[فارس الشجاع]

(( تابع الحلقة الاولى ))

اليوم الثلاثاء / 1/ 8/ 2006 م
تم التوجهه من الدمام الى البحرين بالسيارة وقفنا سيارتنا في المطار ( عندنا بطاقة للمواقف مجانية )
وبعدها ركبنا على الرحلة المتوجهه الى دبي وكان الاقلاع في تمام الساعة السابعة والربع تقريبا ..

وصلنا مطار دبي العامر بالتحديد في الساعة 9 ونص تقريبا وشدنا صراحة الفعاليات اللي فيه والاستقبال الحافل وخاصة للي عندهم اطفال ... بالونات وهدايا ورسوم وتلوين والمطار فيه حركة حلوة ..

صلينا العشاء في المطار وكانت رحلتنا في اليوم الثاني شرايك يابوعبدالرحمن ناخذ فندق ولا ناخذ سيارة ونطلع نتمشى في دبي والشارقة الى موعد الرحلة .. قلنا خلنا نتمشى احسن ..

رحنا على طول على مكتب بدجت لتاجير السيارات واستاجرنا سيارة وطلعنا نستكشف دبي
بس الوقت طويل والله واحس انه ما يمشي ..

جات الساعة 12 قلنا خلاص اللحين العشاء وين يابو عبدالرحمن قلتله انا مشتهي لبن من مطعم صدف الايراني والله حالة ابشر يابو الفوارس ..

وعلى طول على مطعم صدف وندخل ويقولون فيه بوفيه مفتوح عطونا يالله عندنا وقت والحمد لله تعشينا واتهنينا بالعشاء ..

مضت الساعات الباقية بطيئة وثقيلة ..

يوم الاربعاء 2 / 8 / 2006 م ..

اذن الفجر وحنا في الشارقة صلينا الفجر وجلسنا شوي في المسجد عند المسجد اللي على الخور والله ماشاء الله مسجد وامام يشرحون الصدر ..

وبعدها سلمنا السيارة وعلى طول على الكاونتر لان الساعة جات 7 ورحلتنا الساعة 9 وربع
دخلنا الى المكان المخصص بعد انتظار وكانت فعلا الطيارة عليها زحمة كان في قروب يابانيين جاين وصافين شكلهم عند الكاونتر من الفجر مسوين زحمة
وجلسنا ننتظر الاعلان عن الصعود للطائرة ..

نحن الآن في مطار دبي بانتظار اعلان اقلاع طائرة الخطوط الاماراتية والمتوجهة بأذن الله الى مطار فيينا الدولي , الحالة النفسية في اعلى درجاتها , اما الحالة الجسمانية فالتعب واضح على وجيهنا بسبب عدم النوم طول الليل , الساعة 8:30 تقريبا فتحو الرحلة وقلت لصاحبي خل هاليابانيين يخلصون بعدين ندخل ..

تم الاقلاع بحمد الله وكنا ناويين نحط راسنا ونريح بس الخطوط الاماراتية ماخلونا ننام تدرون ليش ؟ بصراحة هالشاشات اللي قدامك فيها اكثر من 50 جيم ويلله انا وصاحبي عينك ماتشوف الا النور استلم والعب , 5 ساعات مادرينا فيها والله الخطوط هذي حلوة بخدمتهم ...