السلام عليكم ورحمة الله وبركاته..
اخواني واخواتي في منتدانا الرائع احببت انكم تشاركوني رحلتنا السبت الماضي في شاليهات كان زمان في الرياض مع هذا التقرير..
اتفقت مع أهلي وأخواتي والوالد والوالده على حاجتنا ليوم نغير فيه جو ونخلي الصغار يسبحون وينبسطون فاحترنا باختيار المكان لأنه بصراحه كان اهتمامنا الأكبر هو المسبح الزين والخضره الزينه لأننا طالعين نبي الهواء الطلق ومانبي المجالس والغرف..
المهم بعد المشاورات تم الاتفاق على استئجار شاليه كان زمان وأهم ميزه فيه المسبح الحلو..
وهذا وصف موقع الشاليهات عبر البطاقة الخاصة بالشاليهات :
والحين أخليكم مع الصور للشاليه والوصف بيكون تباعا مع كل صوره مع التذكير بأن التقرير للتعريف بالشاليهات وليس مدح مبالغ لها لأني دوما في تقاريري أحب اني ابين الايجابيات والسلبيات للمكان بكل شفافيه للقارئ الكريم..
هنا عند باب الشاليه بعد الدخول مباشرة يكون عن يسارنا مساحة خضراء كبيرة وعن يميننا مراجيح للأطفال وفي الأمام الدرج المؤدي للأعلى لبقية الشاليه :
وهنا الصوره من الدرج بشكل عكسي بحيث المبنى خلفنا وأمامنا باب الشاليه :
وهذي صور المراجيح وزحليقه للأطفال :
وهنا نظرة عامة :
وهنا المسطحات الخضراء في الشاليه :
هنا مسبح الشاليه وهو احسن شي فيه بصراحه وخصوصا تقسيمه بحيث يوجد قسم للأطفال وقسم متوسط العمق وقسم عميق جدا يعني يرضون جميع الأطراف :
هنا صورة الدكة المقابلة للمسبح ويوجد فيها مكان للشوي وبجانبها مغاسل :
بعد صعود الدرج يكون أمامنا مجلس خارجي شبيه بالخيمه مكيف وفيه تلفزيون وهذه الصور لهذا المجلس :
بعد صعودنا للدرج وعلى اليمين هناك يوجد المبنى ويتكون من مطبخ ودورتين مياه وصاله وغرفة نوم ..
نبدأ بالصور من خارج المبنى :
بعد الدخول يكون أمامنا المطبخ مباشره وهو عباره عن اوفيس صغير وفيه فرن غاز وثلاجه وبعض الدواليب :
لا يفوتكم قدر كبسة الرز الخاص بالوالد والوالده على النار :
تفضلوا اقلطوا على القهوه وهذي صور الحلا والفطاير كل واحد يختار على ذوقه اللي يبيه :
وهنا غرفة نوم الشاليه وبداخلها دورة مياه :
وهنا مغسلة الممر ودورة المياه الأخرى :
وهنا صور الصالة الداخلية وهي مطلة على المسبح :
سبحوا الصغار ولعبوا وتهاوشوا وكل اللي تبونه وحان وقت العشاء والحيره وكل واحد له طلب وطبعا الوالد والوالده كانوا متفرجين علينا لأنهم ضامنين الكبسه اللي بالقدر اللي شفناها على النار
واحنا في نقاش بالأخير اتفقنا اننا نطلب من مطعم النافورة وهو قريب جدا من الشاليهات اتصلنا وطلبنا ساندوتشات كباب دجاج وشيش طاووق وكم علبة حمص وكانت لذيذه جدا والحمدلله على نعمتك وفضلك يارب وهذي هي صور طلبنا أول ماوصل وقبل محد يعتدي على الأكياس :
ونختم معكم بصورة ليلية للشاليهات واعذرونا على رداءة الصوره لكن الصغار حاسوا علي الكامير بآخر السهره وكل واحد صوريني صوريني واخرتها اخذوها هم وصوروا وحاسونا ...
مميزات وسلبيات الشاليه من وجهة نظري :
1- الشاليه يتميز بموقعه الواضح ووصفه سهل جدا كما هو واضح لكم بالكروكي..
2- الشاليهات مسبحها مميز من حيث النظافة والمساحة ومناسبته لجميع الأعمار فهناك قسم خاص للأطفال وقسم متوسط العمق وقسم عميق جدا..
3- يعيب الشاليهات قدم أثاثها وعدم حرصهم على تجديدها فأغلب اللمبات معطله في داخل الشاليه وكذلك الأثاث قديم جدا والثلاجه كذلك ودورات المياه غير معتنى بها أبدا..
4 - السعر معقول في أيام وسط الاسبوع حيث كانت قيمة اجار الشاليه 400 ريال وفي أيام الاربعاء والخميس تكون قيمته 750 ريال..
( وقت ايجار الشاليه من الساعه 2 الظهر الى الساعة 3 ليلا )...
وفي ختام التقرير أتقدم بشكري الجزيل لأختي الصغرى نــدى على مساعدتها لي بتصوير الشاليه فأغلب صور التقرير هي من تصويرها بحكم أنها من أول الواصلين للشاليه فسلمتها الكاميرا وطلبت منها انها تلحق تصور قبل لا يحوسون الصغار الشاليه وينتشرون في كل مكان فلها شكري الخاص وجل تقديري ودعواتي القلبية لها بأن يحقق الله لها ماتتمناه..
شكري الجزيل لكل قارئ لتقريري البسيط سواء شاركنا برده وأفرحنا أو قرأ بصمت ولم يعلق..
كلي أمل بأن يحوز هذا التقرير على رضاكم وأن يكون قدم لكم صوره واضحه عن الشاليهات فإن أصبت فمن الله وان أخطأت فمن نفسي والشيطان..
تمنياتي للجميع بوافر الصحة والعافية وكل عام وأنتم بخير وتقبل الله من الجميع الصيام والقيام وصالح الأعمال..
تمنياتي أن لا تنسوا أختكم نــهــلاء من صالح دعواتكم...