولفنا شوي وبعدين أذن العشاء رحنا المسجد اللي بجنب الميدان ولقيت شيء عجيب لقيت انه بوابة المسجد قسموها قسمين قسم الناس يدخلون فيه عشان يصلون وقسم ثاني في أحد مات واليوم العزاء وهم ينقبلونه في هذا المسجد شوف كيف وقت الصلاة!! لا والأعجب من كذا يوم دخلت المسجد عشان أصلي ولا أنا أقول لنفسي أنا في أسواق الهرم ولا كيف لأن لقيت على البوابة واحد ياخذ الله يعز القارئ النعال منك ويحطها في الدالوب ويعطيك رقم (وين حنا في سوق) المهم لا وكمان إذا ودك تتوضأ لازم تنزل نعالك يعني تدخل الحمام بدون نعال
المهم صلينا وخرجنا بدأ مشوارنا السياحي
لا الظاهر هذا مو آخر عدد نكمل المشوار السياحي العدد القادم إنشاء الله
وكل عام واتنم بخير
وأحلى سمبوسة تأكلونها اليوم في حياتكم بإذن الله
25-09-2006, 03:25 PM
العرض العادي
