بسم الله وإبتدأ مشوارنا إلى مطار الرياض وكانت رحلتنا يوم الخميس 7|2|2008م الساعة الرابعةعصراًعلى خطوط الإتحاد وكان سعر التذكره سياحي للشخص الواحد3185 ريال سعودي وطبعاًنزلني زوجي عند الصالة وراح يدخل العفش دخلت الصالة مالقيت ولا كرسي فاضي العالم كلها بتروح مصر زحمة وقلت بس هذي عين زوجي دايم يقول أية أنتم يالحريم تحطون رجل على رجل وأنا ندور وقفت لين أعلنو عن الرحلة ونجيك طايرين لحد البوابة ونركب بسرعة وتقلع بنا لمطار أبوظبي وأعلن الطيار التميمي أن الوقت في بلد الوصول السابعة مساءًووصلنا بالسلامة والله يازين ذا الطيار ماشاء الله علية ولاقوة إلا بالله هذي القياده ولا بلاش أدعوا إن الله يوفق عيالنا ونشوفهم في كل المجالات وصلنا بالسلامه مطار أبوظبي ثم أتجهنا لمكتب متابعة الرحلات للتأكد من الرحلة لايكون عليها تغيير وكان كل شي في وقتة وش نسوي من خاف سلم ومر الوقت لين أعلنو عن وقت الرحلة وكانت الساعة 11 مساءً وأتجهنا بسرعة للبوابة وركبنا الطيارة وإستعدينا للإقلاع وقرينا دعاء السفر وبسم الله طارت الطيارة وكانت مدة الرحلة 6 ساعات والطيارة مافيها ولا ربع كرسي فاضي والرحلة كلها أجانب و5% عرب ويالله ذا البزر اللي قدام بدى يصيح قهرني والله من الإقلاع للهبوط وهو يصيح بدون مبالغة ورد علية بزر في أخر الرحلة الظاهر البلى فيني ماقد ركبت طياره الأوفيها بزر يتسلط ههههه
ونزلنا من الطيارة أخيراًبالسلامه وأتجهنا لمكتب إستخراج الفيز وأحنا أهل ديرة جايبين صورنا معنا وأنتهينا وأنطلقنا نمسك سرى الجوازات مرينا الصالة الاولى زحمة والثانية زحمة قال زوجي يمكن اللي بعدها فاضية قلت تراك بتضيع وقتنا وانا ندور سرى فاضي خن نمسك سرى مع المسلمين وأنا صادقة أهل عمان مالين ذا الصالة والله ونوقف في الطابور نص ساعة يوم جى الدور علينا قالت الموظفة سكرنا أمسكوا طابور ثاني قال زوجي أقول فكيني عليها ماتستحي العرب وأقفين وتصك الباب في وجيهم قلت يارجال أمسحها في وجهي وخل العرب على جنب والله أن جرونا بأذنينا والله أن يقولون تراهم أرهابيين أمش بس وأذكر الله ههههههه يوم مسكنا طابور ثاني ((الموظف رجال)) الأوالله وتأخذ جوازات الأوربيين اللي ورانا قاللي زوجي لاذي قاصده خليني أوريها وأحلف علية هالمره بس علشاني ههههههههه
واللة الشرهة موب عليها علينا يوم نمسك سرى حرمة
لاتزعلون مني ياحريم بس قهرتني
يازين الرجال ربع ساعة وأحنا خالصين لا ويبتسم بعد ونأخذ الشنط وننطلق على مكتب حجوزات الفنادق
ياناس أنا عايشة مع واحد بارد تخيلو قاطعين هالمسافة وما حجز أوتيل مع أننا متفقين على كذا أوتيل من اللي دايم نسكن فيها ونحجز بالتليفون وأسئلة حجزت وين قال مفاجأة أثاري المفاجأة بيحجز من المطار وكل ماسئلنا عن أوتيل قالوا فل مابقى ولا أوتيل ياهوه وش السافة والله راس السنة الصينية وأهل هونج كونج والصين مالين بانكوك وإذا فضيت أعلمكم في أي رصيف كنا بنام