|
11-07-2005, 02:02 PM
|
|||
|
|||
|
مطعم ( تاو ) في الرياض
السلام عليكم ورحمة الله هذا الموضوع ليسا دعاية او نقد باي شكل من الاشكال للمطعم ، الموضوع هو فقط تجربتي الشخصية فيه ، و رغبة مني في تعريف اهل الرياض و زوارها ببعض مطاعمها. ________________________ مطعم تاو (ابو ساق) الموقع : الرياض ، شارع التحلية ، بجانب مطعم الريف اللبناني و مركز النخبة الطبي. يوم الأحد 11/7/2005 عزمتني المعزبة على حسابي في المطعم المذكور ، إنا عن نفسي أول مره اسمع بالمطعم هذا ، إما المعزبة فكانت وحده من خوياتها قالت لها إن المطعم زين. المهم إنا مقدر أرد للمعزبة طلب ولا يا ويلي ، لذلك ركبنا الموتر و حركنا إلي شارع التحلية شارع العز و الصياعة في الرياض. اول مشكلة صادفتني هو إني ما لقيت موقف للسيارة قدام المطعم ، و أبدا الفلف كود إني إلقاء محل اصفط فيه الموتر ، لكن ما فيه أمل ، أخيرا لقيت موقف جنب زبالة في حارة جنب المطعم ، و اخذ المشوار كعابي الين وصلت للمطعم. إنا يوم جيت قبال المطعم ما عرفته لان ما علية لوحة واضحة و واجهته كانت قزاز و جواه كاونتر كان عليه 2 شباب سعوديين ، و يشق واجهت المحل من قدام ساق و فخذ ادمي (اللهم يا كافي) ، قالت لي المعزبة هذا هو المطعم و يله خل ندخل ، مشينا لم الباب و يوم قربنا منه و ينطلق ذاك الشاب السعودي من المحل عشان يفتح الباب للمعزبة ، انا ما اخفيكم قلت لنفسي و انا اكشر عن أنيابي (يعنبو هالشباب يغازلون الحريم حتي و أزواجهم معهم ) ، المهم الاخ فتح الباب و سلم و رحب فينا في المطعم (صار ابو الشباب يشتغل في الاستقبال حق المطعم). انا الحقيقة اول مره اشوف مطعم فخم في الرياض يوظف سعوديين فيالاستقبال ، بس الحق انهم كانو قمة في التهذيب و الاخلاق.  هذا المطعم من برا ، وشوفو الساق. سألنا الشاب السعودي اللي في الاستقبال اذا عندنا حجز ، فقلت له لا ، فقال اقعدو و انتظروني بجيكم الحين ، بعد حول دقيقة ولاه راجع و قال الحقوني ، لحقناه ولاه مودينا لذاك المحل الصغير في اخر المطعم و كان فيه كم طاوله كل وحده منها جمب الثانية ، و حول كل طاولة ستاير أمتدلية من السقف تقل حقت الغرف المشتركة في المستشفيات.  هذا السيب اللي مشينا معه عشان نوصل للجلسة حقتنا.  هذي الجلسات اللي ودونا لمها.  هذي الستاير اللي قلت الكم عنها. راح ابو الشباب و خلانا ، بعدن اقبل علينا ذاك الخواجة و إعطانا قوايم الطعام بعد ما رحب فينا و عطانا ذيك الابتسامة العريضة ( الجرسون اللي في المطعم ابيضاني من جنوب إفريقيا).  هذا الجرسون و هو امتشقق ، ما تعود احد يصوره. انا لقطت قايمة الطعام و المشروبات و فتحت على اول شي اطلبه دايما اللي هو البيرة (متعود على أمريكا) ، و ادور في القايمة ولا ماعندهم الا بيرة هولستن الشينة المره (ما عندهم المزيونه البدوايزر) ، ما جاز لي الوضع فخذت شراب السعوديين كوكاكولا دايت بسعر 8 ريال ، و المعزبة طلبت عصير اسمة xxo بسعر 20 ريال ، طبعا لا تسألون عن اسعار المشروبات لانها نار الله ألموقده.  هذا قايمة المشروبات في المطعم.  و هذي بعض اسعار المشروبات طلبت لي ابتايزر اسمة (دمسم) و هو بعض المعجنات الصينية المحشوه باللحم ، اما المعزبة فطلبت شوربة تايلندية. سعر الدمسم كان 55 ريال اما الشوربة فكانت 39 ريال. اما للوجبة الرئيسية فنا طلبت على شور الجرسون صدر دجاج على الطريقة الكاريبية بسعر 75 ريال و المعزبة طلبت مكرونة بولوقنا بسعر 37 ريال.. جاب النا الجرسون الله يجزاه خير كم خبزه في سلة على حسابه هو لاني انا ما طلبته ، و بعدها جاب طلبي و طلب المعزبة.  هذا الخبز اللي جابه الجرسون على حسابة (الله يجزاه خير)  هذا الكوكاكولا حقي.  هذا شراب المعزبة الـ xxo. اكلت الدمسم حقي ولا عاق فهو كله كان 5 قطع صغيره ، اما المعزبة فما شربت شوربتها لانها ما جازت لها ، ناديت الجرسون و قلت له ان الشوربة مهيب زينة ، فطلع اجودي و راح و جاب نوع ثاني من الشوربة بدل التايلندية.  هذا الدمسم  و هذي الشوربة التايلندية الوعة. بعدها جاب الجرسون الطلابات الرئيسية ، ولا طلبي مغير صدر دجاجة مفرود و جمبه شوي بطاطس مهروس و سبانخ مغلي.  هذا الدجاج حقي.  هذي مكرونة المعزبة. اكلت اكلي و طلبت الحساب ولاه مع الخدمة 301 ريال (الخدمة كانت بـ 39 ريال) ، حطيت فوق المبلغ هذا المقسوم من البخشيش و مسكت الباب.  هذي فاتورت الحساب. و انا ماشي في السيب الي يودي للباب لاحظت ان فيه جلسات حلوه على شكل كنبات وسيعة تونس اللي ما يتونس ، سألت عن الجلسات هذي فقال لي حق الاستقبال ان الجلسات هذي كلها محجوزة ، وعطاني رقم المطعم عشان احجز قبل ما اجي المره الثانية و اقعد في احد الجلسات الونيسة . هذا رقم تلفون المطعم كان ودكم تروحون له ، احجزو قبل ما تروحون عشان تقعدون في الاماكن الونيسة: الرياض: 4653020 نوع الاكل في المطعم: المطعم عنده تشكيلة مختلفة من الماكولات ، الايطالي و البحري و اللحوم المشوية و متفرقات اخراء ، لكن يغلب على الطابع الغربي بصفة عامة. ملاحضات على المطعم و الاكل: 1) الجلسات الامامية في المطعم حلوه و تجنن ، لكن يبي لها حجز مسبق. 2) الخدمة في المطعم كانت حلوه و زينة. 3) عصير المعزبة xxo زين ز اشور عليكم به. 4) المشروبات و الماكولات بصفة عامه غالية بزياده. 5) لو المطعم يشوف له واحد يوقف سيارات الزباين كان يح العالم من المشوره. 6) الدمسم زين بس غويلي. 7) الدجاج الكاريبي مو الي ذاك الحد و ما يستاهل سعره. 8) المكرونة كانت زوينة تقييمي للمطعم:  و انشاءالله اذا زرت مطاعم ثانيةفي الرياض اعطيكم لها تقييم زي هذا. لكم اجمل تحية 
|
|
11-07-2005, 07:48 PM
|
|||
|
|||
|
اااااااالله عليك يا عم
|
|
31-10-2005, 04:26 PM
|
|||
|
|||
|
رائع في كتابتك دائماً
|
|
20-11-2006, 05:52 AM
|
||||
|
||||
|
يعطيك العافيه أخوي إسبيرنزا على الحلقه الرائعه عن مطعم تاو بس ماتلاحظ أسعاره ناااااااااااااااااااااار  تحياتي
|
 |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| طرق مشاهدة الموضوع | |
|
|
العرض العادي
