ميونخ و كما رأيت "مشارك بالمسابقة"

[aLKuwaitia]

بسم الله الرحمن الرحيم

السلام عليكم و رحمة الله و بركاتة

يعتبر هذا أول تقرير سفر لي .. اول تقرير و داشة فيه مسابقة ..
اول جزء اللي اكتبة الان .. اكتبه و انا في القطار

لكن نبدأ من الأول .. بسم الله ..

السفره عبارة عن اسبوعين و شوي .. 15 يوم ..



6 أيام في ميونخ .. حبي من أول نظره
3 أيام في زلامسي
3 ايام في سالزبورج
4 أيام في فيينا

استخراج فيزا الشنقن : كان عن طريق السفارة الالمانية بالكويت بدون أي تعقيدات او مشاكل .. الجوازات سلمناها مع تعبئة الفورم و صورة من التذاكر يوم الخميس و استلمنا الفيزا يوم الاحد ظهرا .. و السائق اهوه اللي راح سلم و استلم بعد .. و كان عطلة نهاية الاسبوع جمعه و سبت و ايضا استلمناها الاحد .. يعني لحد يسمع تعقيدات و تأخير و طلبات تعجيزية .. ابدا مافي شي حتى صورة التذاكر قالوا ما يقبلون حجز انترنت ما قالو شي و مجرد شافو الورقة و عطوها السايق قالوله ما نبيها .. اسمع عن وايد هونو بسبب الفيزا و تجارب اهلهم او ربعهم .. كل واحد يتوكل على الله و يقدم و اللي فيه الخير الله سبحانه بيسهله !

حجز الطيران : كان على الخطوط الجوية القطرية .. و سير رحلة الذهاب : كويت السفر الساعه 9:45 صباحا - الدوحة وصول الساعه 11 صباحا (ترانزيت لمدة ساعتين و 40 دقيقة) - الوصول الى ميونخ في الساعه 7 مساءا توقيت ميونخ.

سفرتنا 3 أشخاص بدون أطفال .. سعر التذكره 207 د.ك للشخص كويت - ميونخ - كويت
كان الحجز عن طريق الانترنت من موقع الخطوط القطرية عن طريق الفيزا كارد قبل 40 يوم من السفر:

Qatar Airways - The world's 5-star airline

.. و طبعا كان في توفير كبير بسعر التذكره مقارنة بالحجز عن طريق المكتب او الحجز المتأخر خاصة ان السفر و العودة خصوصا بوقت زحمة و قبل رمضان ..

ملاحظة : الفيزا المحجوز من خلالها يحب أن تكون موجوده في وقت السفر و العودة حيث بتم طلبها عند البوردينق و لازم تكون باسم احد الاشخاص المسافرين و لا يسمح باستخدام فيزا انترنت.

حجز الفنادق : ايضا كان الحجز من خلال الانترنت .. حيث اني من اكثر من 7 سنوات لم احجز من خلال مكتب سفريات او فتدق دايركت ابدا .. كله من خلال الانترنت .. توفير كبير و راحة و انت قاعد بالبيت كل شي يخلص ..

بعد البحث عن الفنادق و المقارنه و الاستشارات تم الاستقرار على :

ميونخ : كمبنسكي و كان الحجز عن طريق موقعهم الرسمي .. كان أقل سعر و لا يطلب اي عربون او حجز مبالغ في الفيزا ..

http://www.kempinski-vierjahreszeiten.com/en/home/index.htm

السعر الكلي ل 6 ليالي غرفة دبل ديلوكس : 1600 يورو اي ما يعادل 650 دينار كويتي .. الليله تكون 108 دينار كويتي .. بدون إفطار

زلامسي : فندق جراند بنصيحة من عدد من المعارف اللي زارو زلامسي من قبل و من خلال المنتدى ايضا حيث كان حجزي في فندق مافيدا و غيرته لي جراند
السعر الاجمالي كان : 440 يورو .. مع الافطار .. اي ما يعادل 200 دينار كويتي .. الليلة 100 دينار كويتي
و الحجز من خلال الموقع الرئيسي لفندق جراند .. و ايضا لم يطلب اي حجز على مبالغ الفيزا او عربون ..

http://www.grandhotel-zellamsee.at/Explore-the-Grand-Hotel.8.0.html?&L=1

سالزبورج : فندق شيراتون .. و كان الحجز عن طريق
www.booking.com
و السعر الاجمالي : 600 يورو أي ما يعادل 240 دينار كويتي .. الليله : 120 دينار كويتي
بدون اي حجز او عربون ..

فيينا : فندق مريديان .. و كنت محتاره بين ميريديان او هيلتون لكن استقريت في الاخير على ميريديان .. و الحجز ايضا عن طريق Booking.com online hotel reservations
السعر الاجمالي : 615 يورو .. اي ما يعادل : 255 دينار كويتي .. الليلة تكون : 85 دينار كويتي

التنقلات بين الاربع مدن ان شاء الله كلها بالقطار .. و تم حجز مقدما الاانتقال من ميونخ الى زلامسي عن طريق موقعهم على الانترنت ..
3 اشخاص .. ذهاب فقط .. درجة أولى .. سعر 38 دينار كويتي .. أي 95 يورو

الانتقال في اليوم الاخير من فيينا الى ميونخ للرجوع إلى ارض الوطن عن طريق طيران ايربرلين ..
و الحجز مقدما غن طريق موقع الانترنت ..
www.airberlin.com
3 اشخاص ذهاب فقط .. سعر 70 دينار كويتي .. 210 يورو ..

اما التنقل بين زلامسي الى سالزبورج .. و من سالزبورج الى فيينا .. ما حجزت و خليتها للحجز من هناك بنفس الوقت لتجربة الطريقتين ..

ملاحظات :

1- للناس اللي يسافرون وايد و يفضلون التوفير باخذ ارخص التذاكر المتوفره يفضل لو يستخرجون الاميركان اكسبرس او الداينرز كلب للحصول على ميزة الدحول لقاعات الدرجة الاولى في المطارات حيث انها توفر الكثير من الجهد و تعطيك رفرش و راحة لمواصله الرحلة .. و اللي ماعنده هالبطاقتين يقدر يستخرج البيريورتي باس .. سعرها رخيص و توصلك الى منزلك ..

2- الحجز المبكر و عن طريق الانترنت يوفر الكثير الكثير من مالك اللي ممكن تستخدمة في اشياء انفع من زيادة ربح مكاتب السفريات. خطط مبكرا و ابحث و توكل على الله و احجز .. حتى لو السفره قريبه الحجز عن طريق الانترنت بيوفر جهد ووقت و مال.

3- اكرر .. الكريدت كارد المحجوز من خلالة تذاكر الطيران سواءا على القطرية او الاتحاد او البريتيش او غيره .. لازم يكون معاك دايما و يكون باسم احد الاشخاص المسافرين.

4 - في السفرات الطويلة و اوروبا خصوصا .. ماله داعي اخذ جناط فيها الكبت كله ! .. الضروريات فقط .. كل شي موجود هناك حتى الملابس اغلبها نرجعه غير ملبوس .. و الشنط تكون اللي تنسحب و خفيفه ..
و للسيدات ماله داعي جنطة شكبرها اكسسوارات و مكياج كلش .. و يفضل اخذ حقيبة كروس للراحة ..

5- بطاقات الائتمان مهمه جدا .. و توفر عليك احراج كبير في كثير من المواقف .. احرص على اخذها .. و استغني عن الكاش تماما .. الا كاش الجيب طبعا ..

6- السفر للتغيير و كسر الروتين .. لحد يقول لا بدفع زيادة للتاكسي و ماني راكب باص او اندرقراوند .. التجربة احلا شي في السفر .. و محد تعلم بدون تجربة .. جرب و جرب و جرب .. متعه و تجديد و خبره ..
و من التغيير ايضا في السفر تغيير روتين الاكل و النوم و كلشي .. شنو فايدة السفر اذا الواحد يحاول كثر ما يقدر يوفر لنفسه اجواء وطنه ؟
غير اكلك .. مو لازم هالعيوش و الطباخ ..
غير سيارتك .. ليش هالسيايير اللي تخرع هناك ؟؟ رايح رالي و الا سياحة ؟
غير نومك .. سائح و تنام 3 الفير و تصحا 4 العصر ؟

7- ايضا اذا كنت تسافر وايد .. عند الحجز اشترك في نوادي الخطوط و العضويات الخاصة .. تكون مجانية و مفيدة .. مثلا القطرية عندهم الكيو مايل .. كل ما سافرت ينضاف لك نقاط عندهم .. و عندهم فنادق ايضا بينهم اتفاقيات كل ما سكنت باحد هالفتادق ينضاف الى عضويتك .. و تقدر تستبدل نقاطك المجمعه عقب بتذاكر مجانية او اقامة مجانية او ابقريد الى بزنس او فيرست.

8 - اي نقاط عامه اتكذرها بضيفها ان شاء الله بعدين ..

التصوير في الرحلة كان عن طريق كاميرا كانون G9


PowerShot G9 Digital Camera


و اعذروني على قلة جودة و احترافية الصور .. ترا اول مره اشتري كاميرا خاصة فيني .. بالعادة اكره التصوير و حدي اخذ لقطة بالموبايل..

هذي كانت بصفة عامه مقدمة التقرير.. و التخطيط للسفر و الملاحظات العامه للسفره .. و الى اللقاء من اليوم الأول في ميونخ ..

حاولت احمل صور بمركز التحميل كافتتاحية منوعه بس .. لكن كل مره اوصل لي انتظار التحميل و يرجعني للقسم مره ثانيه !

[speedbird]

بداية مميزة وقوية في انتظار الصور

اكيد بتكون رهيبه

[أم جواهر]

أولا: حمد لله ع السلامة

وبداية موفقة ما شاء الله

وتشكر ع النصائح الحلوة

واللي بالتأكيد راح يستفيد منها الأعضاء

ومتابعين لك.. وبانتظار بقية التقرير

[aLKuwaitia]

صور متنوعه مصغره قبل التفاصيل :

[after next]

أختنا الكريمه aLKuwaitia...

الحمدلله على سلامة الوصول ..

وبدايه رائعه من الشرح وذكر التفاصيل المهمه التي تفيد المسافر ..

وشكل البدايه توحي بتقرير مميز ورائع ..

بإنتظار باقي التفاصيل والصور .. ولو يتم تكبيرها شوي..

تقبلي تحياتي ..

[البافاري]

يا هلا بيك والله

أنا صراحة معجب بالتفاصيل المهمة جدا والمذكورة في نقاط وهذا اللي يعجبني

وصراحة وبدون مجاملة في الجزء البسيط هذا من التقرير فيه معلومات كثييييييير أول مرة أعرفها

أهم شي أبغاك تستمرين على نفس المنهاج ان لم يكن افضل

لكن طلب صغير ... الصور لو تكون أكبر شوي يكتمل الحلا ... 640x640 أو 700x525 ممكن تكون حلوة ومناسبة

[المتألقة]

aLKuwaitia

حمدا لله على سلامتك أختي الكريمة ...

بداية رائعة وممتعة .....تقرير وصور متميزة .....في إنتظار بقية التقرير ..

[الصادي الأول]

بداية رائعة و تقرير يدل على إحترافية عالية

ماشاء الله داخلة بقوة

موفقة إن شاء الله

ننتظر القادم

[كيك و عسل]

بدايهـ قويهـ مليانهـ بلمعلومات الوافيهـ

تابعي عزيزتي .. والحمدالله على السلامه

[خذني معاك]

الحمدلله على السلامه

إنطلاقه قويه .. و بدايه جميله تبشر بقادم مذهل

بالتوفيق أختي الكويتيه