[سالم صائل السبيعي]

بعد الفقر حطت شريحة وجوال ** يسعد مسا جوالها والشريحة
كانت تجيني تشتكي قلة المال ** وتصيح لاجا طاري الفقرصيحه
تقول أبويه دايم الدوم رحال ** وأمي كبيره سن دايم طريحة
وأنت الوحيد اللي لك القلب ميال ** دايم يصارحني وأنا له صريحة
طفله وأنا معشوقها بين الأطفال ** جريح حب وطاح له في جريحة
كنا سوى نرسم على التربة آمال** وأحلام تقتلها الحياة الشحيحة
كم دمعةٍ كانت على الخد تنهال ** وإذا نزلت ضاقت عليّ الفسيحة
الله كم صرخة..وهمسه.. وموال ** الله كم جادت علينـــــا القريحة
الله كم بيتٍ كتبنــــــاه يختال ** وأقول أنا (ضيدان) وأنتي( مليحة)
نخيل لو مافي السما برق وخيال ** وان كذب الأيام لوهي صحيحة
تقول لاحطيت لك بشت وعقال ** وسخّرلك الرحمن عيشه مريحة
أخاف تتركني على عثرة الفال ** للفقر ووجيه الحياة القبيحة
وحبيتها بين الخلايق والازوال ** حبٍ يطول الوقت محدٍ يزيحه
وسلمتها قلبٍ تباريه الأهوال ** وطاح الخفوق . وطيحة القلب طيحه
راحت وخلتني مع القيل والقال ** شاعر صواريف الدهر تستبيحه
ودار الزمان وغير الحال بالحال ** وجاها الزمان بكل ورده وشيحه
فله ..وخدامه.. ولكزس.وجوال** وأنا عجزت ادفع رسوم الشريحة
ولا تنسون تسلمولي على الفستق