X أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمات، كما يشرفنا أن تقوم بالتسجيل معنا بالضغط هنا
اعلانات منتديات سفاري
rentalcars.com



إضافة رد
 
أدوات الموضوع انواع عرض الموضوع
  #291 (permalink)  
قديم 2007-10-18, 12:23 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي





اقتباس
مشاهدة المشاركة المشاركة الأصلية كتبت بواسطة بــدر الجنــوب


الانسه المحترمه / زهرة الزيزفون

لقد اعجبني تقريرك وسررت كل السرور به لدرجة انني عندما كنت في البنشاك

الجبل - كنت اتصفح المنتدى ورايته في 3 صفحات فقلت اذا رجعت السعوديه سوف اعلق عليه

ورجعلت وجلست ابحث فيما لايقل عن 6 صفحات من صفحات المنتدى الا والتقرير

قد تطور اكثر مما شهدته وانا في البنشاك

فلكي مني اعجابي الغير متناهي وسروري به وجراءتك بكل حرف كتبتيه

خالص الاحترام والتقدير


اخوك
بدر الجنوب

ابونــــواف


اشكرك جزيل الشكر اخي بدر الجنوب وهذا من طيب اصلك وكرم اخلاقك وفقك الله وسدد خطاك

  #292 (permalink)  
قديم 2007-10-18, 12:26 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

اقتباس
مشاهدة المشاركة المشاركة الأصلية كتبت بواسطة ممتاز95
وصلت في قرائتي لتقريرك الى الصفحه 18

في تيه (في رقبتي ) انه ميه ميه ولا عليه غبار

اسال الله ان يوفقك ويرزقك وزوجك واخوك

الرزق الحلال الطيب ويبارك لكم فيه

بصراحه

انا اقترح انه يعطى جائزه او وسام

لما فيه من المتعه وحسن لوصف والسرد

اللهم احفظها وزوجها وارزقهما الجنه

اميـــــن



وفقك الله اخي الكريم واشكرك جزيل الشكر على مرورك ومداخلتك الاكثر من رائعة ( وفي تيه تلقفها تاك ان مرورك اسعدني كثيرا وردك الجميل زاد من معنوياتي بارك الله فيك )

رد مع اقتباس
  #293 (permalink)  
قديم 2007-10-18, 12:27 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

اقتباس
مشاهدة المشاركة المشاركة الأصلية كتبت بواسطة ونين الليل
خيال في خيال هذا الي اقدر اقوله

رحلتي بعد بكره يوم الخميس الموافق
10/18

وصدقيني اني استفدت بشكل كبير من التقريير

تسلم ايينك ما قصرتي



الحمدلله انك استفدت يااخي الكريم ووالله انني لم اكتب هذا التقرير إلا للفائدة واسأل الله لك التوفيق في رحلتك وترجع لنا بالسلامة

رد مع اقتباس
  #294 (permalink)  
قديم 2007-10-18, 12:29 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

اقتباس
مشاهدة المشاركة المشاركة الأصلية كتبت بواسطة أصيل99
عيني عليك باردة

ماشاء الله تبارك الله

((((( مذهلة ))))

كل شي أعجبني بحق ..

وأكثر ما عجبني بصراحة << مشاركتكي لمناسبة الزواج >>

دمتي بود



الله يسعدك ويوفقك اخي اصيل واشكر لك اللقب الجديد الذي اعطيتني اياه (( مذهله ))

واشكر لك متابعتك وتعليقك واتمنى ان اكون عند حسن ظن الجميع

رد مع اقتباس
  #295 (permalink)  
قديم 2007-10-18, 01:20 PM
مسافر نشيط
 
تاريخ التسجيل: Feb 2006
المشاركات: 69
افتراضي

زهرة... انتي على اسمك فعلا فاح عطرك على هالمنتدى واتحفتينا بأجمل تقرير قريته

شكرا لك

رد مع اقتباس
  #296 (permalink)  
قديم 2007-10-18, 02:12 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

اقتباس
مشاهدة المشاركة المشاركة الأصلية كتبت بواسطة الشمري 2006
زهرة... انتي على اسمك فعلا فاح عطرك على هالمنتدى واتحفتينا بأجمل تقرير قريته

شكرا لك



جزاك الله خير على مرورك ومداخلتك اللطيفة اشكرك واشكر ردك الجميل وان دل ذلك على شيء انما يدل على ذوقك وكرم اخلاقك

رد مع اقتباس
  #297 (permalink)  
قديم 2007-10-19, 09:59 AM
مسافر جديد
 
تاريخ التسجيل: Jan 2007
المشاركات: 22
افتراضي

بداية قوية وجميله

رد مع اقتباس
  #298 (permalink)  
قديم 2007-10-21, 07:55 AM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

إخواني الغالين من أعضاء ومشرفين
السلام عليكم ورحمة الله وبركاته وبعد
كل عام وانتم بألف خير وصحة وعافيه
هاأنا ذا أعود لكم مجددا بعد انقطاع لظروف قاهرة وخارجة عن إرادتي وقد سبق ووعدتكم بتقرير مبسط ومختصر عن السائقين وبعض النصائح المتواضعة لمن يريد اصطحاب أسرته معه للبلاد الاندوميه .

طبعا أنا أول مره اذهب لاندونيسيا وكانت رحلتي لها حوالي 15 يوم فقط غير يومي السفر ولكن العاقل من اتعظ بغيره والعاقل من يأخذ عضه وعبره بكل موقف يمر به في يومه وحياته وخاصة إذا كان بعيدا عن بلده وأسرته ومعارفه وأقاربه .
أولا – نبدأ مع السائقين – سجلت في المنتدى قبل سفرنا بحوالي شهرين كل يوم ما يعادل ثلاث ساعات فقط في منتدى سفاري ووالله العظيم كأنني ذهبت لاندونيسيا عشرين مره ولم اترك عضو أو مشرف أو مراقب إلى وأرسلت له ووالله مافي ولا واحد قصر معي جزاهم الله خيرا لذلك سوف احفظ لهم هذا الجميل ما حييت .
طبعا اصطحبت معي ملف يحتوي على حوالي 40 صفحه ملخص كتبته على الوورد عبارة عن – المكاتب وعناوينها وأرقام الهواتف .
أسماء المنتجعات في الجبل والمجمعات السكنية
أسماء الفنادق والشقق في جاكرتا وأرقام الهواتف
رقم السفارة السعودية وعنوانها
أسماء السائقين وأرقام هواتفهم
المطاعم – الأسواق – المراكز التجارية - الأماكن السياحية والجزر - وكل مافي الملف ملخص فقط لأحسن الأماكن واشهرها .
وأخيرا جدول للرحلة وميزانية عامة .
عند وصولنا لجدة قبل السفر بيوم واحد اتصلنا على مكتب كاها وحجزنا في هاريس وبعد ذلك قام زوجي بالإتصال على عدد من السائقين ومن ضمنهم توفيق وآخرين لا تحضرني أسمائهم حاليا ولكنهم اعتذروا وبصراحة كنا مره مشغولين بحكاية السائقين وزعلانين مره لعدم وجود سائق ثقة نتفق معاه ويقابلنا في المطار ولكن أخي إياد قال العام الماضي سافرواحد من أصدقائي وعنده سواق حضرمي اسمه أبو فيصل وبصراحة يمدح فيه بس لازم تأخذ له معاك هدية . طبعا نزل إياد وجاب له ساعة و جوال نوكيا ( برج العرب ) صح هو متواضع بس ما يحلم فيه. اتصل إياد عليه وقال تقابلنا في المطار يوم الثلاثاء الساعه الواحده بعد الظهر – قال مااقدر لان عندي ( جبون ) يعني زبون لكن لما توصل خذ تاكسي وروح الفندق وانا باجيكم اليوم الي بعده اوفي المساء بعد مااخلص من الجبون .
اخذنا تاكسي بلو بيرد ثم ذهبنا للفندق وجاء السائق الساعه الثامنة صباحا كما طلبنا منه وجاب معاه سيارة فخمة وجديده 2006 وسلم عليه إياد واعطاه الهدية وقال شوف احنا بنجلس في جاكرتا لغاية يوم الجمعة وبعدها سوف نذهب لباندونق وبعدها الجبل وتجلس معنا حتى ونروح للسعوديه اوكيه قال اوكيه راح السواق وانتظرناه يوم الجمعة الصباح علشان نروح باندونق ماجاء اتصلنا عليه جواله مغلق ولكننا اجلنا المشوار لصباح السبت ويوم السبت الصباح الساعه الثامنة جاء واعتذر ان ولده تعبان وهو مريض ايضا عذرناه وقلنا خلاص اليوم نبغى نروح باندونق قال لا اليوم اجازة والشوارع مزدحمة وماراح تحصل فندق وافقنا وطلبنا منه مرافقتنا في جاكرتا ولكنه رفض يقول مايحب جاكرتا لانها زحمة وله حوالي ثمان سنوات في الجبل ماينزل إلا للمطار ومن المطار للجبل فقط بصراحه زعلنا مره منه ولكن قلنا يالله نمشي الاحوال وبعدها يفرجها لله وطلب مننا وقتها مئة الف روبية لانه نزل من الجبل من اجلنا وحرام هو يتحمل مصاريف البنزين لان مانزله الا احنا – اعطيناه ثمن البنزين وجلس معنا ذلك اليوم لغايه الساعه السابعة مساء وقال لا عاد تتصلون عليه الا لما تروحون الجبل قلنا طيب ( مراعاه لظروفه ) قلنا دور لنا على فيلا في الجبل تكون امان وكويسة وحقت عوائل – طبعا احنا دورنا ولا خلينا مكتب ولكنهم اعتذروا عن ايام الأجازة لعدم توفر سكن عندهم ولكننا لم نيأس قلنا نروح الجبل ومن هناك نبحث بانفسنا مو لازم مكتب وطبعا ملفي معايه وفيه اشهر المنتجعات والفلل السكنية والفنادق .
عند طلوعنا للجبل جاب لنا سياره قديمة جدا ومكيفها خربان ( مكروباص) ماهي أول سياره نزل بها وزياده على كذا جلس طول الطريق ينافخ من الزحام وكل مانحصل سياره قدامنا يقول (شوف كيف زخمة أنا مافي هبي زخمة ) وكل عشر دقايق يجنب ويطلع من السياره ويدخن وحنا قاعدين فيها نقول يالله يقول شوي في زخمة( يعني انتظرو ولا رحمة عظامكم حتى تخف الزحام شفتو قلة الادب وين وصلت ) نعم فيه زحام ولكن السير ماشي ماكان فيه داعي يتوقف بعدها قال عندي لكم فيلا رحنا شفناها ماعجبتنا كلها وزغ وحشرات وماهي نظيفة قلنا نبغاك تمر بنا على هذي المنتجعات وجالس يقول لزوجي ( مدام حقتك كم مرة تجي اندونيسيا قال زوجي ليه – قال كل شوي هي كلام روح من هنا نبغى نشوف مجمع كوتا بونقا – تكساس – تشيباناز...الخ) وكأنها تعرف كل شي قال زوجي ايوه زوجتي كل سنة تجي هنا مع اهلها قبل مانتزوج ومعاهم فيلا بس باعوها من سنتين ( إذا لم تكن ذئبا اكلتك الذئاب ) والله العظيم يااخوان ماسلك معنا الا بعد ماسمع هذا الكلام طبعا كان يستعبط علينا ووالله العظيم كنا نطلب منه منتجعات بعيده مايودينا لها يودينا لغيرها تكون قريبة واحنا مانعرف ولكن الصور التي وضعها الاخوان للمنتجعات والفلل فتحت عقلي كثير وترددي على المنتدى افادني والحمد لله رب العالمين .
بعد ماوصلنا للفيلا نزلنا عفشنا وحقائبنا وقلنا له خذ فلوسك يابو فيصل وكا الاتفاق 350 الف والبنزين علينا ولكنه زعل ورفض وقال أنا ابغى 400 الف غير البنزين علشان قعدت معاكم لغاية الساعه التاسعة وتبغون الصراحه كنت ادعي الله سبحانه وتعالى يرفض مايكمل معنا لانني ماارتحت له وحبيت تجي منه هوطبعا الميزانية كانت معي وحلفت ماادفع روبية زيادة عن الاتفاق ودخلت الفيلا قال زوجي المدام هي المتصرفة ومادام رفضت مااحد يقدر يقول لها لا – قال أول مره اشوف حرمة سعوديه قوي وهي تدفع فلوس – قال زوجي معليش أنا راضي واخوها راضي المهم انت تاجي بكره الساعه كم ؟؟؟؟
قال أنا فيه زبون بكره مااقدر اجيكم ممكن اعتذر منه وممكن اجيكم حسب الظروف وسمعت هذا الكلام على خروجي من الفيلا ناديت زوجي وقلت له خله ينقلع تراني ماارتحت له بس ماحبيت تجي مننا لانك اتفقت معاه ولا حبيت نخلف معاه وقطع الاعناق ولا قطع الارزاق بس مادام جت منه درب تسد ماترد طبعا بلغه هذا الكلام واستغرب السواق توقع اننا رايحين نحب على راسه وكلنا عارفين ماعنده زبون بس يبغى يغير الاتفاق .
اخذت الملف الي معايه وجلس زوجي يدق على السواقين الي اخذت ارقامهم من المنتدى ووالله العظيم مااحد نزل عن 450 الف والبنزين علينا ماعدا واحد رفض الاتفاق على التليفون قال بكره الصباح اجيكم ونتفق اسمه ( علي ) ابو حسين
جاء في الصباح على نفس الموعد في تمام الساعه الثامنة كان بصراحه طيب وكانت السياره روعه وفخمة اخذنا أول يوم لفة بسيطة في الجبل ورحنا للبقاله السعودية وشرينا اغراضنا من هناك وشرينا ذبيحه واعطيناه منها كيس لاولاده وقلنا بكره تجي علشان نروح باندونق كان الاتفاق 300 الف روبيه لخارج الجبل والبنزين علينا و350 الف داخل الجبل والبنزين عليه – وقلنا له الله بيننا وبينك لازم تكون امين ومخلص معانا يعني إذا جاك زبون وحصلت عنده اجرة اكثر خبرنا علشان نتدبر امورنا ماهو تخلينا ننتظرك ويضيع علينا اليوم ولا تجي قال والله العظيم ماافكر اروح مع أي انسان ثاني حتى لودفع 500 الف المهم وثقنا فيه واليوم الثاني جاء بسياره قديمة ولكننا لم نركز عليها كثيرا قلنا مادام مكيفة مافي مشكله ذهبنا لباندونق وعند دخولنا للمطعم يجلسه زوجي بعيدا عنا ويخليه يطلب الاكل الي يبغاه وزوجي يدفع عنه وهذا لوجه الله الكريم – وعند ذهابي لمركز التسوق ملابس للاطفال سمعته يقول لزوجي أنا عندي بنت صغيره وولد – أنا قلت له شوف يابو حسين ادخل المركز هذا وجيب لبنتك وولدك لبس الي يعجبك وخل الحساب عليه ووالله العظيم انه البنت لبسها لوحدها كلفني 150 الف روبية غير الولد 140 الف وهو جبتله بنطلون جينز 120 الف روبية (شفت بنطلونه مقطع من عند ركبته وماكنت ادري انها موضه جالس زوجي يضحك عليه يقول ماعمري شفت اغبى ولا اهبل منك هذي موضه لكل الشباب موشرط الي مفقوع من عند الركبة غلبان وماعنده لبس هههههههههه ) طبعا أنا رسلت له إياد وقلت خله ياخذ الي يبغى وانا بسدد عنه من فلوسي الخاصة بعيدا عن القطة وبصراحة يااخوان هذا العمل لوجه الله تعالى ماحبيت اذكره لكم ولكن اقسمت ان انقل الحقائق حتى لو مارغبت في ذلك ون شاء الله ربي يعطيني على قد نيتي .
رجعنا للجبل والرجل كما هو طيب ومحترم اليوم الثاني ذهبنا لسفاري وكان معنا على نفس الموعد اليوم الثالث وهذي الطامة – تأخر علينا وجالسين ندق عليه تليفون من الساعه الثامنة صباحا وحتى الثانية عشر ظهرا ولا جاء واخر شي كنا ندق عليه يقول مين انتم وش تبغون يقول زوجي انت السواق علي يقول لا!!!!!
بعد الساعه الواحده ونحن نضرب اخماس بأسداس وتعرفون ان كل يوم محسوب علينا ومانبغى نفوت ولا ساعه جاء السواق حقنا ومعاه واحد ثاني ومعاهم سياره ودباب وقال أنا آسف زوجتي تعبانه وتبغى تروح لاهلها وانا جبت لكم اخويه (ئمر) يعني قمر بالمصري طبعا صدقناه وكالعاده التمسنا له عذر وجالس يحلف لزوجي ويبكي ان عنده ظرف وان اخوه احسن منه – صدقناه وتوكلنا على الله مع اخوه (ئمر) وهذي صوره للسائق قمر (ئمر ) لانه طلب من زوجي يصوره ويحط صورته ورقم جواله على الانترنت وبناء على وعد زوجي له نزلت له هذي الصوره اما الرقم فسياسة المنتدى تمنع ذلك



ذهبنا مع السائق الجديد بنفس الاتفاق لمدة يومين طبعا هو طيب ومسكين ويحاول يثبت جدارته وما يحاول يزعلنا ويتفانا في خدمتنا بس الله يهديه حسينا انه يبغى يستغلنا يعني لما ندخل مطعم يجلس بعيد عننا ويطلب طلبات اكثر من طاقته يعني أنا وزوجي مانطلب زي طلباته اقل طلب يطلبه يطلع بحوالي 200 الف روبيه والكل يعرف ان الشعب الاندنوسي اقل شي يشبعه بس هذا شي ثاني بس يالله دفعناها لله ووالله العظيم ماكنت اريد التحدث عنها ولكن ليعلم الجميع ان هدفي الاول والاخير ان اضع دروس من اخطائنا لكي يتفاداها الاخرون – والاسلوب الثاني لما نكون في السياره يقول لزوجي أنا عندي ولد عمره ثلاث سنوات وختانه بعد خمس ايام وانا مره تعبان وماعندي فلوس اسوي له مناسبة – والاسلوب الثالث يجلس يحط يده على راسه يقول له اخوي إياد وش فيك تعبان يقول لا !!!
قال إياد طيب وش فيك ؟؟؟؟
قال ولدي كل يوم يبكي لما ارجع في الليل يبغى سيكل !!!
قلت له كم سعر السيكل ووالله كنت ناويه اعطيه ثمنه – قال اقل سيكل ثمنه 300 الف . يوم اختكم شافت السعر عرفت انها مؤامره بينه وبين اخوه السابق ( علي ) قال زوجي اكيد خبره عن الاغراض الي جبتيها له من باندونق !!!
ماكان ردي غير حسبي الله ونعم الوكيل معقوله فيه فئات من الناس تخلي الواحد يندم لما يطلع شيء لله .
تخيلو المفاجأة الي حصلت صباح اليوم التالي – تأخر السواق ساعه عن موعده نحن حددنا الساعه الثامنة ولكنه ماجاء الا الساعه التاسعة تخيلو جاء ( علي ) واخوه ( ئمر) في نفس الوقت مايفصلهم عن بعض الا خمس دقايق وكل واحد معاه سياره وجالسين يتخاصمون ويتشاجرون بلغتهم ماكنا نعرف ايش الي بينهم قالهم زوجي ايش فيه ماهو عيب اخوان يتخاصمون قال ( ئمر) هذا مافي اخويه هذا صديقي بس وقال اجلس معاكم حتى وتسافرون السعودية لان عنده زبون ثاني دفع 500 الف وقال لي خلك معاهم ولكن الزبون حقه رفض يدفع له علشان كذا رجع لكم ويبغاني اطلع ادور على زبون ثاني والحين الخيار لكم تبغوني ولا تبغون علي – تخيلو الصدمة الي حصلت لنا بعد ماسمعنا هذا الكلام قلت لزوجي ولا واحد خلهم كلهم ينقلعون ولكن إياد دخل برأي نبقى على سائقنا الاول ( علي ) مادام الخيار لنا وافق زوجي وانا وافقت على مضض وقلت بشرط مانعطيه فلوسه كامله كل ليله عند الحساب نبقي حوالي 100 الف علشان يرجع اليوم الثاني وافق الجميع وذهبنا معى سائقنا السابق ( علي ) لبوقور – وفي طريق العوده دق جوال السواق ورد وجالس يتكلم باللغة العربية وكان معاه واحد خليجي يقول انت السواق علي ؟؟؟
قال نعم !!!
قال ابغاك بكره تقابلني في المطار معايه عائله وابغاك انت تكون سواق لنا كم اجرتك ؟؟؟
قال ابغى منك 500 الف شامله البنزين أو 400 الف والبنزين عليك المهم تم الاتفاق بينهم على مسمع ومرأى مني ومن زوجي ومن إياد تفاجأنا وزعلنا وقال له زوجي ماهو عيب عليك تتفق مع الرجال ونت متفق معانا أول قال والله العظيم برسله واحد ثاني أنا معاكم لين تروحون بلدكم ومستحيل أخونكم أو أروح مع زبون ثاني – قال له زوجي شوف ياعلي إذا فيه زبون يدفع اكثر مافي مشكله احنا مانقول لك شيء هذا رزقك المهم تعطينا خبر مايضيع علينا اليوم في انتظارك قال والله العظيم اني معاكم ومافي نفر ثاني.
صباح اليوم التالي جلسنا ننتظر لغاية الساعه الحادية عشر ولا شرف حضرة السواق مع العلم اننا مسكنا عليه 100 الف روبية كنا نتوقع انها بتجيبه ولكن للاسف من بعدها ماعاد شفناه ولا عاد رد على اتصالاتنا . ولكن عند سفرنا ارسلناها له مع واحد ثقة صاحب مكتب في الجبل وقلنا وصله للسائق علي لاننا لانريد ان نغادر وفي ذمتنا شيء لاي انسان لان حتى الهاتف رفض الرد عليه!!

استأجر إياد دباب من الحاره بــ15 الف روبية وذهب للشارع العام حيث يقف السواقين هناك بكثر التراب واتفقنا مع سائق اسمه ابو صويلح بسعر 250 الف روبية يذهب بنا لبحيرة الليدو وفعلا كان طيب ولكن لم نتعامل معه مثل تعاملنا مع السائقين الاخرين تركناه عند السياره وماعذرنا عليه الغداء بكيفه ياكل الي يبغاه وعند رجوعنا طلبت من زوجي ومن إياد عدم الضحك معاه ( لايعطوه وجه زيادة) وفعلا كان ماسك حدوده ومحترم ولا طلب زيادة ولكن يوم وصلنا اعطاه زوجي مبلغ بسيط – وطلبنا منه اليوم التالي ان يأتي ليصطحبنا لحديقة الفواكه ثم جاكرتا ووافق بشرط 450 الف روبية ولكن للاسف نسينا ناخذ رقم جواله . كان موعدنا الساعه الثامنة صباحا ولكنه تأخر ولم نضيع الوقت في انتظاره ذهبنا وبحثنا عن سائق آخر ووجدنا سائق بالكاد يتكلم العربية اسمه امين واتفقنا بسعر 350 الف يمر بنا على حديقة الفواكه ثم فندق هاريس في جاكرتا – وبعدها بدأنا نأخذ تكسي حتى تاريخ مغادرتنا لجاكرتا .
مماسبق نستنبط التالي واتمنى كل واحد ياخذ درس ماينساه من هذي المواقف الي مرينا بها وبعد كذالو ذهبنا مره ثانية لهذا البلد فلا بد ان نضع امام اعيننا الآتي:-
1. اعتمد على نفسك في البحث عن سائق وابتعد عن السائقين المشهورين والذين يتكلمون العربية بطلاقة ويعرفون السائح معرفة جيدة فهم اكثر الناس استغلال للسائح والنظراليه بأنه فريسة سهله بين ايديهم
2. لاتعطي ثقتك لاي سائق مهما كانت طيبته واخلاقه عامله بالطيب والاحسان ولكن بدون مبالغة كما فعلنا معهم دعهم يأكلون مايريدون بدون ان تعزم عليهم أو اعطهم مبلغ بسيط جدا للاكل مثل 25 الف روبية أو حسب قدرتك
3. لاتحاول ان تجعل السائق جريء معك ولا بد من وضع حدود بينك وبينه لا يتجاوزها ووالله العظيم رأيت واحد خليجي بعائلته في بحيرة الليدو جالس مع السواق يتغدون وزوجته وبنته الصغيره في مكان اخر ينتظرون حتى يخلصون ويعطونهم باقي الغدى وكأنه في بيته أو ضيف عليه بصراحه حزنت عليها كثير كيف يفضل الجلوس والغداء مع السائق وهي جالسة لوحدها.
4. اشترط على السائق إذا كان سيستمر معك تكون السياره جديدة ونظيفة أو تكون نفس السياره التي يقابلك بها أول يوم
5. إذا اخذت سائق وجربته ليوم واحد وحسيت انك مرتاح له ضع بينك وبينه اتفاق بعدم دفع اليومية كامله لازم تخلي معاك مبلغ اقل شي100 الف تعطيها له أول مايجيك الصباح
6. حاول دائما تتفق معاه على ساعه معينة في الصباح مثلا الساعه الثامنة وقله لو تأحرت دقيقة واحده راح اجيب غيرك وفلوسك ماعاد لك شي عندي لازم تكون صارم وحازم حتى لا يتلاعبون عليك ويتركونك وانت بأمس الحاجة لهم
7. دائما ضع امام عينك ممكن يكونون عليك شبكه مثل ماحصل معنا ولكن الله رد كيدهم وفضحو انفسهم بأنفسهم والله العظيم طول الفترة الي كان معانا (ئمر) توقعناه شقيق ( علي ) مع ان الشبه مختلف بينهم وآخر شي كان يطلع فضايح على ومن ضمنها لما يتأخر (علي) علينا في الصباح يقول أنا ساكن في باندونق علشان كذا اتأخر ولما سألنا ( ئمر ) قال أنا واياه ساكنين جنب بعض وورانا بيوتهم .
8. دائما حاول تبين للسواق انك فاهم وعارف كل الأماكن وانتبه ثم انتبه تقول انها أول مره تسافر قل سافرت كثير بس قبل سنوات وبعض الأماكن تغيرت ولازم يكون عندك فكره واستطلاع وثقافة عن البلد التي تذهب اليها حاول تجمع من المنتديات ومن المواقع وبصراحة لو اخذت لفة على منتدى سفاري كفاك وأغناك وكأنك سافرت عدة مرات .
9. إذا حسيت ان السواق بدأ يماطل معاك أو اسلوبه تغير بدون تردد قم بتغييره فمن خلقه خلق غيره الكثير ربما احسن وافضل واحسن منه سعرا وفي تجربتنا خير دليل .
10. حاول تبحث عن السعر الافضل فأنت اولى بمبلغ مالي حتى ولو كان الفرق 50 الف أو 100 الف انت اولى بتوفيره وصرفه على نفسك وبصراحة اكثر من 300 الف داخل الجبل كثير جدا في حق السائق و350 الف كافي لخارج الجبل .
11 . اتفاقك مع السائق بأن يكون البنزين عليك تراه ماهو في صالحك لانه يحاول يستغلك بأي طريقة - مثلا نحن مشوارانا لبوقور وقف عند محطة وقام بتعبئة خزان السياره بسعر 150 الف روبيه ( فلله ) ووالله العظيم عدنا في المساء والخزان لم يستهلك منه سوى الربع بناء على كلام زوجي لانه يفهم في هذه الاشياء
هذا مايحضرني بالنسبة للسائقين ولا نستغني عن الاخوان الي خاضو تجارب مع السائقين اتمنى كل واحد يضيف مايستطيع حتى ولو كان سطرا واحد لربما يجعل الله فيها الفائدة لاخوان لنا لم يسبق لهم السفر .




بالنسبة هذه بعض النصائح البسيطة لمن يريد اصطحاب عائلته معه
1. ان كنت ستسافرعلى طيران الاتحاد لابد من التأكد من توفير السكن لك ولعائلتك يكون كافي لكم يعني لو انتم 10 اشخاص ويعطونك غرفتين ارفض ذلك واحرص يكون عدد الغرف كافي لكم جميعا .
2. إذا عندك شخص مسن أو امرأة حامل أو اطفال نصيحة تأخذ طيران دايركت بدل المرمطة والله ان فرق التذاكر الذي ستحصل عليه لايسوى شيئا امام راحتك واختصار المسافة والتعب والانتظارفي المطار.
3. عند ما تنوي السفر لازم تجلس مع المدام قبلها بفترة شهرين أو ثلاثة اشهر وتدرسون جدول الرحله وماهي الايام التي ستقضونها هناك وبناء عليها تعمل جدول للرحلة وتاريخ للسفر وتاريخ العوده وبعدها ابدأ في اجراءات الحجز قبلها بفترة كافيه مثلا اجازتك فقط 17 يوم فقط اعمل يومين سفر و15 يوم وصول وبناء على ذلك تكون مستعد ومهيأ نفسيا لهذا الجدول ومستعد له ايضا من حيث الميزانية بحيث يكون بدون زيادة ولا نقصان ولا تنسى يجب ان يكون الحجز قبل وقت كافي حتى تستطيع الحصول على حجوزات.
4. جهزلك ميزانية بحيث تعيش حياة كريمة مع اسرتك بعيدا عن البذخ والتبذير والمصاريف الي مالها داعي وحاول تعمل ميزانية يومية بكذا راح تقدر تعرف كم يبغى لك وبيني وبينك وهذا سر ( خل معك مبلغ احتياط لا تخبر به رفاقك في السفرولا تحاول تخرجه الا وقت الزنقة والخنقة ) وبما اني امرأة واعرف نفسية الستات كل ماعرفت ان معك فلوس زيادة توسعت عيونها فيك وتعاملت بلامبالاة يعني المسكينة تبغى تصرف وتنبسط ولو كان على حساب الظروف يعني لو معك 15 الف ريال قلها ماعندي غير هذا المبلغ يكفينا للسفر وخبي معاك الفين ريال زيادة ولا تعلمها بها وكل يوم خبرها إن مابقي معنا غير كذا وكذا وآسفة لو افشيت اسرار بنات جنسي ولكنني مع الحق والعقل والصواب مهما كان ومتعاونه جدا جدا من هذي الناحيه مع الرجل .
5. حاول تقلل العفش والملابس وكثرة الشنط لانك انت راح تتعب أولا وأخيرا ويكفي ملابس بسيطة وتغسل أول بأول - أنا وزوجي شنطة واحده وكان فيها مكوى كل ليله اغسل له ملابسة علي يدي واكويها وازبطها يصحى اليوم الثاني يحصلها جاهزه كان بأمكاني آخذ غيارات كثيره ولكنني احس انه يتعب مسكين في تنزيل العفش والشنط وكان ارسلت الملابس للمغسله وريحت نفسي ولكنني احب اخدم زوجي بنفسي ومن النوع الي يخاف احد يتولى اغراضنا أو الغسيل في المغاسل العامة ( يعني موسوسة وخوافه )
6. لا تأخذ معكم اشياء ثمينة وهذا الكلام موجه للمرأة واقصد ( مجوهرات ) يكفي الساعه وخاتم الزواج فقط في يدك ولو تتركيه في بيتك افضل أو ضعي حقيبة مجوهراتك عند احد من اهلك – ونصيحه شنطة اليد الصغيره لا تضعي فيها اشياء مهمه بحيث لو سقطت أو نسيتيها في احد الأماكن ما تندمي وتبكين دم عليها . وتحاول المرأة ايضا لبس البنطلون من تحت العباية وتضع في جيب البنطلون جواز السفر والموبايل حقها يكون افضل بكثير من الشنطة لانني في احدى سفرياتي لمصر نسيت شنطتي في دورة مياه فيها الموبايل وجواز السفر ومن يومها حرمت احط أي شيء ثمين في الشنطة فقط في جيب البنطلون .
7. حاول تعتمد على طبخ البيت وبذات إذا كنت ناوي تجلس فترة طويله واستقريت في احدالمناطق أو الفلل لاني بصراحه ماعجبني اكلهم كثير واحب اطبخ بيدي بذات وجبة العشاء والفطور بالنسبة للغداء كنا نأخذ معلبات بسيطة أو شيبس أو بسكويت إذا لم نجد مطعم حلو ونظيف مثل مطعم ( رندو علم ) لانني اخاف من المأكولات الي معروضه في الشوارع تجنبا لحالات التسمم.
8. خذ معك شنطة صغيره للمعلبات والاجبان يعني فكر ماهي الاشياء الي تفضلها على العشاء والفطور بذات - من نواشف وحليب ولا تبالغ في تجميع الاشياء يعني يكفي حبتين أو ثلاث من كل نوع اما بالنسبة للغدى يكون عادة كبسة رز أو سباجتي ولا هي محتاجة كثرة شطاره .
9. خذ معك حقيبة صغيره عبارة عن اسعافات طبية مثل مضاد الحيوي وافضلها (اموكسيل)ومسكن للالم والحراره وافضلها (البروفين ) مرهم للتقرحات مثل ( فيوسيدان ) أو (فيوسي كورت ) اواي مرهم مضاد حيوي – كريم واقي للشمس في حال ان بشرتك حساسة أو تميل للون الابيض – ضمادات وشاش جروح – شراب ( باكتريم) للجهاز الهضمي مسكن للمغص مثل حبوب ( باسكوبان ) أو ( سكوبينال) – شراب للسعال ونزلات البرد – طبعا هذا اقتراحات ومن الافضل تروح للصيدلي وتستشيره وتأخذ اللازم ولا بد من مراعاة العمر واذا كان فيه امراض مزمنة - ويكون من ضمن الحقيبة صابون للاستحمام وشامبو ومعطر يعني لازم تكون اغراضك كامله لان بصراحه الاشياء التي عندنا روعه وحلوه وتختلف اختلاف كليا عن الموجود هناك واصلا ماراح تعجبك وبالنسبة للأدوية والله مرضنا وتغير الجو علينا وماكفانا المضاد الحيوي الي معانا وشفو وش صار بنا من صيدليه لصيدليه ومااحد فهم علينا واخر المطاف الي فهم علينا ماحصلنا عنده طلبنا لذلك لابد يكون كل شيء جاهز معاك تحسبا للظروف بذات إذا كنت ستبقى فترة طويله
10. حاول تترك مشترياتك من هناك لاخر يوم لك في السفر افضل وتخفيف للحقائب والتنقل بهامن مكان لآخر.
11. حاول تصطحب معك دائما خير ونيس وخير جليس وهو القرآن الكريم فهو خفيف الوزن ولكنه غالي جدا على من يعرفه وسوف تكون بأمس الحاجه له هناك و هنا وفي كل مكان لابد ان تحافظ على قراءة وردك منه ليلا فهو الحافظ الحفيظ لك بعد الله من كل مكروه وزيادة لك في الخير ويبعدك عن الشر والمعاصي .
هذا ما قدرني الله على كتابته واسأل الله العلي العظيم ان ينفع كل من مر عليه وقرأه وان يجعله حجة لي لا حجة عليه يوم القيامة ووالله العظيم انني كتبت هذا التقرير وانا في قمة التعب والمرض لكي اوفي بوعدي لكم رجائي لا تحرموني من دعائكم بأن يحقق الله لي مااريد ويتوفاني على حسن الخاتمه



ملاحظة – جميع الصور الموجوده في التقرير يعلم الله انها من كاميرتي الخاصة والتقطتها انا بنفسي ولم اضع عليها أي توقيع لي وانا اقول كل من اراد نسخ هذه الصور او الاستفاده منها او نقلها لاي منتدى آخر او حفظها فأنا اهديها له واجعله في حل يوم القيامه ولكن بشرط ان يذكر المصدر الاساسي للصوروالتقرير ( منتدى سفاري للسفر والسياحه) ويضع رابط المنتدى على أي صوره يريد نقلها لمنتدى آخر


آخر تعديل بواسطة زهرة الزيزفون ، 2007-10-21 الساعة 08:12 AM
رد مع اقتباس
  #299 (permalink)  
قديم 2007-10-21, 12:00 PM
الصورة الرمزية puncak
كبار شخصيات سفاري
 
تاريخ التسجيل: Jun 2005
المشاركات: 2,399
افتراضي

اختي الكريم زيزفونة

موضوعك ونصائح مهمه ومفيد للاخوان السائحين

وعندي مداخلة علي موضوعك

المشاكل مع السائقين تكثر في اجازة الصيف لان عندالسواق بدل السائح 10 ومايهمة الا مصلحتة

وان كان متفق معكم وحصل اكثر عند غيركم فأكيد راح يخليكم ويروح للزبون الجديد

و غير هذا السائق يهتم للسائح الى يتردد كثير علي اندونيسيا لانة عميل ولا يبي يفرط في عميل عشان سائح اول مرة يجي ويمكن مايرجع مرة ثانية

وبالنسبة لسيارة السائق فهو يستأجرها من صاحبها و من الممكن يطلب السيارة بكرة من صاحبها ويكون اجرها لسائق ثاني فيضطر سائقكم البحث عن سيارة ثانية وممكن مايحصل شي نضيف


اما ماحصلكم من السائق ابو فيصل في تغيير السيارة الى المكرو باص فهذي الحركة يسويها دائمان لان الميكرو ارخص من السيارات الثانية ( الكيجان ) عشان كذا ابو فيصل يحاول دائمان استعمال الميكرو بدل الكيجان او الاينوفا او الافانسا

وابو فيصل اذا كان حضرمي ووجهه نحيف وشنبة اكبر من خشمة فهوا مثال للسائق السيئ وراعي حركات نص كم واسلوبة في التعامل مع السياح سيئ جدا وانا اعرفة زين ولا احب ان اتعامل معة لمعرفتي السابقة بحركاتة وفي السابق كان هو سائقي الخاص ومرافقي دائمان لكني طرتة و انهيت التعامل معة نهائيا لسو تعاملة ولاستغفالة الدائم والمتكرر


وفي كل صيف تكثر مشاكل السائقين لكثر الطلب عليهم وانتي اجازتك في الصيف يعني شي طبيعي تحصلي مشاكل معهم

لكن روحي للعمة في غير الصيف وبتحصلين االسواقين يتطاقون عليك وكلن يبي رضاكم



وجزاك الله خير علي حرصك واهتمامك في اخوانك السياح










تحياتي

توقيع : puncak



< الجنتل > سابقا

آخر تعديل بواسطة puncak ، 2007-10-21 الساعة 12:03 PM
رد مع اقتباس
  #300 (permalink)  
قديم 2007-10-21, 12:12 PM
الصورة الرمزية زهرة الزيزفون
مسافرة متألقة
 
تاريخ التسجيل: Jun 2007
المشاركات: 425
افتراضي

اقتباس
مشاهدة المشاركة المشاركة الأصلية كتبت بواسطة puncak
اختي الكريم زيزفونة

موضوعك ونصائح مهمه ومفيد للاخوان السائحين

وعندي مداخلة علي موضوعك

المشاكل مع السائقين تكثر في اجازة الصيف لان عندالسواق بدل السائح 10 ومايهمة الا مصلحتة

وان كان متفق معكم وحصل اكثر عند غيركم فأكيد راح يخليكم ويروح للزبون الجديد

و غير هذا السائق يهتم للسائح الى يتردد كثير علي اندونيسيا لانة عميل ولا يبي يفرط في عميل عشان سائح اول مرة يجي ويمكن مايرجع مرة ثانية

وبالنسبة لسيارة السائق فهو يستأجرها من صاحبها و من الممكن يطلب السيارة بكرة من صاحبها ويكون اجرها لسائق ثاني فيضطر سائقكم البحث عن سيارة ثانية وممكن مايحصل شي نضيف


اما ماحصلكم من السائق ابو فيصل في تغيير السيارة الى المكرو باص فهذي الحركة يسويها دائمان لان الميكرو ارخص من السيارات الثانية ( الكيجان ) عشان كذا ابو فيصل يحاول دائمان استعمال الميكرو بدل الكيجان او الاينوفا او الافانسا

وابو فيصل اذا كان حضرمي ووجهه نحيف وشنبة اكبر من خشمة فهوا مثال للسائق السيئ وراعي حركات نص كم واسلوبة في التعامل مع السياح سيئ جدا وانا اعرفة زين ولا احب ان اتعامل معة لمعرفتي السابقة بحركاتة وفي السابق كان هو سائقي الخاص ومرافقي دائمان لكني طرتة و انهيت التعامل معة نهائيا لسو تعاملة ولاستغفالة الدائم والمتكرر


وفي كل صيف تكثر مشاكل السائقين لكثر الطلب عليهم وانتي اجازتك في الصيف يعني شي طبيعي تحصلي مشاكل معهم

لكن روحي للعمة في غير الصيف وبتحصلين االسواقين يتطاقون عليك وكلن يبي رضاكم



وجزاك الله خير علي حرصك واهتمامك في اخوانك السياح










تحياتي




الله يعطيك العافيه ويوفقك اخي الكريم مداخلتك على العين والراس وبالنسبة لمواصفات ابو فيصل التي ذكرتها فعلا كما ذكرت وللاسف لم استطع ان اصوره وبصراحه ماكنت مرتاحه له ابدا والحمدلله اننا تخلصنا منه بسرعه لم يخدم معنا سوى فتره بسيطة - بالنسبة لمشاكل السائقين ربما الموسم هو السبب في كثرتها ولكن هناك مبدأ وكلمة يجب على السائق احترامها والتقيد بها ومن الافضل عدم الاعتماد على سائق واحد دائما

رد مع اقتباس
إضافة رد

الكلمات الدلالية (Tags)
2007, لبلاد, مشارك, الميمونة, الأندومي, بالمسابقة, تقرير, رحلتي


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة




بدعم من vBulletin
الحقوق محفوظة لـ ©2000 - 2014، Jelsoft Enterprises Ltd

المواضيع والتعليقات المنشورة لا تعبر عن رأي منتديات سفاري وتتحمل كاتبتها المسؤولية القانونية حيال ذلك .

تصميم سعودي للاستضافه والتصميم

Search Engine Optimization by vBSEO 3.3.0