السلام عليكم ورحمه الله وبركاته
ولله الحمد لقد وصلت الى مدينه فانكوفر امس الاثنين بعد رحله مارثونيه من الرياض الى الدمام وماكانو معطينا علم انهم بيرحون للدمام والتوقف في مطار الدمام ساعه تقريبا ثم توجهنا الى لندن هيثرو وانتظرنا 5 ساعات هذا على الخطوط السعوديه ومن لندن الى فانكوفر 9 ساعات على الخطوط الكنديه وبصراحه الخطوط الكنديه افضل من السعوديه في الخدمه وفي الكراسي والطياره جديده.
يعني ماوصلنا فانكوفر الا بعد يوم تقريبا لكنها بسراحه تستاهل العنوه الديره حلوه والجو براد على خفيف ودرجه الحراره في النهار 28 درجه يعني لابرد ولاحر والاجراءات كانت سهله وميسره ولله الحمد واللاب توب مافتشوه لا مطار لندن ولا مطار فانكوفر مع اني ماخذ احتياطاتي وحاط الويندز اصلي بس الحمدلله مافتشوه .
وداومت في المعهد اليوم طبعا مافيه تدريس لانه اول يوم بس اختبرونا عشان يعرفون مستوياتنا ويحطون كل واحد في مستواه وشرحولنا اقسام المعهد وقالوا ترى بكره اجازه لاتجون عندنا اليوم الوطني وكان معي 8 طلاب جدد تقريبا 6 فنس اما كوريين اويابانيين اوصينيين و2 اوروبيين مدري بالضبط من وين مابعد خرفتهم
يوم جت الساعه اثنى عشر وربع قلت للمدرس بروح 10دقايق اشتري لي خط تليفون قال مو مشكله بس الساعه اثنى عشر ونص ترى بنروح للداون تاون عشان نعرفه اذا احتجناه قلت ابشر واجي الساعه 35و12 يعني متاخر خمس دقايق والى الربع قد راحو واسئل الاستقبال قال وين قد راحو قلت في نفسي اثرهم صادقين ونص يعني ونص والله واطلع بروح للبيت والى فيه مطعم هندي قبال المعهد والاني جويع واروح اصك فيه ذاك الغداء ب8 دولار وارجع بعدها للبيت و العايله مابعد جو من اعمالهم واغير ملابسي واجلس في الصاله شوي لين ضاق صدري واطلع برى البيت الا وذا السيكل الي ملبق على جدار البيت يعني حقنا (واحد يمون) حق العايله والله وانفذ ذرعاني واركبه وخذ ياتمشيه في عز القياله الساعه ثلاث ونص والجو مابزين منه لين حسيت اني بضيع وارجع للبيت ثانيه.
وأي سؤال انا حاضر للاجابه والله يوفق الجميع.
بس لاحد يسالني يقول وشرايك في المعهد الفلاني والاوش رايك في المنطقه الفلانيه لاني يالله اعرف عايلتي
01-07-2008, 08:35 AM
العرض العادي
