السلام عليكم ورحمة الله وبركاته
أستغل هذه المناسبة وأهنئكم بحلول شهر رمضان المبارك
أنا انتهيت في الموضوع السابق عند (حصلت أطرف موقف في حياتي) شكلكم تتسالون فيما بينكم وش اللي صار أنا راح أقولكم
أنا بديت أقطع الجسر اللي يعبر النيل وأنا ماشي ولا ألاقي واحد واقف ورافع يده اليمين وكأنه بجنبه واحد (الحمد لله على العافية) المهم شوي ولا واحد ماسكني ويقولي (تبي تتصور مع نانسي عجرم(ههههههههههههههههـ ينكت الرجال) ) وقام موريني صور ناس وهم متصورين معها أنا في ذي اللحظة عرفت ليش ذاك الرجال رافع يده كذه عشان يصورونه مع نانسي عجرم أو غيرها فأنا قمت وقايله لا تسلم فقام قالي طيب ايش رايك تتصور مع فلان (بصراحة أنا ماأعرف اسماء المغنين ولله الحمد فقلتله لا فقال ايش رايك طيب أصورك على النيل المنظر حلو وزين قلتله ياخوي فكنا مابي أتصور فهمت ولا لا فهو حط يده تحت ذقنه وكانه يفكر وهو يطالع فيني وبالأخير قام يقولي (تبي تتصور مع عمرو خالد) الظاهر درا اني من هنا واننا نحب عمرو خالد كثير فأنا قلتله والعرض بصراحة كان مغري لا ياخوي خل غيري يتصور أما أنا فشكرا (بصراحة أنا طبيعتي شكاكة) ووصلت الفندق وحطيت راسي ونمت
المهم في اليوم اللي بعده الساعة 9 ولا خويي عند الباب منتظرني فدخلته وقاعدين نرتب ذيك الأوراق اللي أخذناها من الإدارة وأوراقي وكل شيء وبعدين رحنا لإدارة الوافدين وصلنا ودخلنا الدور الأول وفي ذيك اللحظة أنا تذكرت إني مخلي جوازي في الإستقبال حق الفندق وقلت لخويي خربانة خربانة خلنا ندخل وان أخذوا الملف حياهم الله ولا نرجع ووقفنا عند ذاك الشباك اللي قلتلكم عنه (أنا بصراحة توقعت انهم ينسون الجواز من كثر أوراقنا اللي بنعطيهم) لكن خاب ظني يوم أشوف ذيك ............... وهي تعطي جوازها لهم وقلت لخويي رحنا فيها قال معليك حاول انك ماتذكرهم فيها ووصل دورنا وعطيناهم أوراقنا ويوم شافو انو الجنسية.................... قالوا اطلع الدور الخامس وقدم أوراقك هناك (لا حد يروح الدور الخامس علشان يعرف من وين أنا هههههههـ) وطلعنا ذاك الأصنصير ولأول مرة أشوف عامل اصنصر في بناية متهالكة المهم وصلنا الدور الخامس ولفينا يمين(علشان اللي يبي يعرف مين وين أنا) ودخلنا أول غرفة وعطيناهم ملفنا يوم شافو خطاب السفارة قالو رح اختمها من المدير المسؤول عن هذي الجنسيات وبدل مالفينا يمين رجعنا ودخلنا يسار وعطينا ملفنا للمدير شافها وقام وقع على الورقة أخذناها وجري على الغرفة اللي في اليمين ويوم وصلنا شافو الأوراق وتأكدوا إنها كاملة(على فكرة في الأوراق اللي يعطوكم إياها يكون مكتوب العنوان دخل جمهورية مصر العربية نصيحتي انكم تعبوها وتكتبون عنوان شخص يعرفكم لأن ورقة القبول بتوصله هو أو إذا انت قاعد في مصر اكتب عنوانك وتقدر تغيرها بعدين )جاو قالو اأوراقك كاملة بس لازم تصور كل واحدة نسخة أو نسختين أنا نسيت المهم قلت لصديقي زين مادام رجعونا نصور أكيد مافي مكان قريب هنا خلنا نرجع ناخذ جوازنا ونصور ونرجع واحنا نتكلم سمعنا عامل الأصنصير وقلنا في مكان قريب هنا وقام يصوفه لنا أنا بصراحة ناسي المكان لكن هو قريب مرة مرة مرة من الإدارة المهم طلعنا ورحنا صورنا أنا بصراحة قلت لخويي صور أربع نسخ من كل ورقة اثنين لهم واثنين لي عشان كذا انا قدرت أحط لكم هذه الأوراق المهم صورنا ورجعنا للإدارة لكن قالو لنا بقي خطوة واحدة انك تحط دمغات(الدمغات مثل طابع البريد عندنا تحطها على الأوراقث اللي تاخذها منهم )في ورقة تسلسل إعداد المظروف مكتوب وش الدمغات المطلوبة ووين تحطها وكم سعرها أنا قلتلهم وين الاقيها قالو عند عامل الاصنصير ورجعنا له وطلبناها منه واعطانا كم من دمغة سعرها مع بعض 4 جنيه وقالنا تعرفون وين تحطوها قلناله لا وقام حطها لنا انا ماكان عندي إلا 10 جنيه عطيته له ورجع لي 4 جنيه كيييف 4 جنيه بس أنا حسب خبرتي في الحساب فإن 10-4=6 فكيف رجع لي قلتله وين ياخوي باقي 2 جنيه جا قال 4 جنيه حق الدمغت و2 جنيه حقي وقام سحب نفسه بسررررعة قبل مايتركلي فرصة اتكلم انا عصبت بصراحة لا هذه ماينسكت عليه امس 5,5 جنيه واليوم 2 جنيه و.......وفجاة مسكني خويي وقالي اتركه في حاله قمت مشيت وفجاة قالي انا زيك مقهور من اللي سواها لكن خلاص خله ورجعنا للغرفة وعطيناهم الأوراق وقلت للحرمة تكفى تأكدي انه أوراقي كاملة قالت هو انا فاضيه قلتلها تكفى انا من السعودية ماابغى أرجع وفي الاخير يقولون ماقبلنا طلبك ويكون جيتي على الفاضي فقالت يلا وقامت تتأكد من أوراقي وقالت خلاص كاملة حطها في الملف وعطها لي فسألتها متى القبول فقالت (لا دا بيغيب أوي ) يعني حط وانسا لأني إلى الآن ما وصل القبول من يصدق يا جماعة شهرين كاملة ومافي رد (أنا واحد من الشباب قاعد يضحك علي ويقول وين حنا تدفع فلوس وهم يختارون الجامعة هههههـ) المهم قلتلهم أمري إلى الله وقبل مانخرج أنا قلتلها أنا احتمال يكون عندي منحة دراسية فهل ممكن تعطوني خطاب مكتوب فيها جميع المصاريف حتى يتأكدوا منها (زي ماسوت جامعة 6 أكتوبر ) فقالت لا انت اللي تسويه انك تصور الصفحة اللي فيها المصاريف الموجودة في كتاب دليل الطالب الوافد اللي يعطونا إياه وتعطيها لهم انا في ذاك طلعت من الإدارة وبكذا خلصت مهمتي كطالب وبديت أفكر في شيء اسمه سياحة شوي ولا يبدا أصوات الفقاقيع والألعاب النارية في بطني (كأني قلتلكم ياليتني ما طلبت من مطعم حضرموت عرفتو الحين ليش ) طبعا خويي ماهو داري عن السالفة وقايم يشرح كل شيء نمر فيه من الإدارة إلى فندقي هذا مجلس الشورى والشعب وهذا الجامعة الاميركية في القاهرة (على طاري هذي الجامعة ترى هي قريبة من الفندق اللي انا ساكن فيه ويقولون انه ابن عادل امام درس فيه هل هذا صحيح) وهذا المترو.........خلاص يكفي قلتله (مسكين مايدري عن السالفة) وهو لسا يكمل المترو عبارة عن 3 أدوار تحت الأرض وايش رايك نجربها و ........... وقلتلها اسمع خلها المرة الجاية المهم الحين باقي خطوة واحدة ابي ااكد الحجز (لاني العودة كان كله مليان ومافي |إلا بعد شهرين ) المهم قالي ايش رايك نروح الحين قلتله لا أنا الحين بروح الفندق وبعدين راح أروح لها وقال لي طيب وعطاني وصفها وقال اركب المترو وروح منطقة اسمها(أنا ناسي الاسم) وفي الأخير اكتشفت انه مصر للطيران على بعد 500 متر تقريبا من الفندق اللي أنا ساكن فيه
نكمل العدد القادم اللذي سيكون عدد سياحي 100% بإذن الله
19-09-2006, 09:03 PM
ولكن شوري عليك أخي الكريم التشويق الزائد ;) يحرم الموضوع حلاوته ولا أيش رأيك
العرض العادي
