منتديات سفاري , للسفر والسياحة
اعلانات منتديات سفاري
منتديات سفاري
| |||||||
 |
| | أدوات الموضوع | انواع عرض الموضوع |
2008-09-22, 03:01 AM
| ||||
| ||||
 الجزء النمســاوي من تقرير البافاري ( رحلتي إلى المانيا وما جاورها ) - سالزبورغ - السلام عليكم ورحمة الله وبركاته  <<<متحمس الأخطبعا هذا التقرير هو تكملة  لـ تقرير رحلتي إلى المانيا وما جاورها  http://www.sfari.com/forums/sfari26/travel29005/ طبعا أول مرة أسمع عن سالزبورغ كانت عن طريق هذا المنتدى  الذي أثرى خلفيتي السياحية المتواضعة بشكل لا يوصف  المهم , وخلال تصفحي للنت شفت تصنيف لأفضل الوجهات السياحية بحسب تصويت المسافرين على موقع Trip Advisor Reviews of vacations, hotels, resorts, vacation and travel packages - TripAdvisor وطلعت سالزبورغ رقم 11 على مستوى العالم  كما تشاهدون في لقطة الشاشة التالية اللي أخذتها من الموقع : وعلى مستوى أوروبا احتلت المركز الثاني   وبعد كل هذا تحمست وقلت لازم أشوفها خصوصا أنها تبعد عن أولم, المانيا "مقر إقامتي" 290 كم فقط ويمكن الذهاب لها بتذكرة البايرن "يعني المرة هذي القطار هو الخيار الأمثل على عكس السيارة في طلعتي السابقة لسويسرا" (وتتيح تذكرة البايرن " Bayern-takt " لخمسة أشخاص التنقل في أنحاء ولاية بايرن "بافاريا" لمدة يوم كامل بـ 29 يورو"=155 ريال" بقطارات مختارة "لا تتضمن الـقطار السريع ICE"  )المهم ,, من زمان وانا مخطط على زيارة سالزبورغ وأكلم الشباب لكن كل مرة تتأجل إلى أن تداركنا الوقت وقرب رمضان والسفر في رمضان صعب شوي ,, وعاد ما بقى الا اسبوع واحد على رمضان وشفت ان الشباب ما لهم نية  , فقلت ما لي الا أن أسافر وحيدا  فـ حددت موعد الرحلة أنه يكون في الويك اند : الانطلاق يوم السبت 30-08-2008 والعودة غداً الأحد والأثنين رمضان وكل عام وانتم بخير , وصراحة اكتشفت ان يومين قليلة جدا في حق سالزبورغ  نسيت أقولكم وين المبيت ؟؟؟  بما أني عزابي فقررت أني آخذ هوستيل  وليس هوتيل يعني مثل بيت الشباب يعني تحجز سرير  ويكون معك في الغرفة 4, 6 أو 8 أشخاص وعشان كذا تكون الأسعار منخفضة جداً (من 16 إلى 30 يورو"=85 إلى 160 ريال" إذا اردت غرفة خاصة)وأغلبها لا تحتاج حجز مسبق وهذه عدة مواقع للهوستيلات :  Book the Best Hostel in Europe - Europe's Famous Hostels World Best Hostels selection of the hostels around the world Hostels, Youth Hostels & Cheap Accommodation With No Booking Fee! Hostels Deutschland Hostels Hostels & Youth Hostels Worldwide - Online Bookings بعد ترتيب الأمور صحيت السبت بدري وأخذت تذكرتين بايرن لشخص واحد "للذهاب والعودة" بـ 42 يورو "=220 ريال" و انطلقت الساعة 10:00  وغيرت قطار في ميونخ ووصلت سالزبورغ الساعة 2 ونص الظهر        <<< متحمس < دوبه واصل  وفيه نقطة بخصوص القطار أنه فيه زحمة غير طبيعية يعني يا تركب بدري وتلحق مقعد ولا الله يعينك ساعتين أو ثلاث واقف نسيت أقولكم أن صور سالزبوغ طارت للأسف  حيث أنه حصلت مشكلة في جهازي ونتج عنها ضياع ملفات سعتها 9 جيجا   لكن من حسن الحظ أني كنت عامل نسخة احتياطية لكن لسوء الحظ ما أمداني أنسخ صور سالزبوغ ,, لكن عالعموم حصل خير والله يخلي النت "جميع الصور في هذا التقرير من النت"  نرجع لمحور حديثنا ,, نزلت من القطار وعلى طول على مكتب السياح واشتريت بطاقة سالزبورغ بـ 24 يورو لمدة 24 ساعة ويعطونك معها مطوية بها جميع الأماكن اللي تدخلها مجاناً واللي عليها تخفيض وتقدر تحصل الأماكن هذي كلها في ملف pdf تحصله في موقع سالزبورغ الرسمي  salzburg.info - travel and tourism information تحميل الـ pdf مباشرة : http://www2.salzburg.info/pics/SWL08en.pdf واللي ما يبغى يحمل يشوف لقطات الشاشة هذي اللي أخذتها من الـ بَدَفْ الأصلي   كما يوجد عرض بأن تشتري بطاقة سالزبوغ 48 ساعة ومعها حجز فندقي لليلتين بـ 99 يورو "530 ريال" أو ثلاثة أيام وهكذا  وبأسرد لكم المواقع السياحية حسبما وردت في الملف على شكل صور بندأ بصورة لتفسير الرموز الواردة بالملف   ونبدأ ... >>> بأطفشكم بالصور لكن تحملوني        وهنا الأماكن اللي عليها تخفيض لحامل البطاقة        وهذي خريطة لـسالزبورغ  وهذي خريطة أخرى لكن مصغرة وللحصول على الخريطة الكاملة (1.41 ميغا) ممكن ارسلها لمن يطلبها  المهم بعد ما أخذت البطاقة طلبت خريطة للمدينة وطلبت من الموظفة أنها تحدد لي موقع الهوستيل اللي بروح له وفعلا حددت لي مكانه ورحت له لكن حصلت الاستقبال فاضي وفيه لوحة "أنه مغلق لمدة 30 دقيقة"  قلت مو مشكلة آخذ جولة وأرجع وشوي وأحصل مطعم تركي فـ سألتهم هل فيه مسجد قريب فدلوني على مسجد تركي لكن كان بعيد شوي المهم رحت صليت الظهر والعصر ورجعت للهوستيل وحجزت لكن بدون دفع وقلت لهم بأرجع لكم الساعة 10  بعدين رحت على محطة القطارات وصراحة واجهت شوية مشاكل هناك حيث أن استعلامات الباصات تحصلها فوق واستعلامات القطارات تكون تحت وانت ما تدري اصلا الوجهة اللي تبغاها هل تروح لها بالباص أو القطار  فـ أنواع المشورة بين مكتبي الإستعلامات بعدين استعلامات القطار فيه موظفة نفسها شينة  يالله أنها تعلمك بالقطار اللي يوديك للمكان اللي تبغاه , لا وفوق كذا علمتني على قطار غلط يوديني للزحليقة الصيفية بـ "هالين" لكن من حسن الحظ أنه فاتني وما ركبته وانتكبت.  المهم بعدين اكتشفت مكتب يخدمونك خدمة ولا أحلى ويطبعون لك ورقة فيها الباصات والقطارات (لاحظوا) اللي توديك لوجهتك , وهو يقع على يسارك اذا كنت تواجه استعلامات القطارات وانا صورته وصورت جميع المكاتب وكانت الصور ستغني عن الكثير من الكلام لكن ...     <<< خلوني أعبر عن شعوري شويالمهم أن الوقت كان متأخرا جدا لأذهب الى اي مكان خارج المدينة فقررت أن أتوجه للمدينة القديمة (باص 5 و6 تأخذك من البانهوف الى المدينة القديمة) نزلت في المدينة القديمة وتجولت فيها وما حسيت بنفسي الا عند القطار "المشتول" اللي يصعد بك الى قلعة هوهينسالزبورغ وهذي القلعة   طبعا الصعود بالقطار ودخول القلعة ودخول المتاحف اللي بداخل القلعة مجاناً لحامل بطاقة سالزبورغ وأنا بحثت في النت عن صور للقطار المشتول هذا لكن ما حصلت الا صورتين  وهنا تشوف المدينة من سقف القطار >>> لحسة صح   طلعت القلعة وكانت تعطي منظر رائع للمدينة     ثم تجولت بالداخل وكان فيه عدة متاحف واشتغلت تصوير لكن أكثر ما لفت نظري في متحف الدمى المتحركة يوجد غطاء زجاجي تحت رجلك مثل غطاء المجاري لكن مليان قروش وعملات حتى من فئة الـ 100 يورو , صراحة ذكرني بالشخصية الكرتونية uncle Scrooge  بعدين نزلت من القلعة على رجولي ومع أن الطريق نزول لكنه كان متعب جدا فما بالك بالطلوع بعد ما نزلت قعدت أتجول في المدينة القديمة ( بالألماني : Altstadt ) وهذي بعض الصور "من النت"  وبعدين لاحظت شي وهو أن أغلب لوحات المحلات تأتي بهذا الشكل الكلاسيكي الجميل              في نهاية اليوم الأول توجهت للمسجد التركي وصليت المغرب والعشاء لكن اللي آسفني صراحة أن جماعة المسلمين كانوا يصلون بينما يوجد عدة أشخاص في الغرفة المجاورة للمسجد يلعبون تنس وبلياردو ولا كأن الصلاة مقامة في الغرفة المجاورة بعد ما صليت توجهت للهوستيل وطلبت غرفة أبو 8 أسرة وكان السعر 17 يورو و يُطلب منك 5 يورو تأمين للمفتاح "البطاقة" ويتم إعطاؤك الأغطية الخاصة بك على أن تعيدها عند خروجك ,, المهم توجهت للغرفة وكانت فاضية لأن الجميع كانوا بالمطعم تحت  ,, بعدين فيه نقطة أنه الغرفة بكاملها لايوجد بها سوى فيش كهربائي واحد وكان عند السرير المقابل لي فـ شبكت شاحن جوالي فيه وتوكلت على الله ونمت, وفيه نقطة أن الأسرة كانت دورين ومن سوء الحظ أن سريري كان تحت عشان كذا صحيت في نص الليل من الأصوات اللي يطلعها السرير اللي فوقي اذا تقلب الشخص اللي نايم والظاهر انه كان مريض  عشان كذا ما نام الليل ولا خلاني أنام  بعد ما صحيت إكتشفت أن الغرف مختلطة (اناث وذكور)  وليس مثل بعض الهوستيلات الأخرى التي تطلب منك عند الحجز عن طريق الانترنت ان تحدد جنسك لكي يحددوا لك الغرفة المناسبة لك. يتبع ... . آخر تعديل بواسطة البافاري ، 2008-09-22 الساعة 03:05 AM |
|
2008-09-22, 03:49 AM
| ||||
| ||||
 ياسلام عليك يالبافاري هذي رواية الف ليلة وليلة يعجبني فيك روح المغامرة والاقدام يعني واضح انك متورط بأصحاب كسلانين جداً وصدقني بيندمون على عدم استغلالهم لفرصة تواجدهم في اوروبا لكنك خلك على وضعك واستفيد من كل ويك اند نرجع لتقرير سازبورغ انا ندمان على الصور الي فقدتها لان المدينة جميلة واكيد انك اخذت لها لقطات حلوة لكن معوضين ان شاء الله بعدين نظام السكن الي سكنته غريب وانت اغرب كيف تقدر تتأقلم مع 8 اشخاص في غرفة !! بصراحة مستحيل اقدر اسويها عموماً منتظرين تكملتك للرحلة ولاتقول لي انك مازرت بحيرة موندسي وقرية وولف قانق وسانكت جيلجن ترى مااعتبرك زرت سازبورغ منتظر الجواب آخر تعديل بواسطة فارس الشجاع ، 2008-09-22 الساعة 05:45 AM |
|
2008-09-22, 05:16 AM
| ||||
| ||||
| بعد الإستيقاظ صباحاً جات مسألة الفطور  وصراحة كانت أسعار الهوستيل حلوة للفطور من 1.50 - 3.50 يورو (=8 - 19 ريال) لكن قلت أضمن لي اني أروح للمطعم اللي عند المسجد التركي منها أفطر شي حلال ومنها أصلي الفجر وفعلا سلمت المفتاح واسترجعت مبلغ التامين واتجهت للمسجد التركي لكن للأسف كان مقفل  والمطعم أيضا مقفل فأضطريت أني أفترش الجاكيت وأصلي في المواقف وأأجل الفطور بعدين توجهت للبانهوف وسألت عن القطار اللي يوديني للزحليقة الصيفية فـ طبعت لي الموظفة ورقة فيها موعد القطار المتجه الى هالين ومن ثم الباص المتجه للزحليقة, لكن المشكلة أن القطار طلع بعد ساعة ونص فقلت للموظفة  أنه من خلال معلوماتي المتواضعة أعرف ان فيه قطار يودي على هالين بعد ربع ساعة !!! قالت كلامك صح تقدر تروح بعد ربع ساعة لكن مصيرك بتنلطع لمدة ساعة في هالين عشان تنتظر الباص قلت مو مشكلة أروح هالين وأقعد فيها ساعة أستكشفها على بال ما يجي الباصأخذت القطار ( S 3 ) ونزلت في هالين وفريت فيها لمدة ساعة وهذي شوية صور من النت            بعدين رجعت لموقف القطار والباصات وأخذت باص 41 على الزحليقة وفيه شي نسيت أقول لكم وهو أنه يوم سألت عن القطارات والباصات في سالزبورغ طبعوا لي ورقة فيها كل شي بالتفصيل حتى موقف الباص اللي انزل منه على الزحليقة لكن أنا من الطفاقة اللي فيني شفت لوحة للزحليقة وشفت أغلب الشعب نزلوا فنزلت على طول بدون ما أتأكد من أسم الموقف فطلع المكان هو مغارات الملح وبالمناسبة هذي شوية صور : أول شي الخريطة :  طبعا بالخارج يوجد متحف مفتوح يعرض حياة الشعب قديماً لكن لم أجد سوى صور قليلة :  وهذه الصورة تعرض كيف كان الأقدمون يضعون جلد الحيوانات أمام المدخل لتخفيف الإضاءة القادمة من الخارج    وطبعا الدخول بـ 15 يورو لحامل بطاقة سالزبورغ وبدون البطاقة: 17 يورو وعند الدخول يتم إعطاؤك لبس خاص للوقاية من الماء المتقاطر في أنحاء المغارة  ومن ثم يتم إجلاس الجميع على مقطورة كهذه :   ويتم الإنطلاق وتبدأ المغامرة >>> أحس مدينة ألعاب مو مغارة       وهنا يدخلونك في أجواء من الرعب         وفي نص المغارة يتم العبور إلى الحدود الألمانية من تحت الأرض   وصور متنوعة من الداخل :   وهنا نرى عروق الملح في وسط الصخور    وهذي هي الصخور الملحية اللي كل الزحمة هذي عشانها, وطبعا يدخل الملح في تكوينها بنسب تصل إلى 50%    وهنا أشكال جذابة يتم تشكيلها بواسطة وضع "لمبات" داخل تشكيلات من الضخور الشبه منفذة للضوء  كما يوجد بالخارج محلات تبيع أشياء مثل هذه بأحجام مختلفة وبالطاري قلت ليش ما أجيب شوية صور لأقدم مغارات ملح في العالم وتقع بمدينة هولشتات, وطبعا فيه تقرير وافي عن هذي المدينة قدمه الأستاذ ابو فارس لكن قلت مشاركتي بتكون مجرد إضافة بسيطة لهذه المدينة الجميلة  نبدأ بمدخل المغارة   وأنا ماني متأكد صراحة لكن أتوقع أن السكة هذي تأخذك إلى مدخل المغارة  وهذي الصورة يقولون أنها رسالة حب للبشرية منذ آلاف السنين :   ونعود هنا للأشكال الجميلة :    وهذا المطعم تبع المغارة  وهذا يتبع المغارة بس مدري وش شغلته بالضبط  وهنا صور لمدينة هولشتات    وبالمناسبة مغارات الملح تسمى بالانجليزي salt mines وبالألماني salz welten علماً بأن سبب تمسية سالزبورغ بهذا الأسم هو كثرة الجبال التي تحتوي مغارات ملحية فيها حيث أن "سالز salz " تعني ملح و"بورغ burg " تعني جبل . المهم بعدين سألت واحد شايب  من سكان المنطقة عن الزحليقة فـ أول شي سألني معك سيارة  ولا لا ؟ فـ عرفت أنها مشواااااار, بعدين أشر لي على كنيسة فوق وقال تتعدى الكنيسة هذي وتروح سيدة مع الطلعة إلين تحصل لوحة الزحليقة , والله وفعلاً مشيت بس طلع مشوار الله لا يوريك يمكن مسافة كيلو وكلها طلعة يعني كرهت نفسي وأنها أطلع مع ان لياقتي في المشي كويسة إلين وصلت أخيراً بعد جهد جهيد وعناء عنيد, لكن قبل لا نركب الزحليقة نستفيد درسين :إذا تبغى تروح الزحليقة تاخذ قطار S3 على هالين ومنها تاخذ باص 41 وأصحى تنزل إذا شفت لوحة الزحليقة وشفت الناس نزلوا من الباص, إنما انزل عند هذا الموقف : Bad Dürrnberg Zinkenlift إذا تبغى تروح مغارة الملح بهالين تكرر الخطوات السابقة لكن تنزل في هذا الموقف : Bad Dürrnberg Salzbergwerk وصلت الزحليقة وارتحت شوي وقصيت تذكرة بـ 8 يورو وركبت الكراسي اللي توصلك لفوق لكن استغربت أن ما فيه معايير سلامة أبداً, المهم شوي واسمع واحد يصايح علي من ورى وألتفت له وقال لي أمسك الحديدة اللي فوقك ونزلها عشان ما تطيح, ونزلتها وقلت من أول علمنا أنا وش دراني عنها !!! بس صراحة كان منظر رائع جداً علما بأنها تقع على الحدود الألمانية النمساوية كما ترون في لقطة الشاشة هذه  وهذا المطل على مدينة هالين من أعلى الزحليقة  وهذي الكراسي اللي تطلع بك لأعلى الجبل >>> اللي يبغى يخربش بالمساحة البيضا ترى عادي   بس وش رايكم فيهم هنا تقول موقفين عند إشارة   تروا صدق في الصورة السابقة موقفين عند إشارة عشان يصير فيه مسافة بينهم على السكة  ويتم الإنطلاق >>> بس وش رايكم في الجو الخيالي   وفي الأماكن المستقيمة يجي دعس غير طبيعي   لكن عند اللفات لازم تهدي    يتبع ... |
|
2008-09-22, 05:20 AM
| ||||
| ||||
| بعد الطلوع من الزحليقة رحت للمغارة عشان عندها دورات مياه عشان أتوضأ وأروح لموقف الباص اللي وراه أشجار ووراها مساحة خضرا قلت أصلي فيها ,, المهم وفيما أنا أصلي وفي التشهد الأخير سمعت الباص جاء وسلمت بسرعة وجيت ابي ألحق الباص لكن الــ(اللهم اني صائم) راح بسرعة وما لحقته ,, وشفت موعد الباص اللي بعده طلع بعد ساعتين بالضبط, قلت والله ما طرى لي انتظر ودقيتها كعابي إلى موقف القطار في هالين (5 كم) لكن ما تحس بالمسافة من الطبيعة اللي حولك وما ودك إلا ان الطريق يطول. <<< هين المهم رجعت لسالزبورغ وبقي من الوقت على قطار العودة إلى أولم ساعتين فقط فأخذت جولة أخيرة سريعة في المدينة وهذي شوية صور هذا المكان يقولون أنه مقر إقامة موزارت  وهذا مكان ولادته  وهنا تمثال موزارت ( ويتوسط ساحة موزارت Mozatplatz )  وهذا موزارت تحمس على أيام بطولة أمم أوروبا في النمسا  وخلف تمثال موزارت يمكنك إستئجار سيقوي segway نص ساعة بـ 15 يورو (80 ريال)  والسيقوي هذا إختراع ثوري صراحة وطريقة عمله مذهلة بحيث لايسمح لك بالسقوط للامام أو الخلف, لكن من الجنب أنت ومهارتك, وقيادتها سهلة جداً حيث أن الموظف المسؤول عنها قال لي ما بتاخذ منك 3 دقايق وتتعلم عليها وفعلاً ما أخذت مني حتى دقيقتين, وطريقة عملها بأن توقف عليها واذا بغيت تمشي قدام تميل جسمك للامام فقط واذا بغيت تفرمل تميل جسمك لـورى شوي وهذي هي بكل بساطة  وتقدر حتى تتوازن عليها وهي واقفة حتى وانت منت متمسك  <<< وش دخل هذا الحين  المهم أخذتها لمدة نص ساعة وعطوني خوذة للرأس وقالوا لي أن نظام السيقوي نفس نظام الدراجات يعني تقدر تروح اي مكان تروح له السياكل وتلتزم بالإشارات والمسارات تبع السياكل , المهم أخذت لفة في المدينة وعلى النهر وراح الوقت علي وضيعت المكان وبغيت ألحم في باص واقف ,, المهم بعد قلة حيا رجعت للمكان اللي اخذتها بعد تأخر عشر دقايق لكن مشوها لي. الحين صار لازم أشوف لي باص يوديني على البانهوف وصراحة شفت نظام الباصات في سالزبورغ غبي شوي مقارنة بمدن المانيا حيث أني أنلطعت ربع ساعة على بال ما حصلت باص يودي للبانهوف , فيما في مدن المانيا يمكن الوصول للبانهوف من أي مكان بالمدينة بسهولة وخلال وقت قصير لكن لو تركزون معي راح تلاحظون أن اليوم الأحد ومعروف يوم الأحد حركة الباصات تكون أقل من بقية أيام الأسبوع, لكن رغم كذا ما يصير أن تنلطع ربع ساعة عشان تنتقل من أهم مكان بالمدينة (اللي هو المدينة القديمة) إلى محطة القطارات. قبل لا نركب القطار بقي موقعين عندي لهم صور ودي أوريكم الموقع الأول : شلالات قولينق         الموقع الثاني : قصر هيلبرون Hellbrunn للفانتازيا المائية       جميلة الحركة هذي   وهذي جلسة الملك مع ضيوفه  المهم أنه فيما الجميع جالسين وخاشين جو في المفاوضات, فجأة تنهال نوافير الماء من كل مكان وتغرق الجميع ما عدا الملك    طبعا الصورة أعلاه تم اقتباسها موضوع للأخت صفاصف والصورة أضافها الأستاذ القدير أبو الفوارس  وبعد ما تنتهي المفاوضات ياخذ ضيوفه ويمشيهم بالقصر لكن الغرق فيهم فيهم   وبكذا ينتهي الجزء الخاص بسالزبورغ ونتجه الحين الى محطة القطارات للعودة إلى سفاري فرنسا والمانيا  بس لا احد يتحمس ويركب القطار السريع (الأبيض), خلوكم على القطار الأحمر (أبو دورين) أحس اني طفشتكم ,, خلاص هذا الرابط للي يبغى يرجع للصفحة الأخيرة من التقرير http://www.sfari.com/forums/sfari26/travel29005-12/ نشوفكم ان شاء الله في الأجزاء القادمة  |
|
2008-09-22, 06:15 AM
| ||||
| ||||
| ياحبي لك يالبافاري جزء ثاني لايقل روعة عن سابقه يومك كان حافل ومليئ بالاثارة اجتمعت فيك صفات السائح المثقف فأنا من الناس الي تقدر السائح الي يستغل وقته بطريقة جيدة واستغرب من السائح الي يدفع مبالغ واذا رجع وسألته وين رحت قال دايم في السنتر والاسواق  صدقني يالبافاري ان الي سويته انت في يوم يعجز الكثيرين عن انجازه في عدة ايام ماشاء الله عليك عيني عليك باردة فاتك الباص لما كنت تصلي لكنك تعاملت مع الموقف بأيجابية تامة وبروح رياضية وفوات الباص سيكون شفيع لك ان شاء الله يوم القيامة لانك حريص على آدآء الصلاة في وقتها وهذا ماينقص الكثير من المسلمين في السفر هداهم الله جهاز ال segway اعجبتني فكرته كثيراً واستغربت لاني مااذكر اني شفته من قبل لكن سؤالي لك بما انك جربته هو يعمل على الشحن الكهربائي ولا الوقود !! برنامج جيد لكنك لو كان عندك مزيد من الوقت وزرت قصر الهلبرون لرئيت المتعة الحقيقية كذلك ضواحي سازبورغ رآئعة جداً ومليئة بالبحيرات والمناطق الجبلية الجميلة كذلك لو زرت المغارة والكهف الجليدي لاستمتعت بهذه التجربة لكن وقتك كان محدود البافاري هذا المعرف الجميل الذي لمع نجمه ووضع بصمته في سماء التوثيق السياحي الحقيقي اشكرك عى هذا المجهود الراقي تتناثر الكلمات .. وتتساقط الحروف امام روعة تقاريرك تُجبر الفارئ على احترامك لانك احترمته من خلال جودة المعلومة المقترنة بالصورة تقبل مني وافر التقدير والتحايا |
|
2008-09-22, 07:08 AM
| ||||
| ||||
| اقتباس:
أشكرك على تشجيعك المستمر لي وبعدين صوري راحت لكن نحن بانتظار صورك من هذه المدينة الجميلة بالنسبة للسكن لا هو غريب ولا شي وبالعكس منتشر وتقدر تشوف المواقع اللي حطيتها وتشوف انواع الهوستيلات بمختلف مدن العالم اقتباس:
بعدين من حسن الحظ اني لما جيت بانام كانو كلهم تحت بالمطعم بعدين صحيت أول واحد فيهم ومشيت اقتباس:
للأسف والله ما رحت ولا مكان من الثلاثة هذي لأن الوقت زي ما تعرف كان ضيق جدا وبعدين سالزبورغ يبيلها زيارة أخرى بإذن الله بس راح تكون في الشتاء ان شاء الله عشان نشوف الوجه الآخر . |
|
2008-09-22, 07:25 AM
| ||||
| ||||
| اقتباس:
شكرا لك لك على كلامك الجميل وتابعونا وفالكم طيب بإذن الله |
|
2008-09-22, 07:31 AM
| |||
| |||
| البافاري ماشالله عليك يوم واحد بس كان حافل ومليء بالجولات  اعجبتني الزحليقه والمغارة حسافة ان الصور ضاعت  لكن انت ماقصرت ماشالله عليك متابعين معك البقية تحيــــــــ سوسو ـــــــــــــــــــاتي |
|
2008-09-22, 05:09 PM
| |||
| |||
|
اخ حسافه على الصور اللي ضاعت بس فداك عيونك تقرير اكثر من رائع ان شاء الله متابعين معك للنهاية مشكورررررررررررر |
|
| الكلمات الدلالية (Tags) |
| المانيا, البافاري, الجزء, النمســاوي, تقرير, جاورها, رحلتي, سالسبورغ, إلى, ولا |
| يتصفح الموضوع حالياً : 3 (0 عضو و 3 ضيف) | |
| أدوات الموضوع | |
| انواع عرض الموضوع | |
| |
المواضيع والتعليقات المنشورة لا تعبر عن رأي منتديات سفاري وتتحمل كاتبتها المسؤولية القانونية حيال ذلك .
روابط تهمك
بدعم من vBulletin
الحقوق محفوظة لـ ©2000 - 2013، Jelsoft Enterprises Ltd
العرض العادي
