اهلييين فيكم اعضاء سفاري ...
طبعا انا عضو جديد واتشرف اني اكون معاكم ....
انا من جدة طبعا ...
انشالله ناوي اطلع نيوزلندا آخد البكالوريس من هناك ..... وطبعا قدمت عالبعثة من هنا ما قبلتني ...
فحروح بنفسي وعلى حسابي الله يعينني واعدي مثلا اول سنة لغة ( او اللي يكون ) واقدم عالبعثة وانشالله اتحول لحساب الحكومة .... ( مدري يمديني اسوي دا الشي او لأ ) ؟؟
طبعا انا اللي اعرفو انو اوكلاند احسن مدينة ... فبس ابا اعارف كيف حسجل لاي معهد هناك وكيف اسكن عند عيلة .... من هنا عن طريق مكتب ؟؟ ولا من هناك اروح وكل شي بنفسي ؟؟ ( عشان ارخص . لأنو زي منتو عارفين المكاتب حرامية )..
طبعا اش احسن المعاهد في اوكلاند ؟؟
وانا دخلت دوبي على موضوع لنيوزلندا واسعار المصاريف فيها .. وحسبتها : دراسة اللغة والسكن مع العيلة ومصروف الجيب ..( يعني من الى ) طلع في الشهر 9000 ريال .... يعني الله يعين اهلي يصرفو عليا الين بس ما اجيب القبول من البعثة واريحهم..... بس انشالله لو رحت ودرست على حسابي وبعدين قدمت من هناك عالبعثة يقبلوني !!؟؟ لأنو كندا اللي هيا كندا اعرف واحد راح هناك ودرس لغة وراح للسفاره السعوديه وكدب عليهم وقلهم ( ابويا مريض واهلي ما يقدرو يصرفو عليا اكتر من كدا ومدري ايش ..فياريت تضموني للبعثة )...على طول ضمو وهوا مالو هناك شهرين بس !!
فنيوزلندا ( مع احترامي ليها ) مي زي كندا ...فانشالله ما تتعكس معايا..لأنو لو مافيها بعثة من الحكومه وعلى حسابهم خليني فبلدي احسن لأنو والله مصاريف 5 سنين مرره ما تخارجني ... يا دوب اقنعت اهلي وقلتلهم يصرفو عليا ابو كم شهر كدا الين ما اقدم عالبعثه ويقبلوني
طبعا كنت ابا استراليا في البدايه بس لقيتها اغلى واكبر من نيوزلندا ...نيوزلندا صغيرة وبسيطه وانا دا اللي احبو
ما ابا الزحمة والدوش والاوبشن الكتير ... بعدين يقولو انو نيوزلندا فيها طبيعه ما حصلتش .. وانا عشقي الطبيعه ...
دحين احنا فنهاية الترم التاني وانا هنا في جامعة الملك عبدالعزيز .... طبعا اول ما يخلص الترم دا وتبدأ الاجازة حسحب منها لأني مني ماشي فيها مزبوط .. وانا اصلا من البداية ابا بعثة بس ما قبلوني اول ما اتخرجت من الثانوية...عشان معدلي !!! طبعا ليا متخرج سنتين من الثانوية
مع اني جايب 90% في الثانوي وقسم علمي .... وجبت في القدرات 78 امكن عشان كدا المعدل الموزون ما خلاني انقبل في البعثة ....تقريبا معدلي الموزون 86% ...
ياريت تردو على كل اسئلتي وما تسيبو شي وازا عندكم نصايح او نقد على كلامي عاادي بالعكس ابا دا الشي منكم ... وانا بالعنية طولت واديتكم معلومات عني بزياده عشان تعرفو حالتي مزبوط وازا في شي تبو تتحققو منو اسئلو انا على احر من الجمر استناكم .....
والله حتعبكم معايا بس معليش اتحملوني ..... مررره شكرا