[سعود]

الجزء الثاني

ترتيبات هامه قبل السفر



صرف عمله : توجهنا لمركز الصرافه والتحويل التابع لشركة الراجحي المصرفيه وبعد الإستفسار عن سعر الصرف من الريال لليورو وجدنا السعر .. اليورو = 4.85 ريال .. وقررنا الصرف .. خاصة وأتتنا نصائح بالصرف من الرياض لأن السعر في باريس 5 ريال لليورو .. وخلال إنتظار دورنا .ز أتصل بنا أحد الأصدقاء .. وافادنا بأن بنك سامبا يعطيك مقابل اليورو = 4.72 ريال يعني الفرق في الألف يورو 130 ريال يعني بيطلع لنا الفرق كبير على مجموع المبالغ اللي معنا



توجهنا لبنك سامبا "البنك السعودي الأمريكي سابقاً " وصرفنا وتمت العملية بشكل جيد وأسرع وأرتب من الراجحي .. حتى ان الراجحي يعطيك عملات ورقية كبيرة 500 يورو و 200 يورو فقط .. أما بنك سامبا .. أعطانا العملات التي نريدها 5 و 10 و 50







بعد الإنتهاء من صرف العمله .. توجهنا للسوق لشراء الحقائب لنا جميعاً .. لأن أكثر الشباب شناطهم ياما قديمه ولا صغيره .. رحنا لأحد المحلات المعروفه في الرياض لبيع الحقائب وشرينا 4 حقائب مقاس وسط سامسونايت ولون موحد عشان نميز حقائبنا من غيرها ..لا تسألون عن اللون




بعدها طلعنا جميعاً نشتري ملابس الرحله و واحد من الشباب قرر انه ما يشتري شي إلا من هناك .. على قولته ملابس من بلد الموضه ما يدري انه إذا وصل بيتوهق هناك .. الرخيص هناك كله صيني وهندي .. ما يدري ان الملابس الفرنسية الصنع أرخص قطعه بـ 200 يورو وهذا اللي صار له .. الحمدلله قضينا أغراضنا كلها في نفس اليوم من ملابس ومن حقائب وأدوات أخرى .. مثل :

مرور الصيدلية وشراء الأدويه الضروريه والهامه


كان موعد إقلاع رحلتنا الساعه 4 صباحاً بتوقيت الرياض .. التقينا جميعاً الساعه 2:00 ص في منزل أحد الأصدقاء وكل واحد معه أغراضه وتوكلنا على الله لمطار الملك خالد .. ووصلنا للصالة الدوليه للشركات الأجنبية في مطار الملك خالد



وحصل لنا مشكلة في قطع البوردينج في مكتب طيران الإمارات .. طلبنا قطع البوردينج للمواصله من دبي لباريس .. لإن الإقلاع من دبي لباريس الساعه 6:00 ص بتوقيتنا و 7:00 بتوقيت دبي ولا فيه وقت .. لكن موظف الإماراتية .. قال أن النظام متوقف هناك .. ولا أقدر أقطع لكم الآن إلا بوردينج الرياض - دبي .. وقال اقطعو البوردنج من مطار دبي صالة الترانزيت .. أول ما توصولون ..

طلعنا للطياره ..لكن المشكله الطياره ما طلعت في موعدها تأخرت 20 دقيقة .. وما أقلعت إلا الساعة 4:20 ص ..

وهذي صوره لشروق الشمس وحنا في الجو



وصوره من وقت وصولنا صباحاً لدبي وكان الجو مغبر شوي





و وقفنا .. الحمدلله على السلامه




وصلنا لمطار دبي الساعة 6:40 ص دقيقة بتوقيت دبي



وإقلاع رحلتنا لباريس الساعه 7:00 ص .. يعني ما فيه وقت إلا 20 دقيقة .. ولازم نطلع نقص بوردينج من صالة الترانزيت .. طبعاً العفش .. سواها لنا مواصله لباريس .. يعني ما عندنا مشكلة مع العفش . ونزلنا من الطياره .. وبدأ الماراثون ما فيه إلا ركض عشان نلحق ..وصلنا لكاونتر الإماراتية عشان نقص البوردنج .. والمفاجأه أمامنا

طابور طويل فيه أكثر من 40 شخص على كاونتر واحد للدرجة السياحية .. وطابور ثاني لدرجة رجال الأعمال والأولى وأيضاً كان مزحوم .. رحنا للموظفه ( كانت من الجنسية الآسيوية ) مباشرة وما قدامنا وقت إلا 13 دقيقة على الإقلاع .. رفضت .. تقدر وضعنا وقالت صفو سرا .. كل اللي صافين متأخرين .. مثلكم .. حاولنا كشرت عن أنيابها وخفنا ورجعنا .. لقينا موظفه تمشي من الجنسية الإماراتية وشرحنا لها وضعنا .. وما قصرت ( جزاها الله الف خير ) أخذت جوازاتنا وتذاكرنا وفي أقل من خمسة دقايق جابت لنا البوردينج .. وقالت لحقو على البوابة .. وبدا الماراثون الثاني ما فيه إلا مطامر .. حتى جزاها الله خير أشرت لموظف التفتيش مشانا بسرعه وخلانا نتعدى السرى كله .. وصلنا لبوابة الطياره في اللحظات الأخيره .. نصبصب عرق واللي جلس عند البوابة يرتاح

والحمدلله ركبنا الطيارة .. وبدأت الرحله إلى باريس .. كان مدة الرحلة 7 ساعات من مطار دبي الدولي إلى مطار شارل ديجول في باريس .. وصلنا بعدها لمطار باريس الساعه 10 ص بتوقيت باريس .. وأنصدمنا في مطارهم اللي من القرن الطباشيري ... مطار قديم جداً



لكن الحمدلله كانت الإجراءات تمشي بشكل سلس .. تم تختيم الجوازات وأخذنا عفشنا .. وطلعنا على طول وأخذنا تاكسي للفندق اللي كلفنا من المطار للفندق 85 يورو . .


وإنتظروني في الجزء الثالث ..


يتبع