|
29-06-2006, 07:30 PM
|
||||
|
||||
|
تقرير مفصل عن رحلتي القصيره في سيرلانكا
بسم الله الرحمن الرحيم السلام عليكم ورحمه الله وبركاته اخواني يسرني ان اقدم لكم تقريرآ مفصلآ مدعمآ بالصور عن رحلتي الغير متوقعه إلى ربوع سيرلانكا وسأجعله في عده مراحل لتسهيل قرائته ولتسهيل اخذ المعلومات اولآ التخطيط على السفر في تمام الساعه الرابعه من عصر يوم السبت الموافق21/01/2006م كنت متواجد في دبي ورحت لم الخطوط العربيه للحجز على الرياض وبعد وصولي لمكتبهم المتواجد قبال دوار الساعه وبعد سؤال الموظف افادني ان اقرب رحله على الرياض بعد3ايام ولفت انتباهي لوحه معلقه على الجدار مكتوب عليها اجازات العربيه المخفضه لكولمبو مع الحجز في الفنادق قلت في نفسي كم بتكون قيمه التذكره مع الاقامه في الفنادق وبعدين كولمبو عاصمه سيرلانكا او كما يسمونها فردوس الدنيا وسألته قالي اختر اسم الفندق وبعد 3ايام يجينا الرد قلت طيب كم قيمه التذكره بدون فنادق قالي ب1000درهم قلت في نفسي رخيصه ولايبيلها شور هاه اروح ولا ماروح لحالي ولا معي خوي صعبه شوي يارجال روح وشفيها وبعد محاولات عديده مع نفسي ظهرت غريزه السفر الموجوده في الجينيات الوراثيه عندي ..!! وانتشرت في جميع انحاء جسدي وحسيت بأنتعاش مصاحب بقشعريره بداء من راسي إلى طرف اصبع قدمي وارتجلت للموظف قائلآ احجز لي على رحلت الليله بصوت عالي..!!! ضحك الموظف قال متا تبي العوده قلت متا اقرب عوده قال كل يوم رحله قلت بعد خمسه ايام بس الحجز خله كولمبو الشارقه الرياض قال كولمبو الشارقه الرياض بسعر ب1355 درهم ومايمديه يكمل كلامه الا انا مزنده الدراهم وبعد ماقصيت التذكره توجهت لأقرب كافيه انترنت واخذت ربع ساعه لأن الوقت ضيق مامعي وقت الساعه لأن تشير الى الخامسه مساء والرحله الساعه التاسعه والنصف مسئآ ولازم تكون قبلها في المطار الساعه السابعه ومالقيت الا شويت معلومات عن الفنادق واسجلها في الجوال لأن محل الانترنت ماعند طباعه وعلى الفندق وارتب الشنطه واودع صاحبي اللي تعرفت عليه في الطياره وانا رايح دبي وسكنت انا وياه يومين وامشي وعلى المطار مطار الشارقه وبعد مانزلني صاحب التاكسي ومشاء ادور على الجوال في جيبي اللي يمين واللي يسار ومره ومرتين اوثلاث الين بغيت اقطع البنطلون!! ياولد مهوب صدق الاصدق وانحااااس من فوق الاتحت واحس بنفس الشعور السابق لاكن بدون انتعاش الجوال نسيته مع صاحب التاكسي والمعلومات فيه ولارقام المهمه اللي ممكن احتاجها في أي لحظه وتقلب المزاج ويجي هندي يقولي تبي عربيه واطالعه وانا اقول في نفسي هاه ياولد اكنسل ولا امشيء كلها جوال جت العافيه لا لامايصير تروح والجوال فيه ارقام من تحتاجهم في أي وقت سبحان الله طيب وفي نفساللحظه مرت علي فكره مرور الحمير اني اتصل وفي نفس الوقت اقول اكيد لاتصلت بيطلع الجوال مغلق ماهي غريبه سواق تاكسي باكستاني قيمه الجوال مكده اسبوعين يارجال الدنيا فيها خير وانشاء الله بتلقاه برا ولابيرد عليك ويرجع جوالك هونها وتهون المهم واطلع برا بسرعه البرق والقى صاحب تاكسي قلت لو سمحت جوالي نسيته مع صاحب تاكسي وابي جوالك اكلمه ويعطيني الجوال واكلم ويدق اول دقه ويدق قلبي معها عشر وثاني دقه ويدق قلبي معها عشرين وثالث ورابع والخامسه ويرد الو قلت ويييينك انا عند المطار ابي جوالي بسرعه تعال قال 5دقايق وانا عندك خلك في نفس المحل وانتظر 5دقايق الا هذا هو موقف تصدقون بغيت اسلم على خشمه بصراحه انه امين الله يجزاه خير ولا الجوال يمكن يجيبله 1400درهم واخذ الجوال وامد له مئه درهم ويعيي عنها واحلف انها ماترجع وقلت والله انها قليله في حقك الله يوفقك ثانيآ ثانيآ المطار اللحين رجعت المياه الى مجاريها والنفسيه صارت توب ولله الحمد وادخل واضف عفشي في الشحن واقص البوردنق وامر الصراف واصرف الدراهم اللي معي الى دولارات ريحتها تصك المخ وانتظر إلى ان ركبت الطياره واجلس في مقعدي وعن يميني وعن شمالي سيرلانكيات لايتكلمون العربيه وبعد فتره قصيره اقلعت الطائره وكان مافيها ولا واحد يتكلم العربيه ألا قائد الطائره محمد صبري مصري الجنسيه واحد افراد الطاقم اسمه بشار لبناني الجنسيه اما باقي المسافرين فجميعهم سيرلانكيين ماعدا عائلتين اوروبيين وبعد مروراكثر من ساعتين وزعو علينا كروت التعبئه لدخول الدوله واتورط بكرتي واطالع الا في مقدمه الطياره واحد له دقن قلت انحلت هذا أكيد مسلم والمسلم أكيد يعرف عربي بيعبي الكرت ويخارجني من المطار واروح يمه واسلم ويلتفت علي ولارد السلاام تدرون ليش لأن في نص جبهته نقطه حمراء يعني من عباد البقر واصرف الموضوع قلت تواليت تواليت ويأشر لي على دورت المياه الله يكرمكم وانادي بشار ويعبيه لي وبعد اربع ساعات عدآ ونقدآ من اقلاعنا من مطار الشارقه اعلن قائدها بهبوطها التدريجي في مطار كولمبو والحمد الله نزلنا في المطار الساعه الرابعه صباحآ الاربع الذي يعتبر من المطارت الجيده بنسبه لدوله كسيرلانكا واقضب السرا اللي عند الجوازات الزحمه ماكانت بالمره يعني ابو عشر دقايق وانت مخلص وفي نفس اللحظه وانا في السرا كنت افكر وش لون اتفاهم معهم عشان سالفت الفيزه ( سبق ان قريت موضوع واحد في المنتدى ذكر الفيزه انها موجوده عند السفاره او في المطار) وبعد وصولي للموظف واعطيه الجواز وانا اقرا المعوذات واقول في نفسي الله يخارجني وبعد ثواني ختم الجواز واعطانياه وهو يقول بما معناه كولمبو ترحب بك واطلع من عنده على سير الشنط وادور على شنطتي واخذها واتوجه مع العالم اللي معي إلى تفتيش الجهاز وامسك السرا معهم ويجي واحد يقول يو ارابي واهز راسي يعني نعم ويمسكني بيدي وياخذني معه..!!!! قلت هذا اللي انا جاي ادورها وش يبي؟؟ مني؟؟ وعلى وين موديني؟؟ ويمر علي شريط التكهنات المرعبه ..!!!!عز الله رحت فيها!!!! يالله المخارج !!!وفيه باب على يمين تفتيش الشنط قام يبربر علي ويأشر على الباب فهمت انه يقول ادخل مع الباب قلت اكيد ان هذا باب السجن حقهم يالله عساه خير لالغه سيرلانكيه ولالغه انقليزيه المهم وادخل مع الباب الامكاتب الصرافين قدامي ومن الفرحه اسلم عليهم كلهم وكلن يناديني من عنده يبيني اصرف واصرف 100دولار بــ10052عشره الاف واثنين وخمسين روبيه سيرلانكي واتوجه على مكاتب تأجير الفنادق طبعآ لم يسبق لي زيارت سيرلانكا قبل ولم يكن عندي معلومات عنها سوا معلومتين اخذتها من المنتدى قبل الاقلاع وهي ان الفندق اللي فيه مطعم عربي اسمه قلداري وان فيه واحد اسمه زهراني المغربي يتوجهون له اكثر السياح هناك المهم نرجع لموضوعنا وادور في المكاتب الالوحه قلداريا اخر مكتب واتوجه له واتكلم معه الاهو يعطي كلمتين عربي وعشر سيرلانكي يقولي ان الغرفه مع الضرائب مع الفطور المجاني ب85دولار وبعد المكاسرات اللي تعلمتها في اندونيسيا توصلنا الى سعر 60 دولار واسأله عن زهراني قال هذا مكتبه ومسكر اللحين يفتح الساعه10صباحآ واعطيه اسمي قلت خله يجيني بالفندق واخذ من عنده تاكسي ب1600روبيه مايعادل 16 دولار واطلع مع التاكسي الساعه الرابعه والربع صباحآ وبعد ركوبي معه لاحظت انه يتكلم العربيه بشكل جيد وبعد45دقيقه الان في الفندق قضيت وقت الطريق معه في كثيرآ من الاستفسارات عن المناطق السياحيه وعن الاسعار يعني بالعربي استفدت منه ثالثآ الفندق وبعد وصولي الفندق اللي يفتح علو وجهه الشرق ان كان ماني بغلطان توقف صاحب التاكسي ونزلت انا وعفشي واتوجه للرسبشن واعطيه الفاوتشر اللي اخذته من مكتبهم اللي بالمطار ويطقطق بالجهاز اللي قدامه وبعد ثواني قام يبربر بكلمات لافهمها واظنها الانقليزيه واتركه لمن خلص من كلامه وارد عليه بصوتٍ خجول وانا اقول نو اسبك انقلش يو اسبك ارابي.....؟ ويطالعني بنظره مخيفه وكأنه يقول في نفسه كلامي اللي راح كله هباءٍ منثور!! ويلتفت على واحد في جمبه ويبربر معه !! وينادون واحد المهم ويجيك ذاك المتين مبينه عليه النعمه من يوم شفت وجهه متنفخ وعلابيه كبار دريت انه قد اشتغل بالسعوديه!!:p وبعد ماوصل عندي قال ياهلا ومرحبا واخمه واسلم عليه مسوي اعرفه قال انا نيهال مدير السوكرتيين اللي هنا وقدسبق واشتغلت بالرياض 15سنه المهم الرجال قام يبربر معهم وبعد مانتهى من كلامه اخذني على جمب وقال لي اسمع اللحين لو حجزنا لك بيحسبون إلى الظهر يوم قلت والحل قال انك تنتظر إلى الساعه 7صباحآ ونحجزلك إلى بكره الظهر يوم واطالع الساعه الاهي5 الصبح وربع قلت مايظر ساعتين الاربع واسلم ثاني مره عليه عشانه فزعلي!! واخلي الشنطه عنده واقوم اتجول في انحاء الفندق الظخم واشوف المطعم مكتوب عليه يفتح6صباحآ قلت كويس اساسآ فرصه عشان افطر واشوف الخيمه العربيه على اليسار وفي تمام الساعه السادسه صباحآ فتح المطعم واسأل نيهال قلت الفطور مجاني قال لا انت باقي ماحجزت بكره نفطرك مجانآ واسأله عن سعر الفطور قال بوفيه مفتوح ب900روبيه اي مايعادل 9دولار المهم قلت خلني احلل قيمه الفطور واشكل من كل نوع حق نفرين((من الجووووع)) واصفها لك على الطاوله اللي يشوفني يقول عازم 10واسمي بالله وابدا بمشروع التسمين إلى ان طقت اذني من الشبعه يالله لك الحمد والشكر والمنه واتجول في باقي انحاء الفندق الى ان وصلت الساعه 7 واحجز واطلع انا ونيهال وعامل تحميل الشنط الدور التاسع غرفه913 وادخل واتفاجىء بالغرفه عارفين ليه لأن الفنادق5ستار معروفه بأثاثها الراقي وموكيته ونظافته وهذو لي عكس الفندق يبهرك بمداخله وحجمه واستقباله بس الغرف انا اصنفها من الفنادق 3ستار حسب تجاربي للفنادق المهم وينزل الشنطه العامل ويوقف ويطالعني واطالعه وينرفز عيونه وانرفز عيوني مثله ويتدخل نيهال قائلآ عطـنا هديه!!!! واتذكر معلومه في موضوع احد الاعضاء عن نفس الفندق ان عماله حقين بخاشيش ولاينظفون الغرفه الابالبخشيش واحس بنغزه في اقصى المخ من اليمين في راسي!!! اثاريها خليه الاستذياب واللكاعه اشتغلت عندي وعطت اشاره موجهه للقناه السمعيه المستذيبه مفادها ان مامعي صرف بعدين لاصرفت يكون خير ويقاطعني نيهال قائلآ.... انا سوي صرف من الرسبشن ورديت عليه ان مامعي الا الصراف لازم روح بنك وضحك ضحكه ماكره مخيفه مثل اللي يقول اوريك ياللي ماتفهم انقليزي!!!! وطلع من عندي واتجول في الغرفه اللي مكوناتها سريرين وتلفزيون وسفتي بوكس ودوره مياه الله يكرمك غير نظيفه بلإضافه إلى ثلاجه صغيره محمله بعصيرات اول مره اشوفها !! الغرفه بشكل عام اعتبرها3 ستار... واحط الاخضر في السفتي بوكس والمحفظه بلإضافه إلى التذكره واسحب كراعيني بأتجاه السرير وعضامي لها طقطقه من التعب ولارهاق واول ماتلحفت بالبطانيه ألا التلفون يرن قلت هذا اكيد نيهال..!!! عشاني ماعطيته هديه بيطردني من الفندق ....!!!! اللهم اجعله خير!!! ارفع السماعه الوو قال مستر ........؟ قلت نعم مين ..نيهال...!!! قال لا انا زلفي من شركه زهراني ابي اخذ منك موعد متا اجيك انا وزهراني!! قلت يالله انك تحييه واعطيه كم بوسه في التلفون واوعده الساعه 4عصرآ وافصل سلك التليفون واغط في نومه عميقه خاليه من الاحلام والكوابيس...!! هذي صوره للغرفه اول مادخلت 7 7 7 7  7 7 7 7  واقوم الساعه2ظهرآ واغير ملابسي واطلع من الغرفه متجهآ إلى اللفت واظغط على رقم صفر اللي هو اللوبي ويتوقف عند الدور الثاني قلت ايه خرب اللفت يالله المخارج وينفتح الباب الا قدامي واحد قال نازل واهز راسي .....نسيت انه عربي سألني الاخ عربي واهز راسي مره ثانيه....ياولد انا وش فيني مستنكر الادمي العربي قال من وين قلت من الرياض قال ياهلا والله محسوبك عبد الله من الرياض ونعم والله وش عندك قال عندي مكتب استقدام وجاي اخلص اوراق من هنا وانت وش عندك قلت مدري تمشيه سياحه قصيره طلعنا من اللفت واتجهنا على خارج الفندق سألته عن المطعم العربي قال مايفتح الا بالليل قلت طيب والبديل المناسب قال مطعم ال نندوس وهو قريب ب200روبيه يوديك التاكسي شكرته وتوادعنا وركبت مع التاكسي و5دقايق وانا عند المطعم وادخل المطعم واشوف الاوربيين مالينه وادور لي على طاوله واجلس ويجيني العامل سألني وش تبغى قلت ابي رز رز رز مافهم من شيء وبعد عده محاولات توصلنا لحل ألا وهو انه يدخلني داخل ويوريني الاكل ويقول اختر اللي تبي واختار طبعآرز وبنت المذن واتغدى عندهم واحاسب بـ400روبيه اي مايعادل 4دولار واطلع من عندهم واخذ تاكسي وعلى الفندق واول مانزلت من التاكسي واحس أني بقابل احد يسلم علي ......طبعآ هذا بفضل الحاسه السادسه الي امتلكها واول مادخلت مع الباب اللي اللي قدامي يقول مستر .........؟ قلت نعم انا هو بلحمه ودمه!! قال انا مستر زهراني المغربي !! واخمه بغيت اكسر ظهره شلونك وكيف الحال وش اخبارك .....خلونا من سلام السعوديين!! ونجلس باللوبي وكان برفقته 2 واحد حضرمي اسمه زلفي والثاني عجزت احفظ اسمه ونطلب شاي ونتقهوى وبعد عده دقائق تم الاتفاق بيني وبينه على ...... انه يأمن لي سياره بسائقها مع المترجم اللي هو زلفي ويأمن لي حجز بالفنادق في كلٍ من كاندي ورام بورا منطقه الشلات ونورإليا شامل الضرائب والفطور مجاني لمده اربع ايام يعني ماعلي ألا الغدا والعشاء بسعر وقدره 300دولار وثم كتب العقد وحاسبته وكان الوقت يشير إلى الرابعه والنصف عصرآ وبعد ماأنتهينا قال لي عندك شغل اللحين ولا لا قلت أبدآ قال ابيك تروح معي لمكتبي قلت ماعندك مشكله مشينا واطلع انا وياه ومرافقيه لمكتبه اللي يبعد 10 دقايق عن الفندق واتقهوى عند كاسه شاي ونتطرق في حديثنا إلى السياحه ومن ثم إلى العرب ولأمان هنا يقول زهراني المنطقه امنه بعد الله في كل شيء ويورني اوراق عنده فيها مواقع سياحيه عربيه كتبوها له ناسبق وان زاروه ولفت انتباهي منتداناكان من ظمنها واسماء ناس قدسبق وان سطرو رحلاتهم في بعض المواقع واكتب اسمي ورابط المنتدى عنده بخط كبير يقراه العمى وبعدها نطلع على جزيره صغيره في وسط بحيره مقابله لمكتب زهراني ونتمشى فيها شوي لفت انتباهي كثرت الزحمه فيها واكثر هم سيرلانكيين بعوائلهم شوي ويأذن المغرب واقول انا الله اكبر ويموتون علي من الضحك قلت وشفيكم قالو هذا مو أذان هذا المعبد البوذي يأذن 6 الصبح و6 المغرب ونطلع من الجزيره الصغيره وعلى سوق قريب منها ونتمشى فيه وبعدها نرجع على الفندق ويودعني زهراني على انه بكره يمرني السواق الساعه 10 صباحآ برفقه زلفي للخروج لكاندي واتكي في اللوبي لمن فتح المطعم العربي واقابل مديره عفيف صفري لبناني الجنسيه ونتجاذب الحديث انا وعفيف عن السياحه والعرب اللي يجونه في مطعمه العربي الوحيد في سيرلانكا حسب كلامه يقول ان صارله سنه من يوم فتح المطعم وان اكثر زواره هم العرب وبدأو يكثرون في الاونه الاخيره واكثر زواره هم اصحاب المكاتب والتجار اللي لهم تجاره في كولمبو المهم واتعشى عنده بوفيه مفتوح انواع واشكال من الاكل العربي بــ1000الف روبيه اي 10دولار لفت انتباهي في المطعم تواجد السفير الاماراتي برفقه زوجته وابنائه وفي الجهه المقابله السفير الليبي ومرافقيه وبعد العشى اطلع على برا الفندق طبعآ الفندق على الكورنيش واتمشى على الشاطي مايقارب الساعه مستمتعآ بالجو العليل!! وبعد ذالك رجعت لم الفندق وسألت الموضف فيه انترنت قال نعم والساعه بـ800روبيه اي 8 دولار واخذ ساعه متجولآ في بريدي الاكتروني ومتمركزآ في الرحال العربي قسم دول شرق اسيا ادور على معلومات تفيدني وانا هناك وبعد ماخلصت طلعت على الغرفه واقلب في قنوات التلفزيون العربيه حتى تسلل النوم إلى عيوني ونومه عميقه خاليه من الاحلام والكوابيس.. اترككم مع بعض اللقطات من الصور... زهراني المغربي اثناء كتابه العقد  احد شوارع كولمبو  صوره لصنم تجدها في جميع شوارع واحياء كولمبو  مدخل الجزيره الصغيره التي وسط البحيره  مدخل المطعم العربي في الفندق  مدير المطعم عفيف صفري  يتبع 
|
| Google AdSense |
|
30-06-2006, 01:32 PM
|
||||
|
||||
|
واقوم الساعه 9صباحآ واطفي التلفزيون اللي ناسيه شغال وصوته مسموع من البارح .....!! يالله وش ذا النووومه الثقيله...!! وانزل على المطعم تحت وافطر من البوفيه المفتوح .((طبعآ مجانآ حسب الاتفاق )) واطلع على الغرفه وارتب اغراضي استعدادلآ للخروج لكاندي ألا التلفون يدق الو مين بابا فين......امزح معكم قال مستر ....قلت نعم قال انا السواق وننتظرك تحت وانزل واسوي خروج من الفندق واودع صديقي نيهال طبعآ بدون بخشيش ونظراته مخيفه !! الخروج من الفندق والطريق إلى كاندي واطلع معهم على سياره صني بوكس موديل 2000 تماتيك ونمسك خط كاندي بأتجاه وسط الجزيره طبعآ الخط ضيق وممل وزحمه بس اللي يهونها المناظر الخلابهاللي تنسيك هموم الطريق.. وبعد نصف ساعه من الفندق قابلنا اول مدينه الا وهي(( بيليا قودا)) وبعد نصف ساعه مدينه ((كريبان قودا)) وبعد فتره ليست بالقصيره وصلنا ((كدا وتا)) وبعد فتره وصلنا مدينه الاناناس ((ياكلا)) وقفنا على جمب الخط عند واحد يبيع اناناس وشرينا منه وواصلنا مسيرنا وبعد فتره مدينه ((ورقه بولا)) وبعد 20 دقيقه وصلنا (( نيتمبو كيق قلا بينا ولا)) وبعدين لفينا يسار سألت السائق الى اين قال على مدينه الفيل او حديقه الفيل يقول انها تبعد 6كيلو متر وبعد ماوصلنا الحديقه قصيت تذكره دخول بــ500روبيه وندخل مع ذاك الشارع الضيق طبعآ مشيآ على الاقدام وكان الشارع مليان من محلات بيع المنتوجات الجلديه (( من جلد الفيل )) من شنط الى كراسي وطاولات وقبابيع وتحف وندخل المقهى او المطعم اللي على النهر الجميل واحصل اكثر من 100 اوروبي اشكال والوان حمران عطران شبان وشيبان ...!! الساعه الأن 2ظهرآ واتغدا كالعاده السابقه ...!! واخذ كم صوره تشوفوني ازاحم هالاوربيين ومدري وش السالفه بس تطبيقآ لمقوله (( مع الخيل ياشقرا )) وبعد ساعه طلعنا لنكمل مسيرتنا بأتجاه مدينه التاريخ المدينه الاثريه اللي يقولون ان تاريخها يعود إلى ماقبل 2500سنه وبعد 15 دقيقه وصلنا مدينه البهارات (( ماوا نيلا)) لكن اني مادخلتها لأني كنت مصدع وتعبان شوي وبعدها بنفس المسافه وصلنا منطقه ((كدوقتا)) وبعدها ((بير دننيا)) وبعدها بعشر دقايق وصلنا كاندي كاندي وهي منطقه جبليه مشابهه للبونشاك اللي في انونيسيا ونمر سوبرماركت وناخذ شويت اغراااض ونطلع للفندق في اعلى الجبل وصلنا فندق ((سويس ريسي دنسي)) وننزل ونحصل زهراني قد كلمهم وسوا حجز لغرفه مع الافطاروانزل شنطتي في الغرفه الجميله المطله على منظر خلااب وانزل اتجول في الفندق الصغير الهادي وانزل عند الرسبشن واسأله عن المساج قال في الدور الاول واطلع واحصل عندهم 5انواع من المساج واختار افضلها بعد الاتفاق مع البنت كارديا بــ1800روبيه مقابل ساعه من المساج وصراحه اللي ماقد سوا مساج سيلاني فهو محرووم خليط من زيوت الاعشاب الطبيعيه كان اكثرها مفلفل وحار تحس ان الجلد بيولع مع المساج ..!! وبعدها اطلع برا الفندق واخذ لي توك توك بــ100روبيه مقابل أخذ جوله قبل المغرب في انحاء المدينه العجيبه حوالي ثلث ساعه في ارجاء المدينه الهادئه ليلآ والمخيفه ومرعبه بعد غروب الشمس..!! وارجع على الفندق واريح في الغرفه إلى الساعه 9ليلآ وانزل على المطعم واتعشاء واطلع على غرفه السواقين والقى الشباب طاقين الوزره وفالينها بلووت ومعه 3 سواقين اتضح لي فيما بعد انهم سواقين مع اوروبيين في نفس الفندق ... واخذ معهم كم طقه وارجع على الغرفه واقلب في القنوات اللي عددها 5 قنوات وكلها سيرلانكيه واحط راسي ونومه عميقه خاليه من الاحلام والكوابيس. اترككم مع بعض الصور الطريق إلى كاندي *******************    اللي ماذاقه فاته نص عمره حوز الهند  جسر من فوق نهر لايتجاوزها سيارتان مع بع بعض ضيق  حديقه الفيل  من هنا قصيت تــذكره الدخول  الشارع اللي فيه محلات بيع منتوجات الجلد  صوره النهر وانا في المطعم   الفيله اول ماجابوهم    هــذا مستانس ومتقطع من الوناسه  هذي صوره واحد يرقص الكوبرا   لحضه دخولنا مدينه(( كاندي))  القطار في مدينه(( كاندي))  صوره لمدخل الفندق اللي في كاندي  صوره للغرفه  صوره من نافذه الغرفه   يتبع
|
|
30-06-2006, 02:40 PM
|
||||
|
||||
|
ما شاء الله عليك اخي عمعوم تقرير ولا اروع والصور ولا احلا من كذا يعطيك العافية اخي وعزيز عمعوم علي الرحلة الجميلة ؛؛؛ حقيقتا وانا عندما اقراء القصة وكأني عايش واقع السفرة معك وشكرك اخي علي المشاركة وننتظر منك المزيد اخوك ابو عبدالله
|
|
30-06-2006, 03:19 PM
|
||||
|
||||
|
عمعـــــــــوم تقرير ولا أحـــــلى ؛؛؛؛ ورحلة من جد شكلك إستانست فيها ؛؛؛؛ وصراحتاً مثل ما قال الأخ بوبو ؛؛؛؛ دخلتا جوالرحلة ؛؛؛؛ أنا ما أعرف إن سيرلنكا بهذا الجمال ؛؛؛ يعطيك ألف عافية ؛؛؛؛ وتستاهل الجائزة عمعـــــوم ؛؛ ^^^ ^^^ ^^^ تحياتي لك ونتظر التكملة
|
|
30-06-2006, 03:46 PM
|
||||
|
||||
|
عــــمـــــعــــــوم
|
|
30-06-2006, 04:05 PM
|
|||
|
|||
|
عمعـــــــــوم
|
|
30-06-2006, 07:53 PM
|
||||
|
||||
|
[ QUOTE=بوبو] ما شاء الله عليك اخي عمعوم تقرير ولا اروع [/quote]والصور ولا احلا من كذا يعطيك العافية اخي وعزيز عمعوم علي الرحلة الجميلة ؛؛؛ حقيقتا وانا عندما اقراء القصة وكأني عايش واقع السفرة معك وشكرك اخي علي المشاركة وننتظر منك المزيد اخوك ابو عبدالله ابوعبد الله اسعدني تواجدك الكريم
|
|
30-06-2006, 07:56 PM
|
||||
|
||||
|
اقتباس:
وسيرلانكا جميله جدآ ولاكن يبيلها قروب وتواجدك الكريم يكفى عن الجائزه
|
|
30-06-2006, 07:59 PM
|
||||
|
||||
|
اقتباس:
اخي وعزيزي مدمن آندونيسا اشكرك من عميق اعماق قلبي على الثناء والتواجد الكريم :rolleyes:
|
|
30-06-2006, 08:06 PM
|
||||
|
||||
|
اقتباس:
اخي مراحب مرحبآ بك اسرني تواجدك الكريم وإذا وصلت خذلك فندق من المكاتب اللي في المطار ويستحسن ان الفندق يكون على الشاطيء لأن كولمبو زحمه سيارات ولايمكن ان تشوف الطبيعه اللي عليها الكلام الا خارج كولمبو ووقتك لايسمح لك بأنك تطلع برا كولمبو فأنصحك تاخذ فندق يكون على الشاطيء لأن الشاطيء عجييييب
|
 |
| الذين يشاهدون محتوى الموضوع الآن : 2 ( الأعضاء 0 والزوار 2) | |
| أدوات الموضوع | |
| طرق مشاهدة الموضوع | |
|
|
((اضغط على رقم صفر اللي هو اللوبي
العرض العادي
