السلام عليكم ورحمة الله وبركاته ............
حياكم الله في موضوعي هذا وأتمنى إنه يعجبكم وكنت قد فكرت بهذا الموضوع من فترة وقلت خل أشارككم فيه هناوتشاركونا أنتم فنفيد ونستفيد من بعضنا وأحببت أن تكون هذه المذكرات شاملة منوعة لاتقتصرعلى موضوع واحد فقط، في البداية فكرت بكتابة مذكراتي لما كنت مدرسة لكن فضلت التنويع فيها فمرة بتكون موقف ومرة فائدة ومرة ذكريات لفترة معينة وهكذا، ويسعدني لو تتفضلون بمقترحاتكم وآرائكم وتعليقاتكم الحلوة التي لانستغني عنهاوالتي تعطي دفعة تشجيعية إلى الأمام وتثري الموضوع بماهومفيدوطريف،واسمحوا لي لأني راح أكتبها بلهجتي العامية عشان أبتعد عن الرسمية شوي ماعدا الفوائد بالفصحى لأنها منقولة ومن لايفهم إحدى الكلمات فليسأل ونحن نترجم مايصعب فهمه ،وسأبتدئها بهذا الموقف الطريف.
قبل سنتين تقريبا قالت لي بنتي الكبيرة إن صديقتها في المدرسة اشترت عصفور صغير أليف تحط له الأكل
في يدها وهو ياكل وأصرت بنتي تبي مثله عاد قلت لها من وين نجيب العصفور هذا المهم لف أبوها الدمام وماحصل عصفور السعادة هذا إلا في محل بسيهات على ماأعتقد المهم جبناه مع الأكل حقه الظاهر عمر هالعصفور ثلاث أو أربع أيام صغير مرة بس وش مشكلته،عصفور الهنا هذا مايقدر ياكل بحكم إنه صغير إلا لما نوكله مثل البزارين يعني نحط له الأكل حبة حبة في عود أسنان ونوكله وينام وهو ياكل زي المواليد وأبد كلها خمس أو عشر دقايق ويقعد يصايح من جديد يبينا نوكله في البداية انبسطوا بناتي عليه وبعدين صراحة انغثينا وملوا منه وأنا ابتلشت فيه هو وأكله ،ومن يشوف أول خيوط الفجر في الصبح يقوم يصايح بياكل وماينام إلا في الظلام ومايسمع حس ولابيصايح غثنا وكل يوم تكرمون لازم ننظف القفص مرتين أو أكثر ولا خيس لنا المكان ،تصدقون عمري ماشفت عصفور ياكل كثره ههههههههههه على إنه صغيرمرة عادة العصافير الي قد شريناها من قبل نحط لها الأكل والمويه وننساها وهذا يبي له مقابل أكود من البزارين الصغار على الأقل الصغار ينامون لهم ساعة ساعتين وهذا في الساعة يبي ياكل 10 مرات ههههههههه،سوى لنا استنفار في البيت وصرفناه بأقرب وقت ماسوى علينا هالعصفور ]