ممنوع دخول اللي اعمارهم اقل من ثلاثين
*
*
*
*
ايش جايبك تأكد ان عمرك اكثر من ال30
ترا بطحلك بالعجرا ان كانك صغينون
هذي علوم شيبان
نبي كل واحد يدخل يجيب بعض ذكريات الطفولة القديمة مرة
ومولازم اليوم او الآن لا رح تذكر وهات المفيد (( بس لا يصير تصبيرة من لوزين – على فكرة انا جايع هالحين الله يذكرك ببالخير ياحمود الخلف ))
اليكم المرعبين اللي مسببين لي قلق وانا صغير
*السعلوا وما ادراك ما السعلو
عوافي الله
مسددد عيونه بالخرق
كل هذولا من المروعات اللي تقض مضجعي ولا اقدر اتعدى الفراش من الخوف (( تراك اذا قمت بيجيك كذا عاد يعطوني واحد من ذولا )) ما ادري هم ماسكين ورديات عن بيتنا في الليل كل يوم واحد من العصابة هذي , واذا هب الهواء في الشتاء وسمعت صوت الهواء من الفراغات اللي حول الدريشة قلت بس هذا هو ارقد ياولد
*((خروف السلة )) حارس القلبان في الديرة اذا رحنا هناك يحذروننا من الأقتراب اليها علشان ما يجينا علشان ما نطيح في البير لأن الشبك اللي حولها ما يمنعني من الدخول جسمي اصغر من فتحاته
*لا كله كوم والسوالف عن الجن كوم ثاني ((( لا والقهر انها ما تحلى الا في الليل )) ماعاد تشيلني ركبي من الخوف من سوالفهم واذا صار فيه واحد بين عليه الخوف ويسوي نفسه عنتر يعني تراني ما خفت شبوا عليه العيال الكبار بالسوالف ويزيدونها بالكذب واذا صار واحد ماجا اليوم من العيال قاموا يحطون عليه الأمثله انه ذاك اليوم صار له كذا وسووبه الجن كذا وخذ لين قلب البزر يدق جرس السرعة حقة من الخوف
@@ صور من شقاوة الطفولة @@
الترجيم بجميع انواعه
1- العصافير في أي مكان تكون رغم انها متنصاد بالترجيم ولا فيه امل
2- السدرة او العبري او النبق اساميها كثير والله يعين اللي تجيه الحصاة من ورا والا اللي في بيتهم سدرة لأن درايشهم الله يخلف عليها
3- المناوشات بين الصغار المظاربات بالترجيم
*التخريب في الزواجات اوه اما هذي انا من الخبراء المخضرمين الذين لا يشق لهم عج فيه خصوصاً مع النبيطة اوف ياشيخ ما يبقى ولا لمبة من عقود الأنارة (( خصوصاً انني صاحب برائة اختراع النبيطة صغيرة الحجم )) اللي احطها في قبضة يدي ما تدري هل معي شيء او لا من صغرها بس تقوم باللازم
*فيه ساكن قريباً منا مُدرسة اردنية تصنع الجبن ما الذه ما انسى طعمه الى الآن مشابة لجبنة كيري (( عفواً ترا ماهي دعاية لكيري )) واحد مصدق نفسه وكان احد الجيران الذين عندهم اجلكم الله بقرة يعطونها الحليب لتصنع الجبن وكانت توزعه على جميع الجيران مجاناً بس تسويه علشان تقطع الوقت من الملل ولا تنسانا طبعاً وكنت من اللقافة و من العناد ما استانس الا لين ان اشرب الحليب قبل نضجة او سكبه في الأرض ليش حتى الآن ما ادري (( بس اصحى التحدي )) هذا كان شعاري ربما هذا السبب
*سبع الحجر (( او ما تسمى بطجمه )) وهي عبارة عن سبع حجرات فوق بعض ونصوب عليها بكورة من الشرابات القديمة اللي لافينها فوق بعض
انا كنت فيها اول واحد يختارونه من صغري لأني اذا رجمة نادر ما اخطيها بس ما يمديني انحاش الا صايديني الفريق الثاني
*كيف تعلمت السباحة
هذي القصة ما انساها ابد في مزرعة وسمحوا لنا بالسباحة والعيال جابوا جوالين زيت طبخ (( ماركة شيف )) ماركة جديدة دوروها في جيان والا كارفور – يحلفون بتلقونها والا زيت سيارات وانا ياغافل لك الله ما كنت ادري انهم بيسبحون يمكن كنت اخرب في مكان ثاني ما دريت عنهم خصوصاً ان بركة المزرعة هذيك كبيرة مترين ونص عمقها طيب ايش السوات يا ايه هين اقول اسمي (انحش يارونالدينيو ماتبي احد يعرفك ) يالمكتشف يابوالمغامرات يالله واجيب علبة حليب نيدو من الحجم الكبير والعيال يسبحون وانا كذلك من قدي اسبح وشوي العيال صارو يروحون منتصف البركة وانا ليش ما اسوي مثلهم واروح للنص ومن الخوف اضغط بقوة على علبة النيدو والا صوت طلع ايش الصوت اللي ما انساها طول عمري غطا العلبة انفتح وتعبت ماء ايش الحل غطست تحت اول غطسة شربت حوالي قربة ما والموت حار اطافش واطلع فوق والا انزل ثانية والعيال ماعندك احد ما يعرفون يسبحون كلهم خرطي ومرة ثالثة اخذت شهيق مائي من تحت (( ما تتذكرون عبدالحليم حافظ اني اتنفس تحت الماء اني اغرق اغرق هههه واحد مصدق نفسه )) وياروح ما بعدك روح ولا يحك الجلد الا الضفر واطافش ما ادري كيف شوي الا انا الحمد لله متوجه للجدار وخذ يابُكا من الخوف الا العيال قالو انك عرفت تسبح انا صدقتهم واجرب اني اسبح عند لجدار والا فعلاً بديت اعرف شوي شوي والحمد لله انا الآن اعرف اسبح في البانيو تمام
*راس الخروف
في العزايم الأكيد ما نقلط الا بعد الرجال سواء كانو قليلين نقلط قلطة ثانية او ممكن الثالة او الرابعة اذا كانو كثيرين نجلس اذا دخلنا على الصحن وكل واحد عينه على راس الخروف وكل واحد يبيه بس اللي بياخذه بينجلد لازم تستغفل العالم في لحظة منهمكين في الأكل وتدخل اصبعك في الفتحة اللي في الراس وجري برا مكان العزيمة والعيال وراك واذا قربوا منك اما ترمي الراس والا بتروح على وجهك اختر وبعد طقاق وحوسة نبدا نكسر الراس ببلكة علشان ناكل الكنز الثمين المخ ههههه بس المسألة عناد والا انا ما احبه واذا جينا ناكله طبعاً يكون مليان من كسر البلكة
* علامة الفواكة الأستكرات
هذي عليها حروب دموية اذا كانت قليلة ليش علشان كل واحد يلصقها في جبهته ههههههههه مزاج غريب ولو لصقها احد عليك غصب كان تطاق معه بس الحلو فيها العناد
* وراعين شد الوكالة
شايب شاف قريبة اللي في دورة العسكرية توه في يعني الراس موس
جا العسكري بيسلم على الشايب رفض الشايب انه يسلم بدون ما يشيل الطربوش لازم يفصخه ويوم شاف راسه مليان فلقات من القشر يوم انه صغير قال ايه كفو هذا الرجال هالحين صارو البزارين ما يجي في روسهم فلقات شد الوكالة
ودي كل واحد يكتب بالسلوب الشعبي والمصطلحات الشعبية المتداولة عندهم حتى لو ما عرفناها نسأله عنها عايدي اهم شيء ذكرياتك لا تدفنها شاركنا بها
تقبلو اعذب وارق تحيات اخوكم
المكتشف المغامر
ابوفيصل
17-06-2007, 11:43 PM
ذكريات الطفولة
وبعدين حمارة القايلة ما تحب البهارات ههههههههه
العرض العادي
